2021 жылғы 15 ақпанда Қазақстан Республикасының Президенті «2017 жылғы 11 сәуірдегі Еуразиялық экономикалық одақтың Кеден кодексі туралы шартқа өзгерістер енгізу туралы хаттаманы ратификациялау туралы» ҚР Заңына (бұдан әрі – Хаттама) қол қойды.
Армения Республикасында жаңа Конституцияның қабылдануына байланысты (президенттік басқару нысанынан парламенттік басқару нысанына көшу) Армения Республикасы Премьер - Министрінің мәртебесі Мемлекет басшысы мәртебесіне теңестірілді.
Еуразиялық экономикалық одақтың қолданыстағы кедендік заңнамасына сәйкес, Үкімет басшылары тек қызметтік міндеттерін орындауға байланысты кедендік шекараны кесіп өткен кезде, жеке багажын кедендік тексеріп-қарау сияқты кедендік бақылаудың белгілі бір нысандарынан босатылады.
Осы өзгерістердің енгізілуімен Үкімет басшылары мен олармен еріп жүретін отбасы мүшелерінің кедендік шекараны кесіп өту мақсатына қарамастан, жеке багажын кедендік тексеріп-қараудан босату бекітіледі.
Сондай-ақ, енгізілген өзгерістер Армения Республикасының Үкіметі Әкімшілігі басшысын және Армения Республикасы Премьер-Министрінің Күзет қызметі бастығын қызметтік міндеттерін орындауларына байланысты жеке багажын кедендік тексеріп-қараудан босатады.