ҚР Денсаулық сақтау министрлігі: Қызылорда маңында көлік апатынан зардап шеккен адамдардың денсаулығы дәрігерлердің жіті бақылауында

3 желтоқсанда таңертең Құмкөл-Қызылорда бағыты бойынша келе  жатқан жолаушылар автобусы Қызылорда қаласынан 70 шақырым жерде көктайғақ салдарынан жол апатына ұшырады. Көліктің ішінде  36 адам болған.

Оқиға орнына құрамында реаниматолог және травматологы бар 7 жедел медициналық көмек және санитарлық авиация бригадалары дереу жетті. Зардап шеккен азаматтарға  шұғыл медициналық көмек көрсетілді.

Жол-көлік апаты салдарынан  8 адам қайтыс болды: 7 адам оқиға орнында,  ал қатты жарақат алған 1 адам жедел жәрдем көлігінде көз жұмды.

Зардап шеккен 21 жолаушы  қазір Қызылорда қаласындағы  медициналық ұйымдарға жатқызылды. Оның ішінде 17 адам облыстық көпбейінді ауруханада (5 науқас реанимация бөлімшесінде) жатыр, 4 пациент қалалық ауруханада (1 пациент реанимация бөлімшесінде жатыр).

Барлық пациент дәрігерлердің бақылауында және тиісті ем қабылдауда.  Қажет болған  жағдайда,  санитарлық авиация борты мен мобильдік бригада  науқастарды орталыққа тасымалдауға  дайын  тұр.