Академик Н.Ж. Батпенов атындағы Ұлттық ғылыми травматология және ортопедия орталығының мамандары Қазақстанда ірі буындарды бастапқы эндопротездеу мәселелері және тірек-қимыл аппаратының басқа да аурулары бойынша пациенттерге бейнеконсультация жүргізе бастады.
Эндопротездеу - тірек-қимыл аппараты ауруларын операциялық емдеудің ең заманауи әдістерінің бірі, оның барысында буынды құрайтын патологиялық өзгерген құрылымдар сау буынның анатомиялық пішініне ие және қозғалыстың барлық көлемін орындауға мүмкіндік беретін жасанды протездерге (импланттарға) ауыстырылады.
Буындарды ауыстыру - МӘМС жүйесінің қаражаты есебінен қазақстандық азаматтар үшін қолжетімді, қымбат тұратын операциялардың бірі. Ірі буындарды ауыстыру бойынша кезекке тұру - бастапқы медициналық ұйым арқылы еліміздің кез келген жерінен Қазақстан азаматтары үшін қолжетімді болды.
"Карантин біздің өмірімізге жаңа шындықты енгізді - қашықтан жұмыс істей білу және онлайн режимінде медициналық кеңес беру. Енді біздің көптеген пациенттеріміз үшін өз ауданынан Астанаға бару мәселесі шешілді, өйткені олар көбінесе қозғалыс кезінде ауырсынудан қиналады. Пациент біздің мамандардан консультацияны, қорытындыны бірден электронды түрде алады, өтініш беру себебін көрсете отырып, порталда тіркеледі және емдеуге жатқызу күнін күтеді", - деп, эндопротездеу мәселелері жөніндегі бөлімшенің меңгерушісі Тимур Байдалин жаңалықтар туралы мәлімдеді.
Еліміздің бас травматолог-ортопедтерімен байланысу бейнесеансы WhatsApp қосымшасы арқылы өтеді.
Академик Н. Ж. Батпенов атындағы травматология және ортопедия ғылыми орталығына ТМД-ның басқа елдерінен бірден бірнеше буыны, тізе және ұршық буындары бұзылған, бірнеше жылдар бойы төсек тартып жатқан, әртүрлі ауыр патологиялары бар адамдар әкелінеді. Орталық дәрігерлері кезең-кезеңімен үш-төрт операция жасайды, содан кейін адам аяққа тұрып, жүре бастайды.
Эндопротездеуден басқа, дәрігерлер омыртқа бағанының деформациясы, спорттық жарақаты, артроскопия, қол ұшы жарақаты, кеуде қуысының деформациясы, аяқ пен аяқ басының деформациясы, сынықтар және олардың салдары, дұрыс бітіспеген сынықтар, жалған буындар және тірек-қимыл аппаратының басқа аурулары бар пациенттерге кеңес береді.
Онлайн консультациясына өтінім беру үшін орталықтың сайтында сұрау қалдыру немесе +7 778 640 66 99 WhatsApp нөміріне хабарлама жіберу жеткілікті.