Қарағанды облысы ТЖД қызметкері «Ержүрек құтқарушы» атағына ие болды

Қарағанды облысында «Адал азамат» жобасының жеңімпаздарын марапаттау рәсімі өтті.

Қоғамның дамуына, патриотизмге және әлеуметтік жауапкершілікке қосқан үлесі үшін түрлі сала мамандары марапатталды. Салтанатты шара биыл 30 жылдығын атап өтіп жатқан Қазақстан халқы Ассамблеясы Ақсақалдар кеңесінің республикалық жиыны аясында өтті.

Ең маңызды номинациялардың бірі – «Ержүрек құтқарушы» атағы болды. Бұл марапатқа Қарағанды қаласы №10 өрт сөндіру бөлімінің бастығының орынбасары Магарби Бузуркаев ие болды. Ол тұрғын үйлерге жақын орналасқан кәсіпорында газ цистернасы жарылғаннан кейінгі өртті сөндіру жұмыстарын басқарды. Өрт ошағынан 53 газ баллоны шығарылды. Жедел әрі кәсіби іс-қимылдың арқасында адам шығынының алдын алу мүмкін болды.

«Әрбір өрт сөндіруші күн сайын басқалардың өмірін құтқару үшін өз өмірін қауіпке тігеді. Бізде бір ұран бар: «Бір рет өмір сүріп, мың адамның өмірін құтқару». Біз осы қағидамен өмір сүреміз, сондықтан ешқашан қорықпаймыз. Біз мұны күн сайын сезінеміз», – деді марапаттау рәсімінде Магарби Бузуркаев.

 

Қарағанды облысы ТЖД