Қызылорда облысының өңірлік коммуникациялар қызметінің баспасөз орталығында брифинг ұйымдастырылды.
Брифингтің тақырыбы: «ҚР ТЖМ «Апаттар медицинасы орталығына» - 30 жыл, аталмыш кезеңдердегі филиалдың атқарған жұмыстары туралы».
Спикер: ҚР ТЖМ «Апаттар медицинасы орталығының» Қызылорда облысы бойынша филиалының бөлім басшысы, дәрігер Сауытбаев Нұрбол Базарбайұлы.
«Апаттар медицинасы орталығы» мемлекеттік мекемесінің өңірдегі филиалының негізгі мақсаты – облыста төтенше жағдай орын алған кезде халыққа жедел медициналық көмектің көрсетілуін қадағалау.
Негізгінен Денсаулық сақтау басқармасымен, Төтенше жағдайлар департаментімен, «112-Бірыңғай кезекші-диспетчерлік қызмет басқармасымен», Республикалық «Апаттар медицинасы орталығымен» тығыз жұмыс жасайды.
Биыл орталықтың құрылғанына - 30 жыл толды. Аталмыш орталық отыз жыл бойы төтенше жағдайлар кезінде қиналған жұртшылыққа алғашқы медициналық көмек көрсетті. Осы мерейтойы қарсаңында ҚР ТЖМ Апаттар медицинасы орталығының филиалының бөлім басшысы Нұрбол Сауытбаев филиалдың атқарған жұмыстарын мәлімдеді.
- Кез-келген уақытта жол-көлік оқиғаларында, табиғи немесе техногендік сипаттағы төтенше жағдайлар кезінде шұғыл медициналық көмек көрсетіледі, сондай-ақ Трассалық медициналық құтқару пунктіне азаматтардың өздері жүгінген кезде оларға да медициналық көмек беріледі. Қызылорда облысында осындай 3 Трассалық медициналық құтқару пункттері бар. Өңір аумағындағы «Самара-Шымкент» тас жолының бойында «Шиелі», «Жосалы», «Әйтеке би» трассалық медициналық құтқару пункттері оқыс оқиғаға тап болғандарға шұғыл медициналық көмек көрсетіп, нәтижелі жұмыс жасауда.
2024 жылдың 7 айында филиалдың мамандары ТЖ орындарына 189 рет шұғыл шығып, азаматтарға медициналық көмек көрсеткен. Ал, трассалық медициналық құтқару пункттері 64 рет шұғыл шығулар жасаған. Осындай ізгі істерді атқарып жүрген әріптестерді орталықтың мерейтойымен шын жүректен құттықтаймын, кәсіби дами беріңіздер, қызметте абырой тілеймін,- деп атап өтті Нұрбол Базарбайұлы.
Брифинг соңында журналистердің сұрақтарына да жауап берілді.
Қызылорда облысы ТЖД
Баспасөз қызметі