Қазақстан Республикасы Орталық Азия елдері арасында 15 жастан бастап алкогольді тұтыну көрсеткіші бойынша бірінші, сондай-ақ Біріккен Ұлттар ұйымының деректеріне сәйкес алкогольдік өлім-жітім деңгейі ең жоғары елдер рейтингінде 10-шы орынды алады. Ал, Energyprom.kz мониторинг агенттігінің мәліметтері бойынша 2020 жылы арақ және ликер-арақ өнімдері алдыңғы жылдарға қарағанда 20% - ға артық сатылған. Бір жыл ішінде ішкі нарықта тұтыну 21,5% - ға өскен (қаңтар-қараша 35,7 млн.литрге дейін) екен. Бұл коронакризис кезеңінде қазақстандықтардың алкогольді ішімдіктерді көбірек қолдануын көрсетеді. Бұған себеп WhatsApp және басқа да әлеуметтік желілерден таралған "Алкоголь ағзаны әртүрлі вирустардан қорғайды" деген "кеңестер" шығар.
Былтырғы жылы емдеу-алдын алу ұйымдарының деректері бойынша облыста спирттік ішімдіктерді шектен тыс пайдалану салдарынан 14 өлім-жітім жағдайы тіркелген.
Осындай қайғылы жағдайлардан сақтану үшін, өз жағымыздан дәрігерлердің кеңестерін ұстануға шақырамыз. Өйткені, басы –«вирустан қорғану болса», ал соңы - емделуі қиын маскүнемділік. Алкоголь вирустан қорғайды деген сөзді жоққа шығаратын бірнеше дәлелдерге құлақ асыңыз:
1) алкоголь бауырдың, асқазанның, ағзадағы зат алмасу жүйесінің функцияларын және басқа да функцияларды бұза отырып, орталық жүйке жүйесіне және мидың қызметіне теріс әсер етеді;
2) оны үзбей қолдану қанның ұюын және ми тамырларының бітелуін тудырады, осындай асқынуларды COVID-19 да шақырады, ал бұл науқастың жағдайын мүлде ушықтырады;
3) ағзаның иммундық жүйесін әлсіретеді, жұқпалы ауруларға төзімділік төмендейді, инфекцияны жұқтыру қаупі артады.
Маскүнемділік емделуі қиын, науқастың өзіне, оның отбасы, жақындарына және қоғамға тигізетін зардабы зор дерт екені бәрімізге мәлім. Қазіргі таңда ер азаматтардан басқа, қоғамның маңызды проблемасы – жасөспірімдердің, әйел азаматтардың ішімдікке салынуы. Жас ұрпақ біздің болашағымыз, әйел адам - отбасының ұйытқысы - Ана. Онда осы бір маңызы зор түсініктерге көбірек көңіл бөліп, ішімдіктен бас тартайық!