Ақмола облысы Бурабай ауданының Успено-Юрьевка ауылында 294-ші «Ауыл құтқарушылары» ерікті өртке қарсы құралымы ашылды. Өрт сөндіру бекеті ең жақын мамандандырылған өрт сөндіру бөлімінен 41 шақырым қашықтықта орналасқан. Ол жалпы саны 1 472 адамды құрайтын бес елді мекеннің өрт қауіпсіздігін қамтамасыз етеді.
Жаңа бекеттің басты ерекшелігі – оның көпфункционалды болуы. Өрт қауіпсіздігін қамтамасыз ету міндеттерінен бөлек, ол халыққа қолдау көрсету орталығы ретінде де жұмыс істейді. Бекет базасында медициналық пункт, учаскелік полиция пункті және жергілікті атқарушы орган өкілінің жұмысы ұйымдастырылады.
Қажетті қызметтердің бір жерде шоғырлануы ауыл тұрғындары үшін көмектің қолжетімділігін арттыруға, ведомствоаралық өзара іс-қимылды нығайтуға және халыққа кешенді қолдау көрсетуге мүмкіндік береді.
Өрттер мен басқа да оқиғаларға жедел ден қою үшін бекет қажетті техникамен және жабдықтармен қамтамасыз етіліп, жеке құраммен жасақталған. Оның ашылуы өрт сөндіру бөлімшелерінің оқиға орнына жету уақытын қысқартып, шалғайдағы елді мекендер тұрғындарын қорғау тиімділігін арттыруға мүмкіндік береді.
«Ауыл құтқарушылары» өрт сөндіру бекетінің ашылуы өңірдегі азаматтық қорғау жүйесін дамытудағы маңызды қадам болып табылады. Жобаны іске асыру ауылдық аумақтардың қауіпсіздігін арттыруға, төтенше жағдайларға ден қою уақытын қысқартуға және Ақмола облысы тұрғындары үшін қауіпсіз өмір сүру жағдайларын қалыптастыруға бағытталған.
Ақмола облысы Сандықтау ауданының Белгородское ауылында 293-і «Ауыл құтқарушылары» ерікті өртке қарсы құралымы ашылды. Жаңа бөлімше жалпы саны 636 адамды құрайтын үш елді мекеннің қауіпсіздігін қамтамасыз етеді.
Өрт сөндіру бекетінің құрылысы өңірдегі азаматтық қорғау жүйесін нығайтуға үлес қосқан жергілікті жауапкершілігі шектеулі серіктестіктің күшімен жүзеге асырылды. Өрттер мен басқа да төтенше жағдайларға жедел ден қою үшін бекет ТЖМ ұсынған өрт сөндіру техникасымен жабдықталған. Бөлімше қажетті құрал-жабдықтармен толық қамтамасыз етіліп, жеке құраммен жасақталған.
Өрт сөндіру бекеті ең жақын өрт сөндіру бөлімінен 53 шақырым қашықтықта орналасқан. Оның ашылуы өрт қауіпсіздігін арттырып, төтенше жағдайларға жедел әрекет ету уақытын қысқартуға мүмкіндік береді.
Ақмола облысының Төтенше жағдайлар департаментінде көлік прокуратурасы өкілінің қатысуымен жұмыс кеңесі өтті.
Кездесу барысында шағын көлемді кемелерді пайдалану саласындағы ведомствоаралық өзара іс-қимыл, қолданыстағы заңнама талаптарының сақталуы және өңірдегі су айдындарында қауіпсіздікті қамтамасыз ету мәселелері қаралды.
Уәкілетті органдардың су айдындарындағы оқиғалардың алдын алуға және кеме қатынасының қауіпсіздік деңгейін арттыруға бағытталған іс-қимылдарын үйлестіруге ерекше назар аударылды.
Кеңес қорытындысы бойынша мемлекеттік органдар арасындағы өзара іс-қимылды нығайту, белгіленген талаптардың сақталуын қамтамасыз ету және Ақмола облысының су айдындарында төтенше жағдайлардың алдын алу бағытындағы бірлескен жұмыстың алдағы басымдықтары айқындалды.
Ақмола облысының Өңірлік коммуникациялар қызметінің алаңында жылыту маусымындағы өрт қауіпсіздігі мәселелеріне арналған Ақмола облысы Төтенше жағдайлар департаментінің брифингі өтті.
«Қазгидромет» РМК мәліметінше, алдағы күндері өңірде түнгі уақытта ауа температурасының төмендеуі күтіледі. Осыған байланысты ТЖД пештер мен электр жылыту құрылғыларын пайдалану кезінде қауіпсіздік талаптарын сақтаудың маңыздылығын ескертеді.
2026–2027 жылдардағы жылыту маусымы басталғалы облыста 23 өрт тіркелді. Бұл өткен жылдың сәйкес кезеңімен салыстырғанда 42,5%-ға аз. Материалдық шығын шамамен 50,8 млн теңгені құрады. Өрттердің негізгі себептері – электр жабдықтарын пайдалану қағидаларын бұзу және отпен абайсыз әрекет ету.
Өрттің алдын алу мақсатында ТЖД қызметкерлері 10 мыңнан астам тұрғын үйді профилактикалық жұмыстармен қамтып, 850 мұржаны тазалады. Халықтың әлеуметтік осал топтарына ерекше көңіл бөлінуде. Олардың үйлеріне көміртек тотығы мен түтінді анықтайтын 536 датчик орнатылды.
Сонымен қатар облыста «Ата-анаңның үйін тексер!» республикалық акциясы өткізілуде. Акция тұрғындарды ата-аналары мен жақындарының үйлеріндегі пештердің, мұржалардың және электр сымдарының жай-күйін тексеруге шақырады.
ТЖД мамандары жанып тұрған пештер мен қосулы электр жылытқыштарын қараусыз қалдырмауды, электр желілеріне шамадан тыс жүктеме түсірмеуді, мұржаларды уақтылы тазалауды және тек жарамды жылыту құрылғыларын пайдалануды ескертеді.
Төтенше жағдай туындаған кезде 112 нөміріне хабарласыңыз.
Жақындарыңыздың қауіпсіздігіне бейжай қарамаңыз – күн суымай тұрып, олардың үйіндегі қауіпсіздік талаптарын тексеріңіз!
Кәсіби мереке – Құтқарушылар күні қарсаңында Ақмола облысының Төтенше жағдайлар департаментінде салтанатты іс-шара өтті. Көкшетау қаласындағы «Болашақ» сарайында ұйымдастырылған мерекелік жиын азаматтық қорғау органдарының қызметкерлерін, қызмет ардагерлері мен құрметті қонақтарды біріктірді.
Іс-шараның басында Қазақстан Республикасы Төтенше жағдайлар министрі Мұрат Мұхановтың азаматтық қорғау органдарының қызметкерлеріне арналған құттықтауы оқылды. Құттықтауда халықтың қауіпсіздігін күн сайын қамтамасыз етіп, ең күрделі жағдайларда кәсібилік, батылдық танытып, көмекке келуге дайын тұратын құтқарушылар қызметінің маңыздылығы атап өтілді.
Жиында Ақмола облысы Төтенше жағдайлар департаментінің бастығы Бақытжан Алашов құттықтау сөз сөйлеп, қызметтік міндеттерді орындау барысында қызметкерлердің көрсетіп жүрген жанқиярлығы мен ерлігін атап өтті. Сондай-ақ олардың өңір тұрғындарының қауіпсіздігін қамтамасыз етуге қосқан елеулі үлесіне тоқталды.
Баяндамада бөлімшелердің материалдық-техникалық базасы мен инфрақұрылымын дамыту мәселесіне ерекше назар аударылды. Соңғы жылдары облыста өртке қарсы-құтқару қызметін нығайту бағытында жүйелі жұмыстар жүргізілуде. Жаңа өрт сөндіру бөлімдері пайдалануға беріліп, шалғайдағы ауылдық округтердегі елді мекендердің қауіпсіздігін қамтамасыз ететін ерікті өрт сөндіру құралымдары құрылуда. Бұл шаралар төтенше жағдайларға жедел ден қоюға және өңір тұрғындарына көмекті дер кезінде жеткізуге мүмкіндік береді.
Іс-шараның маңызды сәттерінің бірі марапаттау рәсімі болды. Міндеттерін адал атқарғаны, кәсібилігі және халықтың қауіпсіздігін қамтамасыз етуге қосқан елеулі үлесі үшін қызметкерлерге кезекті арнаулы атақтар, төсбелгілер, медальдар, Қазақстан Республикасы Төтенше жағдайлар министрлігі мен Ақмола облысының Төтенше жағдайлар департаментінің Құрмет грамоталары және алғыс хаттары табысталды.
Екі қызметкер құтқару операцияларына белсенді қатысып, кәсібилік танытқаны үшін «Құтқарушы» және «Құтқару операцияларына белсенді қатысқаны үшін» төсбелгілері мен медальдарымен марапатталды.
Азаматтық қорғау саласының ардагерлеріне де ерекше құрмет көрсетілді. Олардың көпжылдық еңбегі, мамандыққа деген адалдығы және құтқару қызметінің қалыптасуы мен дамуына қосқан үлесі жас қызметкерлер үшін өнеге болып қала береді.
Салтанатты іс-шара мерекелік концерттік бағдарламамен жалғасты. «Болашақ» сарайының сахнасында Көкшетау қаласының үздік шығармашылық ұжымдары өнер көрсетіп, қатысушылар мен қонақтарға көтеріңкі көңіл күй сыйлады.
Құтқарушылар күні – өзгелерге көмек көрсетуді өмірлік міндетіне айналдырған жандардың мерекесі. Олардың батылдығы, жауапкершілігі және төтенше жағдайларда жедел әрекет етуге дайындығы – тұрғындар қауіпсіздігінің кепілі. Қиын сәтте көмекке келуге әрдайым дайын тұратын құтқарушылар халықтың сенімі мен алғысына лайық.
Кәсіби мереке қарсаңында «Құтқарушылар аллеясында» азаматтық қорғау органдары қызметкерлерінің салтанатты түрде ант қабылдау рәсімі өтті.
Ақмолалық құтқарушылар қатарына 16 қызметкер қосылды. Олар Ақмола облысының әртүрлі аудандарындағы бөлімшелерде қызмет атқаратын болады.
Іс-шара салтанатты сап түзуден басталды. Ант қабылдау рәсімі халықтың қауіпсіздігін қамтамасыз ету және төтенше жағдайлардан қорғау жолында жауапты қызметті таңдаған жас қызметкерлердің кәсіби өміріндегі маңызды кезеңге айналды.
Ақмола облысы Төтенше жағдайлар департаменті бастығының орынбасары Ренат Валишанов қызметкерлерді айтулы оқиғамен құттықтады. Ол азаматтық қорғау органдарындағы қызмет жоғары жауапкершілікті, тәртіпті, батылдықты және кез келген сәтте адамдарға көмек көрсетуге дайын болуды талап ететінін атап өтті.
Салтанатты рәсімнен кейін жеке құрамның саптық байқауы өткізіліп, қысқы киім нысанына көшу жүзеге асырылды. Байқау барысында қызметкерлердің сыртқы келбеті мен қысқы кезеңде қызмет атқаруға дайындығы тексерілді.
Жаңа қызметкерлер үшін ант қабылдау кәсіби жолдың бастауы болды. Бұл жол — қызметтік борышқа адалдықты, жанқиярлық еңбекке дайындықты және азаматтардың қауіпсіздігі жолында қызмет етуді талап етеді.
Құтқарушылар күні қарсаңында Ақмола облысында азаматтық қорғау органдары қызметкерлері арасында финалдық жарыстар өтті. Спорттық сайысқа алдын ала өткен аймақтық кезеңдерде үздік нәтиже көрсетіп, финалға жолдама алған командалар қатысты.
Финалдық жарыс Көкшетау қаласындағы триатлон мектебінің базасында ұйымдастырылды. Үздік атану үшін төрт команда бақ сынап, өздерінің дене дайындығын, төзімділігін, күш-қуатын және командалық бірлігін көрсетті.
Қатысушылар үш спорт түрі бойынша сынға түсті: футзал, 50 метр қашықтыққа жүзу және армрестлинг. Жеңімпаз командалардың барлық сайыс түрлері бойынша жинаған ұпайларының жалпы қорытындысы бойынша анықталды.
Жарыс қорытындысы бойынша үшінші орынды Ақмола облысының Төтенше жағдайлар департаменті аппаратының командасы иеленді. Екінші орын Целиноград ауданының төтенше жағдайлар бөлімінің командасына бұйырды. Ал жарыстың жеңімпазы Көкшетау қаласының Төтенше жағдайлар басқармасының командасы атанды.
Жеңімпаздар мен жүлдегерлер медальдармен, грамоталармен, кубоктармен және бағалы сыйлықтармен марапатталды.
Мұндай жарыстарды өткізу командалық рухты нығайтуға, дене дайындығын жетілдіруге және азаматтық қорғау органдары қызметкерлерінің кәсіби деңгейін жоғары ұстауға ықпал етеді.
«Ата-ананың үйін тексер» республикалық акциясы аясында ақмолалық құтқарушылар қарт адамдар тұратын «Үміт шаңырақ» қоғамдық қорына барды.
Сапар барысында Ақмола облысы Төтенше жағдайлар департаментінің өкілдері пансионатқа өрт сөндіргіштер табыстап, ғимараттың өрт қауіпсіздігі жағдайын тексерді.
Құтқарушылардың бастамасын өңірдегі жеке ұйымдар да қолдады. Олардың көмегімен электр монтаждау жұмыстары жүргізіліп, алғашқы өрт сөндіру құралдары орнатылды.
Акция аясында аға буын өкілдерінің қауіпсіз жағдайда тұруына ерекше көңіл бөлінеді. Қарт адамдарға қамқорлық көрсету — бұл тек назар мен қолдау ғана емес, сонымен қатар олардың өмірі мен денсаулығын сақтау үшін уақтылы шаралар қабылдау.
Құтқарушылар күні қарсаңында Ақмола облысында төтенше жағдайлар бөлімшелері қызметкерлері арасында спорттық жарыстар өтті. Іс-шараның мақсаты – дене шынықтыру даярлығын жетілдіру, командалық рухты нығайту және салауатты өмір салтын насихаттау.
Бурабай ауданында үздік атану үшін Көкшетау қаласының, Зеренді, Бұланды, Бурабай аудандарының, Біржан сал ауданының, сондай-ақ Ақмола облысы ТЖД жедел-құтқару жасағының командалары бақ сынады.
Ақкөл ауданында өткен жарыстарға Ақкөл, Шортанды, Астрахан және Егіндікөл аудандарының төтенше жағдайлар бөлімшелерінің қызметкерлері, сондай-ақ Степногорск қаласының командасы қатысты.
Қатысушылар спорттың үш түрі бойынша – футболдан, қол күресінен және 50 метр қашықтыққа жүзуден сынға түсті. Жарыс барысында қызметкерлер күш-қуатын, төзімділігін, ептілігін және жеңіске деген жігерін көрсетті.
Жарыс қорытындысы бойынша Бурабай ауданында жалпыкомандалық бірінші орынды Көкшетау қаласының командасы иеленсе, Ақкөл ауданында Астрахан ауданының командасы жеңімпаз атанды.
Мұндай жарыстар жеке құрамның дене шынықтыру даярлығын арттыруға, ұжымдық рухын нығайтуға және ауызбіршілігін арттыруға ықпал етеді. Сонымен қатар спорттық іс-шаралар құтқарушылардың күш-қуат пен төзімділікті, сондай-ақ үйлесімді іс-қимылды талап ететін қызметтік міндеттерді орындауға дайындығын арттыруға мүмкіндік береді.
Ақмола облысы Төтенше жағдайлар департаментінің жеке құрамы Көкшетау қаласындағы «Бурабай» спорт сарайында кезекті өрт-тактикалық оқу-жаттығуын өткізді.
Нысанның ішкі жоспарлануының ерекшеліктері, бөлмелерінің күрделілігі және мұнда бір мезгілде көптеген адамның болуы өрт сөндірушілерден үйлесімді әрекетті, жедел шешім қабылдауды және нысан қызметкерлерімен нақты өзара іс-қимылды талап етеді.
Оқу-жаттығудың тактикалық жоспарына сәйкес, әкімшілік блоктың екінші қабатында шартты өрт шықты. Өрт туралы шартты дабыл түскеннен кейін жеке құрам белгіленген іс-қимыл алгоритмін орындауға кірісті.
Жаттығу барысында хабарлау жүйесінің жұмысы, спорт нысаны қызметкерлерімен өзара іс-қимылды ұйымдастыру, келушілер мен персоналды эвакуациялау мәселелері пысықталды. Сонымен қатар шартты түрде зардап шеккен екі адамды іздеу және құтқару жұмыстарына, сондай-ақ авариялық-құтқару жұмыстары кезінде бөлімшелердің іс-қимылдарын үйлестіруге ерекше назар аударылды.
Мұндай оқу-жаттығулар құтқарушылардың төтенше жағдайларға дайындық деңгейін тексеруге, кәсіби дағдыларын жетілдіруге және адамдар көп жиналатын нысандардың әкімшілігімен өзара іс-қимылды пысықтауға мүмкіндік береді.
Оқу-жаттығу аяқталғаннан кейін жеке құрамның іс-қимылдарына жан-жақты талдау жүргізілді. Қатысушылар тапсырмалардың орындалу барысын саралап, бөлімшелер жұмысының үйлесімділігін бағалады және практикалық дағдыларды одан әрі жетілдіру мәселелерін талқылады.
Өрт-тактикалық оқу-жаттығуларды өткізу Төтенше жағдайлар департаменті бөлімшелерінің даярлығын арттыруға, жедел әрекет ету қабілетін жетілдіруге және халықтың қауіпсіздігін қамтамасыз етуге бағытталған.