Қазақстан Республикасы Төтенше жағдайлар министрлігі Алматы қаласы Төтенше жағдайлар департаментінің Дағдарыс жағдайлары басқармасы туралы ереже

Алматы қаласы Төтенше жағдайлар департаменті бастығының

2021 жылғы «____» __________

№ ____ бұйрығына

№ ____ қосымша

 

Қазақстан Республикасы Төтенше жағдайлар министрлігі

Алматы қаласы Төтенше жағдайлар департаментінің

Дағдарыс жағдайлары басқармасы туралы ереже

 

1. Жалпы ережелер

 

1. Қазақстан Республикасы Төтенше жағдайлар министрлігі Алматы қаласы Төтенше жағдайлар департаментінің (бұдан әрі – Департамент) Дағдарыс жағдайлары басқармасы (бұдан әрі – Басқарма) азаматтық қорғау күштері мен құралдарын жедел басқаруды, табиғи және техногендік сипаттағы төтенше жағдайлар туралы ақпаратты жинауды және өңдеуді жүзеге асыратын Департаменттің құрылымдық бөлімшесі болып табылады.
2. Басқарма өз қызметінде Қазақстан Республикасының Конституциясын, Қазақстан Республикасының заңдарын, Президенті мен Үкіметінің актілерін, өзге де нормативтік құқықтық актілерді, сондай-ақ осы Ережені басшылыққа алады.
3. Басқарманың құрылымын, штат санын Қазақстан Республикасының заңнамасында белгіленген тәртіппен Қазақстан Республикасы Төтенше жағдайлар министрі бекітеді. Басқарма бастықтан, жедел кезекшілерден, жедел кезекшінің көмекшілерінен және техниктен тұрады.

        

2. Басқарманың негізгі міндеттері, функциялары, құқықтары мен міндеттері

 

4. Міндеті: азаматтық қорғау саласында мемлекеттік саясатты іске асыру.

Функциялар:

1) азаматтық қорғау саласындағы мемлекеттік саясатты іске асыруды қамтамасыз ету, азаматтық қорғаудың мемлекеттік жүйесінің жұмыс істеуін және одан әрі дамуын қамтамасыз ету;

         2) өз құзыреті шегінде Министрліктің жыл сайынғы Операциялық жұмыс жоспарында және Департаменттің жұмыс жоспарында көзделген іс-шараларды ұйымдастыруға және одан әрі практикалық іске асыруға қатысу.

5. Міндеті: табиғи және техногендік сипаттағы төтенше жағдайлардың туындау қатері немесе туындауы және халықтың тыныс-тіршілігі жағдайларының бұзылуы туралы хабарламалар қабылдау.

         Функциялар:

• тәулік бойы жедел кезекшілік қызметті атқару;
• азаматтардан және ұйымдардан төтенше жағдайлар қатері немесе оның туындауы туралы хабарламалар қабылдау.

6. Міндеті: азаматтық қорғау күштері мен құралдарын жедел басқару, төтенше жағдайлар туралы ақпаратты жинау және өңдеу.

Функциялар:

• табиғи және техногендік сипаттағы төтенше жағдайлардың, оқиғалардың туындау қатері немесе туындауы туралы ақпаратты жинау және өңдеу және жедел ақпарат блогын дайындау;
• Департаменттің, Дағдарыс жағдайларындағы басқару орталығының (бұдан әрі – Орталық) басшылығын және басқа да мүдделі мемлекеттік органдарды табиғи және техногендік сипаттағы төтенше жағдайлар және оқиғалар туралы жедел ақпараттандыру;

3) табиғи және техногендік сипаттағы төтенше жағдайларды жою кезінде Департамент бөлімшелері мен мекемелерін жедел басқаруды қамтамасыз ету;

4) Департамент басшылығының командалары мен өкімдерін табиғи және техногендік сипаттағы төтенше жағдайларды жою кезінде авариялық-құтқару қызметтері мен құралымдарына беруді қамтамасыз ету;

5) Департаменттің бөлімшелеріне жауынгерлік және оқу-жаттығу басқару сигналдарын қабылдау және беру;

6) табиғи және техногендік сипаттағы төтенше жағдайлардың алдын алу және оларды жою мәселелері бойынша мемлекеттік органдармен, мүдделі қызметтермен және ұйымдармен өзара іс-қимыл жасауды ұйымдастыру және ведомствоаралық үйлестіруді қамтамасыз ету;

7) Басқарманың байланыс құралдары мен жабдықтарын тұрақты әзірлікте ұстау, сондай-ақ Департаменттің жедел штабының жұмысын техникалық, ақпараттық қолдауды қамтамасыз ету;

8) табиғи және техногендік сипаттағы төтенше жағдайлар қатері және оның туындауы кезінде мемлекеттік басқару органдарын және қала халқын құлақтандыру, «Арал» республикалық құлақтандыру жүйесі бойынша бақылау, оқу-жаттығу және жауынгерлік сигналдарды қабылдау және уақтылы беру, СМС хабарлауды ұйымдастыру;

9) табиғи және техногендік сипаттағы төтенше жағдайлар орындарынан Департаменттің аумақтық бөлімшелері мен мекемелерінен ұсынылған фотоматериалдардан фото архивті, бейне архивті қалыптастыру;

7. Міндеті: табиғи және техногендік сипаттағы төтенше жағдайлардың жедел мониторингі.

         Функциялар:

• Басқармаға алдын ала және табиғи және техногендік сипаттағы төтенше жағдайлар кезеңінде болжамды-ақпараттық қолдауды қамтамасыз ету;

2) мониторинг жүйелерінен, оның ішінде жерді қашықтықтан зондтау құралдарын пайдалана отырып, табиғи және техногендік сипаттағы төтенше жағдайлардың қатері және туындауы туралы ақпарат алмасу бойынша мемлекеттік органдармен, ұйымдармен өзара іс-қимылды ұйымдастыру;

         3) болжамды ақпаратты жинау және қалыптастыру, ғарыштық мониторинг, сейсмикалық, гидрометеорологиялық, радиациялық, санитариялық-эпидемиялық жағдай, гидротехникалық және су объектілерінің жай-күйі және т. б. мониторингі деректері бойынша нәтижелерді қорыту және талдау;

         4) жедел ақпаратты жинақтау және мұрағаттау.

8. Басқарманың:

1) Департаменттің құрылымдық және аумақтық бөлімшелерінен, ведомстволық бағынысты мемлекеттік мекемелерінен және қала аумағында орналасқан Министрліктің ұйымдарынан жүктелген міндеттерді орындау үшін қажетті құжаттарды, анықтамалық және өзге де материалдарды сұрату және алу;

2) өз құзыреті шегінде Департаменттің құрылымдық және аумақтық бөлімшелеріне, ведомстволық бағынысты мемлекеттік мекемелеріне және қала аумағында орналасқан Министрліктің ұйымдарына нұсқаулар беру;

3) өз құзыреті шегінде Департаменттің құрылымдық және аумақтық бөлімшелерімен, ведомстволық бағынысты мемлекеттік мекемелерімен және қала аумағында орналасқан Министрліктің ұйымдарымен, жергілікті атқарушы органдармен, ұйымдармен және мекемелермен жедел түрде өзара іс-қимыл жасау;

4) Басқарма құзыретіне кіретін мәселелер бойынша семинарлар мен кеңестер өткізу;

5) Департамент басшылығына Басқарма жұмысын жетілдіру бойынша ұсыныстар, сондай-ақ Басқарма құзыретіне кіретін мәселелерді аппараттық және жедел кеңестерде қарауға енгізу;

6) өзіне жүктелген функцияларды іске асыру үшін Басқарманың құзыреті шегінде өзге де құқықтарды жүзеге асыруға құқығы бар.

9. Басқарманың міндеттері:

1) Қазақстан Республикасының Конституциясын және заңнамасын сақтау;

2) Министрлік Алқасының шешімдерінде, жедел және аппараттық кеңестердің хаттамаларында, Департаменттің және Басқарманың жұмыс жоспарларында көзделген іс-шараларды орындауға міндетті;

3) Басқарманың құзыретіне кіретін мәселелер бойынша жеке және заңды тұлғалардың өтініштерін қарау;

4) өз құзыреті шегінде ұлттық қауіпсіздік, мемлекеттік құпиялар және ақпараттық қауіпсіздік саласындағы заңдар мен өзге де нормативтік құқықтық актілердің сақталуын қамтамасыз ету;

5) қойылған міндеттерге сәйкес Басқарманың құзыреті шегінде өзге де міндеттер белгіленеді.

 

3. Басқарма қызметін ұйымдастыру

 

10. Басқарма заңнамалық актілерге, Қазақстан Республикасының Президенті мен Үкіметінің актілеріне және Қазақстан Республикасының өзге де нормативтік құқықтық актілеріне сәйкес өзінің негізгі міндеттері мен функцияларын іске асыру үшін қажетті өкілеттіктерге ие.
11. Басқарманы Қазақстан Республикасының заңнамасында белгіленген тәртіппен Департамент бастығы қызметке тағайындайтын және қызметтен босататын бастық басқарады.
12. Басқарма бастығы Басқарма қызметіне жалпы басшылықты жүзеге асырады және Басқармаға жүктелген міндеттердің орындалуы мен оның өз функцияларын жүзеге асыруы үшін дербес жауапты болады.
13. Басқарма бастығы Департамент басшылығына Басқарманың құрылымы мен штаттары бойынша ұсыныстар береді.
14. Осы мақсатта Басқарма бастығы:

• Басқарма қызметкерлерінің міндеттері мен өкілеттіктерін айқындайды;

2) Басқарма қызметкерлерін қызметке тағайындауға және қызметтен босатуға ұсынады;

3) Басқарма қызметкерлеріне арнаулы атақтар беруге ұсынады;

4) Департамент басшылығына Басқарма қызметкерлерін көтермелеу, оларға тәртіптік жаза қолдану туралы ұсыныстар енгізеді;

5) мемлекеттік органдарда, өзге де ұйымдарда Басқарманың атынан өкілдік етеді;

         6) Қазақстан Республикасының заңдарына және Президентінің актілеріне сәйкес өзге де өкілеттіктерді жүзеге асырады.

15. Басқарма құзыретіне кіретін мәселелер бойынша Басқарма атынан Департаменттің құрылымдық бөлімшелеріне жіберілетін құжаттарға Басқарма бастығы, ал ол болмаған жағдайда - оны алмастырушы адам қол қояды.
16. Қажет болған жағдайда Басқарма осы Ережеге өзгерістер мен толықтырулар енгізуге бастамашылық жасайды.

 

_____________

 

 

 

 

 

Дата публикации

07 февраля 2022