Мұқтаж көрсең жебей жүр
Аудан орталығындағы Т.Жароков атындағы орта мектепте аудандық білім беру бөлімінің ұйымдастыруымен жүрегі мейірімге толы, жаны жайсаң, пейілі кең, жомарт жандарға арналған «Жүрек жылуы» атты қамқоршылық фестивалі оздырылды. Фестиваль Айсель Қанғалиеваның «Жетімнің монологын» мәнерлеп оқуымен ашылды. Одан кейін сөз алған аудандық білім беру бөлімінің әдіскері Әлфия Шайхисламова мен Т.Жароков атындағы мектептің директоры Сержан Қошанов жиналған қауымға ризашылықтарын білдіріп, ауданымыздағы қамқорлықты қажет ететін жандарға қолдан келген көмегін аямай жүрген бір топ азаматтар мен азаматшаларға алғысхаттар табыстады. Кеш мектеп оқушыларының концерттік бағдарламасымен жалғасты. Айшат Хамзина «Перзент парызы», Гүлім Биғали мен Қарлығаш Каримолла «Мама», Жанерке Өтегенова мен Гүлназ Қоңырованың орындауында «Ерке сылқым» күйі, Аружан Сейтқалиева күйсандықта «Поппури», Е.Ниетқалиев атындағы мектеп оқушысы Азамат Шатиков «Жігіттер, ойын арзан, күлкі қымбат» өлеңін оқыса, «Ақмаржан» би ансамблі «Бозінген», Айжан Жұмағалиева және сыныптастары мың бұрала билеп, бір топ мектеп оқушыларынан құралған «Жас өркен» тобы «Аспаптар» әнін шырқап, көрерменнің қошеметіне бөленді.
Г.ҚАБДОЛОВА