Ұйымдастыру нұсқауларына сәйкес 27 мамырда Алматы қаласында табиғи өрттерді жоюға тартылатын қызметтердің күштері мен құралдарының дайындығын тексеру мақсатында «От-2021» өрт-тактикалық оқу-жаттығуы өткізілді.
Оқу-жаттығудың жоспары бойынша өртті Іле-Алатау мемлекеттік ұлттық табиғи паркінің аумағындағы ормандардың әуе күзеті Алматы бөлімшесінің бақылаушы ұшқышы анықтады, шартты өрттің ауданы 2,5 гектардан астам құрады. Желдің екпіні салдарынан өрт аумағы ұлғайып, демалушы туристерге, сондай-ақ өрттің табиғи парктің орман алқабына өтуіне қауіп төнді.
Хабарлама алғаннан кейін орманшылық өкілдеріне көмек көрсету үшін қаланың Төтенше жағдайлар департаменті диспетчерлік қызметінің іс-қимыл алгоритміне сәйкес шақыру орнына барлық қажетті қалалық қызметтер, оның ішінде авиация жіберілді.
Өткізілетін оқу-жаттығулар шеңберінде табиғи өртті сөндіруді, ТЖ аймағынан эвакуациялауды ұйымдастыру, зардап шеккендерге алғашқы медициналық көмек көрсету бойынша практикалық іс-қимылдар пысықталды.
Оқу-жаттығуға барлығы 210 адам, 28 бірлік арнайы техника және 2 әуе кемесі жұмылдырылды.