ҚР ИИДМ басшысы Сауд Арабиясы Корольдігінің Инвестициялар министрімен кездесу өткізді

2021 жылғы 27 қыркүйекте Қазақстан Республикасының Индустрия және инфрақұрылымдық даму министрі Бейбіт Атамқұлов Сауд Аравиясының Инвестициялар министрі Халид бен Абдулазиз әл-Фалихпен кездесті.

Тараптар өңдеу, тау-кен өнеркәсібі, азаматтық авиация, көлік және логистика салаларындағы ынтымақтастық мәселелерін талқылады. Кездесуге қатысушылар екі елдегі эпидемиологиялық жағдайдың жақсаруына қарай сауда-экономикалық, инвестициялық және мәдени ынтымақтастықты одан әрі дамытуға мүмкіндік беретін тікелей әуе рейстерін ашу туралы келісті.

Сондай-ақ, саудиялық тарап қазақстандық кәсіпорындармен бірлесіп жұмыс істеуге мүдделі кейбір өндірістік компанияларды таныстырды.

Қазақстанда инвестициялық ахуалды жақсартуға және әлеуетті инвесторлар үшін қолайлы жағдайлар жасауға ерекше көңіл бөлінеді.

Анықтама:

Қазақстан мен Сауд Арабиясы арасындағы тауар айналымы 2021 жылғы қаңтар-шілдеде 4 млн. АҚШ долларын құрады. Бұл өткен жылдың сәйкес кезеңімен салыстырғанда 36,5% жоғары (3 млн. АҚШ).

2021 жылғы қаңтар-шілдеде Қазақстаннан Сауд Арабиясына экспорт көлемі 2,3 есе өсіп, 1,6 млн АҚШ долларын құрады.

2021 жылғы қаңтар-шілдеде Сауд Арабиясынан Қазақстанға импорт 7,5% артып, 2,4 млн. АҚШ доллары болды.

«SCAT» әуе компаниясы 2021 жылдың қараша айының ортасынан бастап аптасына 1 рейспен Алматы – Джидда бағытында ұшуды жаңғыртуды жоспарлап отыр.