Жаңа оқу жылының қарсаңында көптеген ата-аналар мектеп сөмкесін сатып алу мәселесіне алаңдаулы.
Сөмке таңдаудың негізгі ережелерін бірге қарастырайық.
Мектеп сөмкесі – бұл жай ғана кітаптар мен дәптерлерді тасымалдауға арналған аксессуар емес.
Бұл – оқушының жайлылығы, денсаулығы мен тіпті көңіл-күйі тікелей байланысты болатын мектеп өмірінің маңызды бір бөлігі.
Әсіресе бастауыш және орта буындағы оқушылар үшін сөмке таңдау – өте маңызды мәселе. Дұрыс таңдалмаған сөмке баланың тез шаршауына, арқа ауруларына және тіпті омыртқа қисықтығына әкелуі мүмкін.
Сол себепті, мектеп сөмкесін таңдау – аса жауапты іс, және ол арнайы талаптар мен ережелерді білуді қажет етеді.
Мектеп сөмкесін таңдаудағы негізгі ұсынымдар өте қарапайым.
Ең алдымен, сөмкенің салмағына назар аудару қажет: бастауыш сынып оқушыларына арналған сөмкелердің салмағы 700 грамнан аспауы керек, орта және жоғары сынып оқушыларына арналған сөмкелердің салмағы 1000 грамнан аспауы тиіс.
Бастауыш сынып оқушыларына арналған сөмкелерде тығыз, пішінін сақтайтын арқасы және кең иықбаулары болуы тиіс. Бұл салмақтың тең бөлінуіне көмектеседі.
Сөмкенің ені баланың иығының енінен аспауы тиіс. Сөмкенің төменгі бөлігі бел сызығынан жоғары болмауы қажет.
Ортопедиялық арқасы бар, анатомиялық пішінді модельдерді таңдаған жөн. Арқасы торлы қабатпен қапталғаны дұрыс — бұл желдетуге көмектеседі. Белдік бауының болуы ұсынылады.
Сөмкенің өлшемі:баланың иығынан биік болмауы,белінен төмен түспеуі керек,бастауыш сынып оқушылары үшін оңтайлы биіктігі 30–36 см.
Сөмке контрастты түстерден, берік әрі жеңіл, ылғал мен ластануға төзімді материалдардан тігілгені дұрыс.
Сөмкенің алдынғы және жоғары бөліктерінде жарық шағылдырғыш элементтері болғаны жөн – бұл қараңғыда баланың қауіпсіздігін арттырады.
Бірнеше бөлік пен қалта – баланың заттарын дұрыс ұйымдастыруына мүмкіндік береді.
Сөмкенің таңбалануында пайдаланушының жасы көрсетілуі тиіс.