Бүгін білім беру қызметкерлерінің республикалық тамыз кеңесі басталды.
Іс-шара "Әділ Қазақстан: адал ұрпақ, сапалы білім, табысты ұлт" бастамасымен өткізіледі.
Алматы облысында білім беру қызметкерлерінің республикалық тамыз кеңесі Есік қаласында өтіп жатыр, оған еліміздің басқа өңірлерінен келген педагогтар қатысады.
Тамыз кеңесі аясында "білім беру технологиялары" бағыты бойынша төрт секцияның жұмысы ұйымдастырылған.
Осы секциялардың біріне Алматы облысының білім беру саласындағы сапаны қамтамасыз ету департаментінің басшысы Е. С. Жиренбай қатысуда.
Секция жұмысында сапалы білім берудегі заманауи технологиялардың тиімділігі, білім берудегі биоақпарат пен синергетиканы пайдалану, жаратылыстану пәндерін оқытуда инновациялық тәсілдерді қолдану және т.б. мәселелер қарастырылады.
Бағдарлама бойынша педагогика ғылымдарының докторы, Ы.Алтынсарин атындағы Ұлттық білім академиясының профессоры Караев Ж.А., педагогика ғылымдарының кандидаты, профессор Вассерман Ф. Я., "Назарбаев Зияткерлік мектептерінің" өкілдері, оқу-әдістемелік орталықтардың, мектептердің басшылары, педагогтар сөз сөйлейді.
Іс-шара ертең пленарлық отырыспен жалғасады.