Сколиоз - омыртқаның бір бүйірге қарай қисаюы және омыртқа пішінінің өзгеруі. Сколиоздың туылғаннан болатын және жүре пайда болатын түрлері болады.
Жүре пайда болған сколиоз келесідей себептерден пайда болуы мүмкін: омыртқа бойында орналасқан бұлшық еттердің әлсіз болуы; сүйек және бұлшықет жүйесінің дұрыс дамымауы; ауыр рюкзактар мен сөмкелерді бір иықта асып жүру; қозғалыстың аздығы және қозғалыссыз өмір салты; столда және мектеп партасында қисайып отыру; дұрыс тамақтанбау және дәрумендер жетіспеушілігі; омыртқа, жамбас, дененің төменгі бөлігінің жарақаттары.
Сколиоздың белгілері:
- иықтардың біркелкі болмауы (бір жаққа қарай қисаюы);
- бір жауырынның екінші жауырыннан жоғары болуы;
- белдің біркелкі болмауы;
- бір жамбастың екінші жамбастан жоғары болуы.
Сколиоздың алдын алу жолдары бойынша ата-аналарға мына кеңестерді ұсынамыз:
- Балаңыздың мүсінін, омыртқа жотасына күш түспеуін сәби кезінен қадағалаңыз.
- Балаңыздың жүріс-тұрысын, омыртқа жотасын түзу ұстауын, бойында көзге көрінетіндей қаңқа өзгерісі бар-жоғын қадағалаңыз;
3. Баланың бір иығы екінші иығынан жоғары тұрған жоқ па, соған мән беріңіз;
4. Сабақта партаның немесе компьютердің алдында отырғанда түзу отыру керектігін ескертіңіз, оқу кезінде денені дұрыс ұстау қажет;
- Ауыр жүк көтертпеңіз, мектепке баратын сөмкесі ауыр болмауы керек, бір жақ иығына емес, арқасына іліп жүретін сөмке алғандарыңыз абзал;
- Мектеп жасына дейінгі және мектеп жасындағы балалар үшін отыратын, сабақ оқитын үстелі мен орындығы бой – жас ерекшеліктеріне сәйкес болуы тиіс;
- Баланың дұрыс тамақтануы, ұйқыны жеткілікті мөлшерде ұйықтау және таңғы жаттығу жасау маңызды.