2019 жылы Индустрияландыру бағдарламасы бойынша 120-ға жуық жобаны іске қосу жоспарланған

Бүгін Елбасының қатысуымен өткен ҚР Үкіметінің кеңейтілген отырысында Индустрия және инфрақұрылымдық даму министрі Жеңіс Қасымбек Индустрияландыру бағдарламасын іске асыру барысы туралы хабарлады.

Министрдің мәліметінше, 2018 жылдың қорытындысы бойынша өнеркәсіп 4,1%-ға өсті. Бұл тау-кен секторының 4,6%-ға және өңдеуші өнеркәсіптің 4%-ға озық қарқынмен өсуі есебінен орындалды. Негізгі драйверлер – машина жасау (өсім 14,1%), химия өнеркәсібі (8,1%), мұнай өңдеу (8,1%), жеңіл өнеркәсіп (4,4%) және мұнай мен газ өндіру (4,8%) салалары.

Ж.Қасымбек атап өткендей, өнеркәсіп саласы бойынша өңірлер арасында Атырау, Шығыс Қазақстан, Қостанай, Ақмола облыстары мен Астана қаласы көш бастап келеді.

2018-ші жылдың қорытындысы бойынша өңдеу өнеркәсібінде жұмыс істеп тұрған кәсіпорындардың саны 14,7 мыңға жетті. Жалпы алғанда өнеркәсіп бойынша еңбек өнімділігі 3,5%-ға, негізгі капиталдағы инвестициялар 27%-ға өсті.

Индустрияландыру бағдарламасы бойынша 2010 жылдан бастап жалпы құны 7,9 трлн. теңге болатын 1 250-ден астам жоба іске қосылып, 120 мың тұрақты жұмыс орны құрылды. Ал, 2018-ші жылы құны 1,3 трлн. теңге болатын 100 жоба іске қосылып, 13 мыңнан астам тұрақты жұмыс орны құрылды.

2019 жылы жалпы сомасы 1,1 трлн. теңге болатын 120-ға жуық жобаны іске қосу жоспарланып отыр. Бұл жобалар бойынша 20 мың тұрақты жұмыс орны құрылады.