Түркістан облысының білім саласында сапаны қамтамасыз ету департаменті білім беру ұйымдарымен лицензиялау мәселелері бойынша түсіндіру жұмыстарын жалғастыру мақсатында Мақтаарал ауданында кезекті кездесу өткізді. Кездесуге Департамент басшысы К.Ауанасова, лицензиялау бөлімінің басшысы С.Пахымбет, Мақтаарал ауданы білім бөлімінің басшылығы, аудандық төтенше жағдайлар басқармасының, санитариялық-эпидемиологиялық қызметтің және Түркістан облысы Білім басқармасы жанындағы Білімді дамыту орталығының өкілдері, сондай-ақ аудандағы мектепке дейінгі ұйымдардың басшылары қатысты.
Кездесудің күн тәртібі: аудандағы мектепке дейінгі ұйымдардың 2027 жылғы мемлекеттік лицензиялауға дайындығы мәселесіне арналды. Қатысушыларға Қазақстан Республикасы заңнамасының лицензиаттарға қоятын талаптары, рәсімнен өту тәртібі мен мерзімдері, сондай-ақ лицензиясыз білім беру қызметін жүзеге асырудың салдары түсіндірілді.
Департаменттің лицензиялау бөлімінің басшысы С.Пахымбет «E-license» ақпараттық жүйесінде өтінішті тіркеуден бастап нәтиже алуға дейін жұмыс істеу тәртібін көрсетті. Құжаттардың мазмұнына қойылатын талаптарға және өтініштердің пысықтауға қайтару кезіндегі жиі кездесетін себептерге ерекше назар аударылды.
Уәкілетті органдар тарапынан мектепке дейінгі ұйымдардың ғимараттарына, үй-жайларына және тамақтандыруды ұйымдастыруға қойылатын өрт қауіпсіздігі талаптары мен санитариялық-эпидемиологиялық нормалар жеткізілді.
Кездесу белсенді өтті. Жекеменшік мектепке дейінгі білім беру ұйымдарының кәсіпкерлерін толғандыратын көптеген мәселелер талқыланды. Атап айтқанда, өтініштерді қарау мерзімдері, үй-жайлар мен штат кестесіне қойылатын талаптар, ескертулерді жою тәртібі, құжаттарды дайындау кезеңінде кеңес алу мүмкіндігі. Департамент пен уәкілетті органдардың өкілдері көтерілген барлық мәселелер бойынша түсініктеме берді.
Департамент Мектепке дейінгі ұйымдардың басшыларына қазірден бастап біліктілік талаптарына сәйкестігін өзін-өзі бағалауды жүргізуді, анықталған сәйкессіздіктерді жоюды және құжаттарды уақтылы дайындауды ұсынды. Алдағы уақытта Департамент облыс аудандарында осындай кездесулерді өткізуді жалғастыратын болады.
2026 жылғы 15 қазанда Түркістан облысының білім саласында сапаны қамтамасыз ету департаментінің басшысы К.Ауанасова Жетісай ауданының мектепке дейінгі ұйымдарының өкілдерімен кездесу өткізді. Кездесуге аудандық білім бөлімінің басшысы, аудандық төтенше жағдайлар басқармасының, санитарлық-эпидемиологиялық қызметтің өкілдері және Түркістан облысы Білім басқармасына қарасты Білім беруді дамыту орталығының маманы қатысты.
Кездесу Қазақстан Республикасы заңнамасының талаптарын түсіндіру және 2027 жылы мектепке дейінгі ұйымдарды уақтылы лицензиялауды қамтамасыз ету мақсатында ұйымдастырылып, білім беру ұйымдарының білім беру қызметімен айналысуға мемлекеттік лицензия алуға дайындық жұмыстарына арналды.
Кездесу барысында Департаменттің лицензиялау бөлімінің басшысы С.Пахымбет «E-license» ақпараттық жүйесі арқылы құжаттарды тапсыру кезеңдеріне егжей-тегжейлі тоқталып, өтінішті толтыру және растаушы құжаттарды қоса беру тәртібін түсіндірді, сондай-ақ қатысушылардың назарын әрбір кезеңде ең көп жіберілетін қателіктерге аударды.
Уәкілетті органдардың өкілдері өз кезегінде лицензия алудың басты шарттарының бірі болып табылатын өрт қауіпсіздігі және санитарлық-эпидемиологиялық талаптардың сақталуын түсіндірді. Қатысушылар өздерін қызықтырған сұрақтарға жауап алды.
Кездесу қорытындысы бойынша балабақша басшыларына мектепке дейінгі ұйымдардың қызмет жағдайларын біліктілік талаптарына сәйкес келтіруге алдын ала кірісу ұсынылды. Мұндай кездесулер облыстың басқа да аудандарда алдағы уақытта жалғасын табады.
Түркістан облысының мектепке дейінгі ұйымдарын алдағы лицензиялауға қатысты ақпараттық қолдау көрсету және түсіндіру жұмыстарын жүргізу мақсатында Білім беру саласында сапаны қамтамасыз ету департаменті мектепке дейінгі ұйымдардың басшылары мен өкілдері арасында ақпараттық-түсіндіру жұмыстарын жүргізуде.
Осы бағыттағы кезекті кездесу Департаменттің ұйымдастыруымен өтті. Жиынға Түркістан қаласындағы жекеменшік балабақшалардың өкілдері, санитариялық-эпидемиологиялық қызметтің, Төтенше жағдайлар департаментінің және «Атамекен» өңірлік кәсіпкерлер палатасының өкілдері қатысты.
Кездесу барысында Лицензиялау бөлімінің басшысы С.С. Пахымбет білім беру қызметіне мемлекеттік лицензия алу үшін өтініш дайындау және оны беру тәртібі бойынша таныстырылым өткізді. Қатысушыларға лицензиялау кезеңдері, құжаттарды ұсыну тәртібі, лицензия алуға үміткерлерге қойылатын талаптар және рұқсат беру құжатын алу үшін өтуге қажетті рәсімдер жан-жақты түсіндірілді.
Білім беру саласындағы заңнама талаптарын, санитариялық-эпидемиологиялық және өрт қауіпсіздігі талаптарын сақтау, сондай-ақ құжаттарды алдын ала дайындау және мектепке дейінгі ұйымдардың қызметін белгіленген талаптарға сәйкестендіру мәселелеріне ерекше назар аударылды.
Уәкілетті органдардың өкілдері қатысушылардың сұрақтарына жауап беріп, өз құзыреті шегінде қажетті түсініктемелер берді.
Департамент мектепке дейінгі ұйымдардың басшыларына лицензиялау талаптары туралы ақпараттандыру деңгейін арттыру және тиісті рәсімдерден өтуге дайындық барысында әдістемелік қолдау көрсету мақсатында облыс көлемінде ақпараттық-түсіндіру жұмыстарын жалғастырады.
Ұстаз — бұл жай ғана мамандық емес, бар ғұмырын өскелең ұрпақтың саналы болашағына арнаған асқақ миссия.
Мемлекет басшысы Қасым-Жомарт Кемелұлы Тоқаев педагогтердің қоғамдағы айрықша орнына ерекше мән беріп, ұстаз мәртебесін көтеру мен олардың құқығын қорғауды маңызды басымдық ретінде айқындап келеді.
Осы бағытта Қазақстан Республикасы Оқу-ағарту министрлігі де педагогтерді қолдауға бағытталған жүйелі жұмыстарды жүзеге асыруда. Атап айтқанда, ұстаздарды өз міндетіне жатпайтын жұмыстарға тартуға жол бермеу, олардың құқықтарын қорғау, кәсіби біліктілігін тегін арттыруға мүмкіндік жасау, үздік педагогтердің еңбегін ынталандыру бағытында нақты шаралар т.б. қолға алынған.
«Педагог мәртебесі туралы» заң — ұстаздардың құқығын қорғап, кәсіби тұрғыдан еркін еңбек етуіне берілген нақты кепіл. Ешкімнің де ұстаздың қадіріне тиюге, құқығын шектеуге қақысы жоқ. Себебі ұстаз — қастерлі тұлға!
Ардақты ұстаздар!
Сіздерді кәсіби мерекелеріңіз — Ұстаздар күнімен шын жүректен құттықтаймыз! Отбасыларыңызға амандық, еңбектеріңізге шығармашылық табыс, шәкірттеріңіздің жетістігіне қуанып жүре берулеріңізге тілектеспіз. Мәртебелеріңіз әрқашан биік, еңбектеріңіз ерен болсын!
Оқу-ағарту министрі Жұлдыз Сүлейменова Түркістан облысы әкімінің орынбасары Еркебұлан Дауылбаевпен кездесті. Жиынға облыстық білім басқармасының басшысы Ғалымжан Орынов пен Түркістан облысының білім саласында сапаны қамтамасыз ету департаментінің басшысы Камилла Ауанасова да қатысты.
Мемлекет басшысы Қасым-Жомарт Кемелұлы Тоқаев Тамыз конференциясында Түркістан облысындағы білім сапасына арнайы тоқталып, министрлік пен әкімдіктің бірлесіп жұмыс жүргізуі қажет екенін айтқан болатын. Кездесуде осы тапсырманың орындалуы және өңір мектептеріндегі оқу нәтижелерін жақсарту жолдары талқыланды.
Кездесуде PISA және ҰБТ зерттеулерінің нәтижелері де жеке қаралды. Олардың нәтижелері Түркістан облысындағы білім беру сапасына қатысты елеулі мәселелер бар екенін көрсетеді. Министр қалыптасқан жағдай жүйелі жұмысты және өңірдегі білім алушылардың оқу нәтижелерін жақсартуға бағытталған нақты шараларды талап ететінін атап өтті.
Облыстық білім басқармасы мектептердегі жағдай мен атқарылып жатқан жұмыс туралы мәлімет берді. Білім сапасын қамтамасыз ету департаментінің бағалау нәтижелері де қаралды. Тараптар көрсеткіштері төмен мектептерге қолдау көрсету, педагогтердің кәсіби даярлығын күшейту және оқушылардың білім жетістіктерін жақсарту мәселелеріне тоқталды.
Кездесу қорытындысында министрлік пен облыс әкімдігі анықталған мәселелер бойынша бірлескен жұмысты күшейтуге келісті. Мектептердің оқу нәтижесін жақсартуға бағытталған нақты шаралар өңірдегі білім сапасын арттыру жөніндегі кешенді жоспарда ескеріледі.
21 қыркүйекте Түркістан облысында білім беру және медицина салаларын дамыту бағытындағы Кәсіпкерлер кеңесінің отырысы өтті.
Отырысқа Түркістан облысының білім саласында сапаны қамтамасыз ету департаментінің басшысы қатысты.
Кездесудің негізгі тақырыптарының бірі өңірдегі жекеменшік мектептердің басшылары мен өкілдерімен өзекті мәселелерді талқылау болды. Кәсіпкерлер одан әрі шешуді талап ететін бірқатар мәселелерді, оның ішінде білім беру ұйымдарын қаржыландыру мәселелерін көтерді.
Кездесу барысында Департамент тарапынан өңірдегі жалпы білім беретін мектептердің нақты толымдылығына жүргізіліп жатқан талдау жұмыстары туралы ақпарат берілді. Талдау аудандар мен қалалар бөлінісінде жүргізіліп, оқушы орындары тапшы мектептер, сондай-ақ бос орындары бар білім беру ұйымдары анықталуда.
Осындай алаңдарда жекеменшік мектептердің басшылары мен өкілдерімен тікелей диалог жүргізу өзекті мәселелерді уақтылы анықтауға, сондай-ақ кәсіпкерлік субъектілерінің мемлекеттік органдармен өзара іс-қимылы, бақылау іс-шараларын жүргізу кезіндегі құқықтары мен міндеттері бойынша қажетті түсіндіру жұмыстарын жүргізуге мүмкіндік береді.
Алынған деректер өңірдегі мектеп орындарына деген нақты қажеттілікті объективті бағалауға және жаңа мектептер салудың негізділігін айқындауға мүмкіндік береді.
Білім сапасы – бұл тек оқыту нәтижелері ғана емес, әрбір балаға қажетті жағдай жасау. Сондықтан білім берудің қолжетімділігі мен білім беру инфрақұрылымын тиімді пайдалану мәселелері тұрақты назарды және бірлескен жұмысты талап етеді.
Қазақстан Республикасының «Білім туралы» Заңының 55-1-бабына сәйкес, 2026 жылдың мамыр айынан бастап білім беру ұйымдарында мемлекеттік аттестаттау жаңа форматта жүргізілуде.
Осы Заңға сәйкес Білім беру ұйымдарын мемлекеттік аттестаттаудан өткізу қағидалары бекітілді.
Жаңа форматта жүргізіліп жатқан мемлекеттік аттестаттаудың негізгі ерекшеліктеріне тоқталсақ:
Мемлекеттік аттестаттау білім беру ұйымы ұсынған өзін-өзі бағалау қорытындысы мен құжаттары, Ұлттық білім беру деректер қорындағы, сондай-ақ білім беру ұйымдары пайдаланатын ақпараттық жүйелер мен цифрлық платформалардағы мәліметтер негізінде жүргізіледі. Сонымен қатар мемлекеттік органдардың ақпараттық жүйелері мен ресми интернет-ресурстарындағы ақпараттар да ескеріледі.
Мемлекеттік аттестаттау барысында білім беру ұйымының білім беру қызметінде МЖМБС талаптарын орындауда сәйкессіздіктер анықталса немесе қажетті құжаттар толық ұсынылмаған жағдайда, тиісті хаттама жасалады.
Хаттама негізінде 3 жұмыс күнінен кешіктірмей білім беру ұйымына хабарлама хат жолданады.
Білім беру ұйымы хабарлама хатты алған күннен бастап 5 жұмыс күні ішінде анықталған сәйкессіздіктерді жою жөніндегі іс-шаралар жоспарын әзірлейді және оны Департаментке жолдайды.
Іс-шаралар жоспарында сәйкессіздіктерді жою мерзімі көрсетіледі. Бұл мерзім 3 айдан аспауға тиіс.
Білім беру ұйымы анықталған сәйкессіздіктердің жойылғанын растайтын құжаттар мен материалдарды ұсынғаннан кейін, аттестаттау комиссиясы 10 жұмыс күні ішінде білім беру ұйымына барып, мемлекеттік аттестаттауды жүргізеді.
Бару арқылы жүргізілген мемлекеттік аттестаттау барысында білім беру ұйымында анықталған МЖМБС талаптарындағы сәйкессіздіктер толық жойылған жағдайда, білім беру ұйымы мемлекеттік аттестаттаудан өтті деп танылады.
Ал МЖМБС талаптарын орындаудағы сәйкессіздіктер жойылмаған жағдайда, білім беру ұйымы МЖМБС талаптарына сәйкес емес деп танылады.
Мұндай жағдайда білім беру ұйымына Қазақстан Республикасының Кәсіпкерлік кодексіне сәйкес мемлекеттік бақылау шаралары жүргізіледі.
Профилактикалық бақылау жүргізу барысында МЖМБС талаптарын орындауда бұзушылықтар қайта анықталған жағдайда, білім беру ұйымы келесі күнтізбелік жылдың Тізбесіне енгізіледі.
Жаңа форматтағы мемлекеттік аттестаттаудың басты мақсаты – білім беру ұйымдарының МЖМБС талаптарын сақтауын қамтамасыз ету, анықталған кемшіліктерді дер кезінде жоюға мүмкіндік беру және білім беру сапасын арттыру.
Пленарлық отырыста Қазақстан Республикасының Президенті Қасым-Жомарт Тоқаев білім беру жүйесін дамытудың негізгі басымдықтарын атап өтті.
Олар: білім сапасын арттыру, педагог мәртебесін нығайту, педагог кадрларды даярлауды жетілдіру, өңірлер арасындағы алшақтықты қысқарту, ауыл мектептерін дамыту, балалардың қауіпсіздігін қамтамасыз ету, сондай-ақ жасанды интеллектіні білім беру үдерісіне жауапкершілікпен әрі тиімді енгізу. Мемлекет басшысы адами капиталды дамытуды елдің ұзақ мерзімді ілгерілеуінің маңызды факторы ретінде атап өтті.
Сонымен қатар, Президент ұстаздардың жас ұрпаққа сапалы білім беріп қана қоймай, саналы, озық ойлы және отаншыл ұрпақ тәрбиелеу арқылы бәсекеге қабілетті ұлт қалыптастыруға зор үлес қосып келе жатқандығын ерекше атап өтті.
Оқу-ағарту министрі Ж.Д. Сүлейменова Мемлекет басшысының тұрақты қолдауы мен айрықша назар аударуының арқасында білім беру саласында стратегиялық міндеттерді іске асыру бағытында оң нәтижелерге қол жеткізілгенін атап өтті. Білім сапасын арттыру, педагогтердің кәсіби әлеуетін дамыту, білім беру ұйымдарының материалдық-техникалық базасын нығайту, әрбір балаға тең мүмкіндік жасау және заманауи цифрлық шешімдерді енгізу бойынша жүйелі жұмыс жалғасуда. Алдағы кезеңде Мемлекет басшысы айқындаған міндеттерді, оның ішінде жасанды интеллект мүмкіндіктерін тиімді пайдалану, педагогтер мен білім алушылардың цифрлық құзыреттілігін арттыру және адами капиталды одан әрі дамыту бағыттарын жүйелі түрде іске асыру жалғасады.
Кеңес отырысында білім беру ұйымдары басшыларының педагогикалық әдеп нормаларын сақтауы, педагогикалық әдепті бұзуға ықпал ететін себептер мен жағдайлар, сондай-ақ қолданыстағы заңнама талаптарының орындалуы талқыланды.
Осы ретте, педагогикалық әдеп кеңесі Қазақстан Республикасы Білім және ғылым министрінің 2020 жылғы 11 мамырдағы «Педагогикалық әдептің кейбір мәселелері туралы» № 190 бұйрығының талаптарына сәйкес адалдық, әділдік, жеке тұлғаның абыройын және қадір-қасиетін құрметтеу, патриотизм, жалпы адами құндылықтарды құрметтеу және төзімділік, кәсіби ынтымақтастық, үздіксіз кәсіби даму қағидаттары негізінде жүзеге асырылады.
Осыған байланысты, күн тәртібіндегі мәселелер бойынша қажетті және жеткілікті мән-жайларды жан-жақты, толық және объективті зерттеу үшін әлеуметтік желілерде жарияланған материалдар және педагогтердің құқықтарының бұзылуына қатысты ұсынылған дәлелдер қаралды. Нәтижесінде тәртіптік жауапкершілік мәселесін қарау жөнінде тиісті шешімдер қабылданып, ұсыныстар берілді.
Түркістан облысында «Жаңа халықтық Конституцияның нормалары мен құндылықтары: адами капиталды дамыту – білім беру жүйесінің стратегиялық негізі» тақырыбында педагогтердің тамыз конференциясы өтті.
Конференция тақырыбы Мемлекет басшысы Қасым-Жомарт Кемелұлы Тоқаев айқындаған стратегиялық бағдарларға негізделген. Елімізде білім сапасын арттыруға, адами капиталды дамытуға, ғылым мен инновацияларды қолдауға, сондай-ақ өскелең ұрпақты берік адамгершілік және азаматтық құндылықтар негізінде тәрбиелеуге бағытталған Президенттің тапсырмалары мен бастамалары жүйелі түрде жүзеге асырылуда.
Оқу-ағарту министрлігі білім сапасын арттыру, білім беру үдерістеріне жасанды интеллектіні енгізу және басқа да стратегиялық міндеттерді іске асыру бағытында мақсатты жұмыстар жүргізуде.
Конференция барысында Қазақстан Республикасының Оқу-ағарту министрі Ж.Д. Сүлейменованың бейнеүндеуі тыңдалды. Министр өз сөзінде білім беру жүйесін одан әрі дамытудың өзекті міндеттері мен басым бағыттарына тоқталды. Педагогтерді жаңа оқу жылымен құттықтап, еңбектеріне табыс тілеп, жаңа оқу жылын сәтті бастауға ізгі тілегін білдірді.
Аталған басымдықтар білім беру бағдарламалары мен оқу-тәрбие үдерісінде нақты көрініс табуда. Жаңа Конституцияның нормалары мен құндылықтары білім алушылардың азаматтық ұстанымын және патриотизмін, адам құқықтары мен бостандықтарын құрметтеуін, заңдылық пен әділеттілікті сақтауын, жауапкершілік пен еңбекқорлықты, білімге, ғылыми ізденіске және инновацияларға ұмтылысын қалыптастыруға бағытталған.
Білім беру жүйесі адами капиталды дамытуда және мемлекет пен қоғамның дамуына жауапкершілікпен үлес қоса алатын ұрпақ тәрбиелеуде маңызды рөл атқарады.
Конференция барысында жаңа оқу жылындағы басым міндеттер, білім сапасын арттыру және педагогтердің кәсіби әлеуетін одан әрі дамыту мәселелері талқыланды.
Іс-шара барысында білім беру саласын дамытуға қосқан елеулі үлесі үшін педагогтер мен білім беру ұйымдарының қызметкерлерін марапаттау рәсімі өтті. Облыс әкімі Н.О.Көшеров саланың үздік өкілдеріне «Ерен еңбегі үшін» медалі және «Ы. Алтынсарин» атындағы төсбелгі табыстады.