2026 жылдың қаңтар айынан бастап Алматы облысы аумағында көктемгі су тасқыны кезеңіне дайындық шеңберінде су басу қаупін төмендету және төтенше жағдайлардың алдын алу мақсатында профилактикалық іс-шаралар кешені кезең-кезеңімен жүзеге асырылуда.
Алматы облысы Төтенше жағдайлар департаменті жергілікті атқарушы органдармен бірлесіп өңірде көктемгі су тасқыны кезеңіне дайындық аясында 45,7 км арықтар, 31 км каналдар, 4,2 км өзен арналары тазартылды, сондай-ақ автомобиль және теміржол жолдарының астындағы 21 су өткізу құбыры тазартылды.
Елді мекендерден қарды шығару үшін аудан әкімдіктерімен бірлесіп облыстың барлық аудандарында, сондай-ақ Қонаев және Алатау қалаларында мердігер ұйымдарды тарта отырып, қар шығаратын арнайы полигондар айқындалды.
Су тасқынының алдын алу мақсатында Төтенше жағдайлар департаментінің бөлімшелері 38 елді мекенді қамти отырып, 45 рейдтік іс-шара өткізді, сондай-ақ 763 адам қатысқан 80 халықпен кездесу ұйымдастырылып, оның барысында 564 профилактикалық ұсыным таратылды.
Аталған іс-шаралардың негізгі мақсаты – халықтың қауіпсіздігін қамтамасыз ету, тіршілікті қамтамасыз ету нысандары мен инфрақұрылымды қорғау, сондай-ақ көктемгі су тасқыны кезеңінде төтенше жағдайлардың алдын алу.
Алматы облысы ТЖД баспасөз қызметі