Абай облысы бойынша ҚАЖ жүйесінің орташа қауіпсіздік мекемесінде денсаулыққа қасақана зиян келтіргені үшін үш жыл алты айға бас бостандығынан айырылған 25 жастағы екі шетел азаматы жазасын өтеп жатыр.
Әңгімелесу барысында сотталғандар бірнеше жыл бұрын білім алып, лайықты болашақ құру мақсатында шет мемлекеттен Қазақстанға келгендерін айтты. Олардың басты арманы – диплом алып, туған еліне оралып, ата-анасының үмітін ақтау еді. Алайда тағдыр басқаша шешілді. Жақындарымен көптен күткен кездесудің орнына олар бас бостандығынан айыру орындарында қалды. Үш жыл бойы сотталғандар болған жағдайды ата-аналарына айтуға батылдары бармады. Олар ата-аналарының өздерін айыптауынан және ең жақын адамдарының теріс айналуынан қорықты.
Жас жігіттердің тағдыры мекеме қызметкерлерін бейжай қалдырмады. Психологиялық диагностика жүргізілгеннен кейін мамандар үзілген отбасылық байланысты қалпына келтіру жұмыстарына кірісті. Психологтар тәрбие қызметінің қызметкерлерімен бірлесіп, сотталғандардың туыстарымен байланыс орнатып, қалыптасқан жағдайды егжей-тегжейлі түсіндірді және бейнебайланыс ұйымдастырды.
Үш жылдық үзілістен кейін ата-аналар мен ұлдарының көптен күткен кездесуі өтті. Бейнеқоңырау кезінде ешкім көз жасын ұстай алмады. Ата-аналар балаларының қайда жүргенін алғаш рет білді, ал сотталғандар кешірім сұрап, ең маңызды қолдау сөздерін естуге мүмкіндік алды. Бұл кездесу жас жігіттердің өміріндегі бетбұрыс сәтіне айналып, оларға үміт пен өз өмірін өзгертуге деген сенім сыйлады.
— Осында түскеннен кейін мені ата-анамның ешқашан кешірмеуі мүмкін деген ой қатты қорқытты. Бұл ойлар маған маза бермеді. Бірақ сөйлескеннен кейін мен олардың қандай жағдай болса да, мені әлі де жақсы көретінін және үйге оралуымды күтетінін түсіндім. Иә, мен олардың үмітін ақтай алмадым, енді көп нәрсені түзетуім керек. Енді мені күтіп отырған жандар бар екенін білемін, демек, өзгеруге себеп те бар. Осы жолдан абыроймен өтіп, түзелу үшін және отбасыммен мүмкіндігінше тезірек қауышу үшін бар күшімді саламын, — деп бөлісті сотталғандардың бірі.
— Отбасылық байланыстарды қалпына келтіру – сотталғандармен жүргізілетін психологиялық және тәрбиелік жұмыстың маңызды бағыттарының бірі. Туыстарының қолдауы адамның эмоционалдық жағдайына зор әсер етеді, жасаған қылмысының салдарын түсінуге көмектеседі, түзелуге және заңға бағынатын өмір салтына оралуға деген ынтасын нығайтады. Осындай әрбір кездесудің артында мекеме қызметкерлерінің қажырлы еңбегі жатыр. Біздің жұмысымыздың адамдарға үміт пен өзіне деген сенімді қайта табуға көмектескенін көру біз үшін ерекше маңызды, — деп атап өтті мекеме психологы Құралай Иксанова.
Абай облысындағы ҚАЖ жүйесінің әйелдер мекемесінде Семей қаласының қалалық мәдениет үйі жанындағы «Шамшырақ» ансамблінің қатысуымен концерттік бағдарлама өтті. Шығармашылық кездесу сотталған әйелдерге рухани-адамгершілік қолдау көрсетуге, мәдени құндылықтарды дәріптеуге және жағымды орта қалыптастыруға бағытталған мәдени-тәрбие жұмысы аясында ұйымдастырылды.
Семей қаласының қалалық мәдениет үйі жанынан құрылған «Шамшырақ» ансамблі жиырма жылдан астам уақыт бойы белсенді шығармашылық қызмет атқарып келеді. 2001 жылы құрылған ұжым көзі көрмейтін және көру қабілеті төмен азаматтарға мәдени-ағартушылық бағытта қызмет көрсетіп, дарынды орындаушылардың басын біріктіріп келеді. Ансамбль өнердің шекарасы жоқ екенін өз шығармашылығы арқылы дәлелдеп отыр.
Сотталған әйелдерге арналған концерттік бағдарламаға қазақ композиторларының халық әндері, патриоттық және эстрадалық шығармалары енді. Әртістердің шынайы орындауы, жылы атмосфера мен көрермендермен еркін қарым-қатынасы көпшіліктің көңілінен шықты. Әрбір ән ұзақ қол шапалақтаумен сүйемелденіп, көрермендердің арасында таныс әуендерге қосылып ән айтқандар да болды.
— Мұндай концерттер адамға үміт сыйлап, күнделікті уайымнан аз уақыт болса да арылуға көмектеседі. Бүгінгі өнер көрсету бізге ерекше әсер қалдырды. Біз өзімізге деген ықылас пен қолдауды сезіндік. Осындай кездесулер мейірімділік, музыка және адамға деген жанашырлықтың жақсы жаққа өзгеруге шабыт бере алатынын еске салады, — деп бөлісті сотталған әйелдердің бірі.
— Біздің ұжым музыка арқылы адамдарға жарық, үміт пен рухани қолдау сыйлау мақсатында құрылған. Өнер адамдарды біріктіріп, шабыттандырып, өмірдегі қиындықтарды еңсеруге көмектесетініне сенімдіміз. Бүгін біз үшін қолдауға және болашаққа деген сенімге мұқтаж жандарға жүрек жылуын сыйлау ерекше маңызды. Егер біздің шығармашылығымыз ең болмағанда бір адамның үмітін оятып, өмірін өзгертуге деген ынтасын арттырса, онда мақсатымызға жеткеніміз, — деп атап өтті «Шамшырақ» клубының негізін қалаушы Марат Әлиасқар.
Іс-шара соңында мекеме әкімшілігі шығармашылық ұжымға жоғары орындаушылық шеберлігі, жанашырлығы және мәдени-тәрбие жұмысына қосқан үлесі үшін алғыс білдірді.
Осындай мәдени іс-шараларды өткізу сотталғандардың рухани дамуына, ізгілік құндылықтарын қалыптастыруға ықпал етіп, олардың қоғамға қайта бейімделу үдерісінің маңызды бөлігі болып табылады.
Абай облысы бойынша Қылмыстық-атқару жүйесінде ҚАЖ ардагері, әділет майоры Адлет Мұсратұлы Рахимжановтың құрметіне арналған шағын футболдан турнир өтті. Спорттық іс-шара ҚАЖ қызметкерлерін, қызмет ардагерлерін және өмірін заңға адал қызмет етуге арнаған азаматтың туған-туыстарын біріктірді.
Адлет Мұсратұлы Рахимжанов ҚАЖ органдарындағы қызметін 2001 жылы Шығыс Қазақстан облысы бойынша ҚАЖ басқармасының ОВ-156/18 мекемесінде сотталғандар арасында тәрбие жұмысын жүргізу бөлімінің жасақ бастығы лауазымынан бастаған. Мінсіз қызмет еткен жылдары ол түрлі басшылық лауазымдарда еңбек етіп, кәсіби жолдан өтті. Ал 2016 жылы Шығыс Қазақстан облысы бойынша ҚАЖ департаментіне қарасты ОВ-156/16 мекемесінің бастығы болып тағайындалды.
2020 жылы Адлет Мұсратұлы еңбек демалысына құрметпен шықты. Өкінішке қарай, 2021 жылы өмірден өтті. Артында принципшіл басшы, дана тәлімгер және жоғары адамгершілік қасиеттерімен ерекшеленген азамат ретінде жарқын естелік қалдырды.
Бүгінде әке жолын оның ұлы Азамат Адлетұлы Мұсратов жалғастырып келеді. Ол әкесі кезінде басшылық еткен сол мекемеде бақылаушылар қызметі бөлімінің бақылаушысы болып қызмет атқарады. Бұл — ұрпақтар сабақтастығы мен таңдаған мамандыққа адалдықтың жарқын үлгісі.
Турнирге Абай облысы бойынша ҚАЖ департаментінің, пробация қызметінің және №19, №20, №21 мекемелердің атынан бес команда қатысты.
Іс-шараның құрметті қонақтары қатарында Адлет Мұсратұлының анасы, жұбайы Жазира Рахимжанова, әпкесі, басқа да туыстары, ҚАЖ ардагерлері мен мекеме қызметкерлері болды.
Жарыс қорытындысы бойынша бірінші орынды Абай облысы бойынша ҚАЖ департаментінің командасы иеленді. Екінші орынға №20 мекеменің командасы ие болса, үшінші орынды №19 мекеменің командасы қанжығасына байлады.
— Отбасымыз үшін Адлет Мұсратұлы туралы естеліктің әріптестері мен достарының жүрегінде сақталғанын көру — үлкен мәртебе. Ол әрдайым өз жұмысына бар күш-жігерін арнап, ұжымның жағдайына шын жүректен алаңдайтын және қызметін өзінің өмірлік жолы деп білетін. Оны еске алып, отбасымызға көңіл бөліп, қолдау көрсетіп отырған ҚАЖ басшылығы мен қызметкерлеріне алғысымды білдіремін. Біз үшін бұл өте қымбат, — деп бөлісті Жазира Рахимжанова.
— Адлет Мұсратұлы жоғары кәсібилігімен, әділдігімен және қызметіне шынайы берілгендігімен ерекшеленген басшы болды. Ол көптеген қызметкерлерге тәлімгер болып, ҚАЖ тарихында өзіндік із қалдырды. Осындай турнирлер қызметіне адал еңбек етіп, жүйенің беделін арттыруға үлес қосқан азаматтардың есімін ұмытпай, олардың өнегесін сақтауға мүмкіндік береді. Сонымен қатар жас қызметкерлердің өз мамандығына деген құрметін арттырып, ұрпақтар сабақтастығы мен командалық рухты қалыптастыруға ықпал етеді. Бұл турнир тек спорттық жарыс қана емес, сонымен қатар адалдығы, кәсібилігі мен адамгершілік қасиеттері бүгінгі қызметкерлерге үлгі болып отырған ҚАЖ ардагерлеріне деген құрметтің белгісі болды, — деп атап өтті мекеме бастығының міндетін атқарушы Рүстем Берлібеков.
Абай облысындағы ҚАЖ жүйесінің әйелдер мекемесінде қазақ халқының бай рухани мұрасын, ұлттық мәдениеті мен ғасырлар бойы қалыптасқан дәстүрлерін дәріптейтін Ұлттық домбыра күніне орай салтанатты іс-шара өтті.
Іс-шара барысында қатысушылар домбыраның шығу тарихы, оның қазақ халқының өміріндегі ерекше орны және күй өнерінің бірегей музыкалық мұра ретіндегі маңызы туралы әңгімеледі. Қазақтың белгілі күйші-композиторларының халық тарихын, салт-дәстүрі мен дүниетанымын бейнелейтін шығармалары орындалды. Мерекелік шара қатысушыларға ұлттық өнермен жақынырақ танысып, қазақ мәдениетінің басты символдарының бірі — домбыраның құдіреті мен терең үнін сезінуге мүмкіндік берді.
Іс-шараға түрлі ұлт өкілдерінен құралған 20-дан астам сотталған әйел қатысты. Олардың қатарында қазақ, орыс және өзбек ұлтының өкілдері бар.
Мекемедегі тәрбие жұмысының маңызды бағыттарының бірі — тұрақты жұмыс істейтін домбыра үйірмесі. Үйірмені орындаушылық шеберлігі жоғары сотталған әйел басқарады. Оның жетекшілігімен қатысушылар ұлттық аспапта ойнаудың қыр-сырын үйреніп, дәстүрлі күйлерді меңгереді, шығармашылық қабілеттерін дамытып, қазақ халқының рухани құндылықтарына жақындай түседі.
Іс-шара барысында үйірме қатысушылары күйлер мен халықтық музыкалық шығармаларды орындап, домбырада ойнау дағдыларын көрсетті. Олардың өнері жиналғандардың қызығушылығын оятып, жылы қошеметке бөленді.
— Мен үшін домбыра тарту қазақ мәдениетінің байлығын жаңаша тануға мүмкіндік берді. Әр сабақ жан тыныштығын табуға, шығармашылық тұрғыдан дамуға және ұлттық дәстүрлерге құрметпен қарауға көмектеседі. Осындай үйірменің мүшесі болғаныма қуаныштымын. Мұндай іс-шаралар рухани құндылықтарымызды еске салып, жақсы жаққа өзгеруге ынталандырады, — деп бөлісті сотталған әйелдердің бірі.
— Ұлттық домбыра күні — әртүрлі ұлт пен ұрпақ өкілдерін ортақ рухани құндылықтар төңірегіне біріктіретін мереке. Мекемеде осындай іс-шараларды өткізу Қазақстанның мәдени мұрасын сақтауға, ұлттық дәстүрлерге құрметпен қарауды қалыптастыруға, сотталғандардың шығармашылық қабілеттерін дамытуға және өзара түсіністікті нығайтуға ықпал етеді. Өнер мен мәдениет арқылы тұлғаның рухани дамуына және сотталғандардың қоғамға қайта бейімделуіне жағдай жасаймыз, — деп атап өтті мекеме бастығының орынбасары Ақмарал Қайранова.
38 жастағы Семей қаласының тұрғыны қаладағы кафелердің бірінде таныс қыздарымен бірге демалып отырған. Компания есеп алғаннан кейін, оны кім төлейтіні туралы олардың арасында дау туындаған. Сөзге келіскен жанжал көп ұзамай төбелеске ұласып, ер адам қыздардың біріне дене жарақатын келтірген.
Сот оны кінәлі деп танып, 60 сағат көлемінде қоғамдық жұмысқа тарту түріндегі жаза тағайындады.
Жазасын өтеу үшін сотталған азамат Семей қаласы Абай ауданының пробация қызметіне есепке қойылды. Пробация қызметінің мамандары онымен профилактикалық әңгіме жүргізіп, жазаны өтеу тәртібі мен талаптарын түсіндірді, сондай-ақ белгіленген талаптарды орындамаған жағдайда жауапкершілікке тартылатыны туралы ескертілді.
Қоғамдық жұмысты өтеу үшін ер адам қаладағы күзет агенттіктерінің біріне жіберілді. Бүгінгі таңда ол сот белгілеген 60 сағаттың 20 сағатын өтеп үлгерді.
– Қоғамдық жұмыс сотталған адамға қоғамнан оқшаулаусыз жаза өтеуге және жасаған әрекетінің салдарын түсінуге мүмкіндік береді. Пробация қызметінің міндеті – жазаның орындалуын бақылау, сондай-ақ сотталғандармен профилактикалық жұмыстар жүргізіп, олардың алдағы уақытта осындай құқық бұзушылықтарға жол бермеуіне ықпал ету, – деді Семей қаласы Абай ауданы пробация қызметі бөлімінің бастығы Жанар Накишева.
Абай облысы бойынша ҚАЖ департаменті ІІМ-нің ағымдағы жылғы 26 наурыздағы №218 «Қазақстан Республикасы Ішкі істер органдары қызметкерлерін жоспардан тыс аттестаттаудан өткізу қағидаларын бекіту туралы» бұйрығы шеңберінде (бұдан әрі – бұйрық) жоспардан тыс аттестаттауды өткізу туралы хабарлайды.
Мақсат – қызметкерлерді жоғары тұрған басшылық лауазымдарға ұсыну бойынша таяу тоқсанға кадрлық жоспарлау.
2022 жылғы 29 қыркүйектегі №773 ІІМ бұйрығына сәйкес лауазымдарды атқаратын қызметкерлер Министрдің, министр орынбасарының номенклатурасына, сондай-ақ Министрліктің есепке алу-бақылау номенклатурасына жататын және жоспардан тыс аттестаттаудан өтуге ниет білдірген хабарландыру жарияланған сәттен бастап бес жұмыс күнінен кешіктірмей Абай облысы бойынша ҚАЖ департаментіне үлгіге сәйкес баянат және «Документолог» жүйесі арқылы қалыптастырылған қызметтік тізім береді.
Жоспардан тыс аттестаттауға қызметкерлер жіберілмейді:
1) басшылық лауазымдарға қойылатын ең төменгі біліктілік талаптарына сәйкес келмейтін (ІІМ-нің 2020 жылғы 12 маусымдағы №463 бұйрығы).
2) қолданыстағы тәртіптік жазалары бар;
3) оларға қатысты қызметтік не сотқа дейінгі тергеп-тексерулер жүргізіліп жатқан қызметкерлер.
Біліктілік талаптары:
Нақты лауазымның функционалдық бағыттарына сәйкес келетін жоғары білімі;
Сұрақтар туындаған жағдайда Абай облысы бойынша ҚАЖ департаментінің тәрбие және кадр жұмысы бөлімшесіне хабарласуға болады, анықтама телефондары: 8 (7222) 35-44-03 (Абай облысы бойынша ҚАЖД), 31-38-16 (№20 мекеме), 30-15-07 (№19 мекеме), 8 (72347) 42-4-41 (№23 мекеме), электрондық мекенжайлар a.uaisova@mvd.gov.kz, d.zhumakhanova@mvd.gov.kz, di.karabaeva@mvd.gov.kz.
Ескертпе: жоспардан тыс аттестаттау нәтижелері жоспарлы аттестаттауды өткізу мерзімдеріне әсер етпейді.
Абай облысы бойынша Қылмыстық-атқару жүйесі департаментінің қауіпсіздігі барынша жоғары мекемесінде сотталғандар арасында ұйымдастырылған жазғы спартакиаданың салтанатты жабылу рәсімі өтті. Бір ай бойы қатысушылар спорттың әртүрлі түрлерінен бақ сынап, күш-жігерін, төзімділігін, спорттық шеберлігі мен жеңіске деген ұмтылысын көрсетті.
Спартакиада бағдарламасына шахмат, үстел теннисі, қол күресі, гір көтеру, шағын футбол, волейбол және «Арқан тарту» ұлттық спорт ойыны енгізілді. Спорттық жарыстарға 25 пен 45 жас аралығындағы 200-ден астам сотталған қатысты.
Бір айға созылған спорттық дода барысында қатысушылар жоғары дайындық деңгейін, ұйымшылдық пен қарсыластарына деген құрметті көрсетті. Жарыс қорытындысы бойынша жекелей және командалық есепте жеңімпаздар мен жүлдегерлер анықталып, салтанатты рәсімде грамоталармен, медальдармен және кубоктармен марапатталды.
Спорттық іс-шаралар сотталғандармен жүргізілетін тәрбиелік жұмыстың аясында ұйымдастырылып, салауатты өмір салтын насихаттауға, дене дайындығын дамытуға, тәртіпті нығайтуға және спортпен тұрақты айналысуға оң ынтаны қалыптастыруға бағытталды.
– Спартакиадаға қатысу біз үшін өзімізді көрсетуге, күшімізді сынауға және уақытты пайдалы өткізуге жақсы мүмкіндік болды. Жарыс кезінде күнделікті қиындықтар ұмытылып, өзіңді жетілдіруге және жақсы дене дайындығын сақтауға деген ынта артады. Ең бастысы – мұндай іс-шаралар қатысушыларды біріктіріп, бір команда болып әрекет етуге үйретеді, – деп өз пікірімен бөлісті сотталғандардың бірі.
– Спорттық іс-шараларды өткізу – тәрбиелік ықпал ету жұмысының маңызды құрамдас бөлігі. Жазғы спартакиада мекемеміздің игі дәстүріне айналды. Мұндай жарыстар тәртіпті нығайтуға, жауапкершілік сезімін, өзара сыйластық пен командалық рухты қалыптастыруға ықпал етеді. Спорт сотталғандардың бос уақытын тиімді ұйымдастыруға мүмкіндік беріп, салауатты өмір салтын ұстануға ынталандырады және ұжымдағы моральдық-психологиялық ахуалдың жақсаруына оң әсер етеді. Алдағы уақытта да мекемеде бұқаралық спортты дамытуға ерекше көңіл бөлетін боламыз. Жазғы спартакиаданың қорытындылануы бір айға созылған спорттық іс-шаралардың жарқын қорытындысы болды, – деп атап өтті сотталғандар арасындағы тәрбие және әлеуметтік-психологиялық жұмыс бөлімінің бастығы Ермек Рахимов.
Абай облысы бойынша ҚАЖ жүйесінің әйелдер колониясында технологиялық колледж түлектеріне диплом табыстау рәсімі өтті. 30-дан астам сотталған әйел оқуын сәтті аяқтап, арнаулы орта білім туралы дипломдарға ие болды.
Білім алушылардың жасы 24 пен 57 жас аралығында. Олар еңбек нарығында сұранысқа ие «Тігінші» және «Аспаз» мамандықтарын меңгерді. Оқу жылы барысында тыңдаушылар теориялық пәндерді оқып қана қоймай, жазасын өтеп болғаннан кейін жұмысқа орналасып, өз бетінше өмір бастауына қажетті практикалық дағдыларды да игерді.
Іс-шараның ерекше сәттерінің бірі — «Тігінші» мамандығы бойынша білім алған түлектердің қолөнер бұйымдарының көрмесі болды. Көрмеге оқу барысында өз қолдарымен дайындаған түрлі бұйымдар қойылды. Әрбір жұмыс олардың кәсіби шеберлігін, шығармашылық ізденісін және таңдаған мамандығына деген жауапкершілігін көрсетті.
— Кәсіби білім алу сотталған әйелдерге жаңа мүмкіндіктер ашады. Біздің міндетіміз — адам жазасын өтеп шыққаннан кейін адал еңбегі арқылы өзін және отбасын қамтамасыз ете алатындай жағдай жасау. Мамандықтың болуы жұмысқа орналасу мүмкіндігін арттырып, әлеуметтік бейімделуге ықпал етеді және құқық бұзушылықты қайталап жасау қаупін төмендетеді. ҚАЖ мекемелерінде кәсіби білім алу сотталғандарды қоғамға қайта бейімдеу үдерісінің маңызды бөлігі болып табылады. Сұранысқа ие мамандықтарды меңгеру оларға бостандыққа шыққаннан кейін жаңа өмірге тезірек бейімделуге, жұмыс табуға және болашағын заңға бағынатын өмір салты негізінде құруға мүмкіндік береді, — деп атап өтті мекеме бастығының орынбасары Анар Сабиева.
— Мен 57 жастамын. Ұзақ уақыт бойы өз әрекеттерімнің салдары туралы ойланбай өмір сүрдім. Менің ұлым, қызым және сүйікті немерелерім бар. Алайда осы жерге келгеннен кейін ғана отбасының, бостандықтың және адал еңбектің қадірін шын түсіндім. Жақында бостандыққа шығамын. Жұмыс істеп, өз еңбегіммен ақша тауып, немерелерімді сыйлықтармен қуантып, олар мақтан тұтатын әже болғым келеді. Осы жерде алған тігінші мамандығым жаңа өмірге бастайтын алғашқы қадамым болатынына сенімдімін, — деді сотталған әйел.
Абай облысы бойынша ҚАЖ жүйесінің қауіпсіздігі барынша жоғары мекемесінде сотталғандардың Қазақстан Республикасының қылмыстық-атқару заңнамасының талаптарына сәйкес туыстарымен және жақындарымен байланыс жасауына мүмкіндік беретін заманауи Jas Tarlan таксофон карталары жүйесі енгізілді.
Жаңа жүйе телефон байланысын пайдалану үдерісін едәуір жеңілдетті. Енді сотталғандардың туыстары таксофон картасының балансын қашықтан толықтыра алады, ал картаны пайдаланушылар электрондық сервис арқылы шоттағы қаражаттың қалдығын өз бетінше бақылап, жүргізілген операциялар тарихын көре алады.
Jas Tarlan таксофон картасы — қылмыстық-атқару жүйесі мекемелерінде телефон байланысын ұйымдастыруға арналған заманауи цифрлық құрал. Сервис қаржылық операциялардың ашықтығын қамтамасыз етеді, қолма-қол ақша беруге қажеттілікті жояды және туыстарына мекемеге жеке келмей-ақ, кез келген уақытта карта шотын толықтыруға мүмкіндік береді.
— Заманауи цифрлық шешімдерді енгізу көрсетілетін қызметтердің сапасын арттыруға бағытталған. Сотталғандардың әлеуметтік тұрғыдан пайдалы байланыстарын сақтауы үшін қолайлы әрі ашық жағдай жасау — қылмыстық-атқару жүйесінің маңызды міндеттерінің бірі. Заманауи сервистерді пайдалану телефон арқылы байланыс жасау үдерісін сотталғандар үшін де, олардың туыстары үшін де барынша ыңғайлы етуге мүмкіндік береді, — деп атап өтті мекеме бастығы Айдын Калелов.
— Мен Алматы қаласының тумасымын. Үйде мені 76 жастағы анам ғана күтеді. Жасына және арақашықтықтың алыс болуына байланысты ол маған ұзақ мерзімді кездесулерге жиі келе алмайды. Сондықтан телефон арқылы байланыс жасау біз үшін өте маңызды. Енді анам менің картамның балансын қашықтан толықтыра алады. Соның арқасында біз бір-бірімізбен жиірек сөйлесуге мүмкіндік алдық. Бұл біздің отбасымыз үшін өте қолайлы, — деп бөлісті сотталған азамат.
Jas Tarlan жүйесінің енгізілуі қылмыстық-атқару жүйесі мекемелерін цифрландыру бағытындағы кезекті қадам болды. Жаңа технология сотталғандардың жақындарымен әлеуметтік тұрғыдан пайдалы байланыстарын сақтауға қолайлы, ашық әрі заманауи жағдай жасауға ықпал етеді. Бұл өз кезегінде олардың әлеуметтік бейімделуі мен қоғамға қайта кірігуінің маңызды факторларының бірі болып табылады.
Абай облысы бойынша ҚАЖ жүйесінің әйелдер колониясында Жарма ауданының прокуроры мен шағын және орта бизнес өкілдерінің қатысуымен дөңгелек үстел өтті.
Кездесудің басты тақырыбы — сотталған әйелдерді жұмыспен қамту және олар үшін жаңа жұмыс орындарын ашу мәселесі болды. Іс-шара барысында кәсіпкерлерді мекемемен бірлесіп жұмыс істеуге тарту мүмкіндіктері және өндірістік қызметті одан әрі дамыту перспективалары талқыланды.
Қазіргі таңда колония аумағында бірінші қажеттілікке арналған тауарлар дүкені, нан-тоқаш өнімдері мен жартылай фабрикаттар өндіретін цех, жылыжай және тігін цехы жұмыс істейді.
Мекемеде 200-ден астам сотталған әйел жазасын өтеп жатыр, олардың 130-ға жуығы еңбекпен қамтылған. Олар киім тігумен, көкөніс өсірумен, нан-тоқаш өнімдері мен жартылай фабрикаттар өндірумен айналысады. Мекемеде өндірілетін өнімдер облыстың түрлі аудандарында сұранысқа ие.
— Бүгінде сотталғандарды жұмыспен қамтумен ғана шектелмей, оларға бостандыққа шыққаннан кейін сұранысқа ие болатын практикалық дағдыларды меңгеруге мүмкіндік беру маңызды. Әрбір ашылған жұмыс орны — адамның қоғамға сәтті бейімделуіне қосылған үлес. Өндіріс көлемін кеңейтіп, сотталған әйелдердің жұмыспен қамтылуын арттыру мақсатында кәсіпкерлермен одан әрі ынтымақтастық орнатуға дайынбыз. Мұндай жұмыстың негізгі мақсаты — сотталғандарға еңбек етуге, кәсіп меңгеруге және жазасын өтеп шыққаннан кейін қоғам өміріне сәтті бейімделуге мүмкіндік беру, — деп атап өтті мекеме бастығының орынбасары Анар Сабиева.
Дөңгелек үстел барысында қатысушылар өндірістің жаңа бағыттарын кеңейту және бизнестің жаңа өкілдерін ынтымақтастыққа тарту перспективаларын да талқылады.
Мұндай жобаларды дамыту қосымша жұмыс орындарын ашуға, сотталған әйелдердің еңбекпен қамтылуын арттыруға және оларды қоғамға қайта оралуға тиімді дайындау үшін қажетті жағдай жасауға мүмкіндік береді.