Инфекциялық бақылау — медициналық ұйымдарда инфекциялардың таралуының алдын алуға бағытталған шаралар жүйесі. Ауруханаішілік инфекциялар (АІИ) медициналық көмек көрсету барысында пайда болуы мүмкін, науқастардың жағдайын нашарлатып, емдеу ұзақтығын арттырады. Сондықтан инфекциялық қауіпсіздік талаптарын сақтау өте маңызды.
Инфекцияның алдын алудың ең тиімді әдістерінің бірі — қол гигиенасын сақтау. Қолды уақтылы және дұрыс өңдеу инфекцияның таралу қаупін айтарлықтай төмендетеді. Сонымен қатар жеке қорғаныш құралдарын (маска, қолғап, халат, қорғаныш көзілдірігі) дұрыс пайдалану қажет.
Инфекциялық бақылаудың негізгі элементтеріне медициналық бұйымдарды сапалы дезинфекциялау және стерилизациялау, беткейлерді жүйелі түрде өңдеу, желдету жүйесінің дұрыс жұмыс жасауы, санитариялық режимді сақтау және медициналық қалдықтарды қауіпсіз басқару жатады.
Инфекциялық бақылау талаптарын сақтау инфекциялардың таралу қаупін азайтып, медициналық көмектің сапасын арттыруға және халық денсаулығын қорғауға мүмкіндік береді.