Қызылорда облысының өңірлік коммуникациялар қызметінің ақпараттық алаңында брифинг ұйымдастырылды.
Тақырыптары: «Өрт қауіпсіздігі немесе дала өртін болдырмау жұмыстары туралы».
Спикер: Қызылорда облысының Төтенше жағдайлар департаментінің бастығының бірінші орынбасары азаматтық қорғау подполковнигі Түйменов Жасұлан Қалдыбайұлы.
Ж.Түйменов: «2025 жылы орман қорында 1,4 га. құрайтын 1 өрт оқиғасы тіркелген. Бұл көрсеткіш 2024 жылмен салыстырғанда 50 % азайған.
2025 жылғы 18 наурызда облыс әкімінің бірінші орынбасары Д.Жаналиновтің төрағалығымен «Орман және дала өрттерінің алдын алу туралы» тақырыбында облыстық төтенше жағдайлардың алдын алу және оларды жою жөніндегі комиссия отырысы өткізілді.
2025 жылғы өрт қауіпті кезеңде өрттің алдын алу, болдырмау мақсатында облыс көлемінде құрамында 78 адамы бар 15 мобильді топ құрылды. Құрылған мобильді топпен бірлесіп, 28 рейд өткізілді.
Табиғи өрттердің алдын алу бағытында ауылдық округтердің әкімдерін, орман шаруашылығы қызметкерлерін, шаруа қожалық иелерін қатыстырып, 64 іс-шара (дөңгелек үстел, жиын, нұсқамалар беру) ұйымдастырылды.
«Қазақстан Ғарыш Сапары» мекемесінің сайты арқылы Департаменттің жедел кезекшісі күнделікті космомониторинг жұмысын жүргізуде. Космомониторинг кезінде анықталған белгілер-нүктелер (термоточка) бойынша координаттары нақтыланып, аталған елдімекеннің жергілікті атқарушы органдарынан ақпараттар алынады.
Өңірдегі орман-дала алқаптарында 6503 шақырымға минералды жолақтарды жүргізу жоспарланып, тиісті жұмыстар атқарылуда.
Өңірдегі өрт қауіпті кезеңге орай өзге де профилактикалық іс-шаралар жалғасын табуда».
Брифингтің соңында журналистердің сұрақтарына жауап берілді.
Қызылорда облысы ТЖД