«Әліппе»/ «Букварь» жобаларының презентациясы бойынша өткізілген жиын туралы

Қазақстан Республикасы Білім және ғылым министрлігінің 2017 жылға арналған жұмыс жоспарын орындау мақсатында 2017 жылғы 27 ақпанда Білім және ғылым министрі Е.К.Сағадиевтің басшылығымен 5-6 жастағы балаларға арналған «Әліппе»/«Букварь» жобалары және оқу-әдістемелік кешендерінің жобаларын талқылау бойынша жиын өткізілді.

 

Жиынға министрліктің, Ы.Алтынсарин атындағы Ұлттық білім академиясының, Назарбаев Зияткерлік мектебінің, «Балалық шақ» республикалық орталығының, Алматы қаласындағы ЖОО өкілдері, сондай-ақ, Астана қаласы мен Ақмола облысының мектепке дейінгі ұйымдары мен бастауыш сыныптарының педагогтары қатысты.

 

Жиынға қатысушыларға 5-6 жастағы балаларға арналған «Әліппенің» және оқу-әдістемелік кешеннің жобасы ұсынылды.

 

Мектепалды даярлық сыныптары мен 1-сынып педагогтары «Әліппе»/«Букварь» жобалары мен 1-сыныпқа арналған «Сауат ашу»/«Обучение грамоте» оқулықтарымен сабақтастығын қамтамасыз ету мәселесін талқылады, «Әліппе»/«Букварь» құрылымы бойынша және балалардың жас ерекшеліктерін ескере отырып материалдарды ұсыну туралы ұсыныстар енгізді.

 

Жиын барысында «Әліппе»/«Букварь» жобаларын әзірлеуге мүдделі баспалар мен авторлардың қатысуымен кезекті жиын өткізу туралы шешім қабылданды.

 

Сонымен қатар, келесі оқу жылынан бастап 5-6 жастағы балаларға арналған «Әліппе»/«Букварь» жобалары және оқу-әдістемелік кешенді апробациядан өткізу бойынша пилоттық жоба жүргізу және жобаны міндетті түрде министрліктің, «Балалық шақ» орталығының, Ы.Алтынсарин атындағы Ұлттық білім академиясының сайттарында орналастыру туралы шешім қабылданды.