Мемлекет қатысатын заңды тұлғалармен жұмыс жөніндегі бөлім туралы ереже

2022 жылғы « 5 » тамыздағы № ЖҚ-11

Батыс Қазақстан облысының мемлекеттік сатып алу және коммуналдық меншік басқармасы басшысының бұйрығына қосымша

 

Мемлекеттік органның құрылымдық бөлімшесі туралы ереже

                                                                                          

1-тарау. Жалпы ережелер

1. Мемлекет қатысатын заңды тұлғалармен жұмыс жөніндегі бөлімі «Батыс Қазақстан облысының  мемлекеттік сатып алу және коммуналдық меншік басқармасы» мемлекеттік мекемесінің құрылымдық бөлiмшесi болып табылады.
2. Құрылымдық бөлiмше өз қызметiнде Қазақстан Республикасының Конституциясын, заңдарын, Қазақстан Республикасы Президентi мен Үкiметiнiң актiлерiн, өзге де нормативтiк құқықтық актiлердi, сондай-ақ осы Ереженi басшылыққа алады.
3. Құрылымдық бөлімшенің құрылымын және штат санын Қазақстан Республикасының заңнамасында белгіленген тәртіппен штат санының лимиті шегінде мемлекеттік органның уәкілетті лауазымды адамы бекітеді.

 

2-тарау. Мемлекеттік органның құрылымдық бөлімшесінің мақсаттары, құқықтары мен міндеттері

4. Мақсаты:

1) облыстық коммуналдық заңды тұлғаларды, сонымен қатар, мемлекет қатысатын заңды тұлғаларды басқаруды қамтамасыз ету;

2) облыстық коммуналдық мүліктің есебін ұйымдастыру.

5. Құқықтары мен міндеттері:

 1) өз құзыреті шегінде Батыс Қазақстан облысының аумағында облыстық коммуналдық мүлікті басқару саласындағы мәселелерді шешу, дамудың негізгі бағыттары жөніндегі ұсыныстарды басқарма басшысының қарауына енгізеді;

2) өз құзыреті шегінде мемлекеттiк органдардың, лауазымды тұлғалардың, ұйымдар мен азаматтардың келісімі бойынша, белгiленген тәртiппен бөлімінің алдына қойылған міндеттерді орындаумен байланысты мәселелер жөніндегі ақпаратты сұратады және алады;

3) өз құзыреті шегінде мемлекеттік органдарда, сотта «Батыс Қазақстан облысының мемлекеттік сатып алу және коммуналдық меншік басқармасы» мемлекеттік мекемесінің мүддесін білдіреді;

4) Қазақстан Республикасының заңнамасымен көзделген өзге де құқықтар мен міндеттерді жүзеге асырады.

6. Функциялары:

1) облыстық коммуналдық заңды тұлғаларды, мемлекет қатысатын акционерлік қоғамдар мен жауапкершілігі шектеулі серіктестіктерді құру, қайта ұйымдастыру және тарату рәсімдеріне қатысады;

2) облыстық коммуналдық заңды тұлғаларды, мемлекет қатысатын акционерлік қоғамдар мен жауапкершілігі шектеулі серіктестіктерді бәсекелес ортаға беру (жекешелендіру), сондай-ақ, оңтайландыру бойынша жұмысты ұйымдастырады;

3) жекешелендіру объектілерін сатып алу-сату шарттары талаптарының орындалуын бақылауды жүзеге асырады;

4) облыстық коммуналдық кәсіпорындардың, мемлекет қатысатын акционерлік қоғамдар мен жауапкершілігі шектеулі серіктестіктердің даму жоспарларының және олардың орындалуы туралы есептерінің мемлекеттік мүлік тізіліміне ұсынылуына мониторингті жүргізеді;

5) облыстық коммуналдық мемлекеттік кәсіпорындардың таза табысының белгіленген бiр бөлiгiнiң, мемлекет қатысатын акционерлік қоғамдардың (жауапкершілігі шектеулі серіктестіктердің) мемлекетке тиесілі акцияларға (жарғылық капиталындағы қатысу үлестеріне) дивидендтердің бюджетке уақытылы және толық аударылуын бақылауды жүзеге асырады;

6) мемлекеттік мүлікті, оның ішінде мемлекеттік кәсіпорындардың басқару тиімділігінің мониторингін жүзеге асырады;

7) Басқарма Ережесіне және Қазақстан Республикасының қолданыстағы заңнама талаптарына сәйкес Басқарма құзыретіне жататын мемлекет қатысатын акционерлік қоғамдар мен жауапкершілігі шектеулі серіктестіктердің қызметіне қатысты мәселелер бойынша жұмысты жүргізеді;

8) қолданыстағы заңнамаға сәйкес коммуналдық мүлікті өтеусіз пайдалануға беру жұмысын жүргізеді;

9) кейіннен сатып алу құқығымен немесе құқығынсыз сенімгерлік басқаруға беру жөніндегі шарттар талаптарының сақталуын бақылауды жүзеге асырады.

10) облыстық коммуналдық мүлік тізілімін жүргізу бойынша жұмысты ұйымдастырады;

11) мемлекеттік мүлік тізіліміне облыстық коммуналдық заңды тұлғалармен мүлікті паспорттау және түгендеу бойынша ақпараттарды енгізуіне мониторингті жүзеге асырады;

12) дүлей зілзалалар мен авариялар салдарынан физикалық немесе моральдық тозуына байланысты жарамсыз болған, облыстық бюджет есебінен ұсталатын мемлекеттік мекемелерге және облыстық коммуналдық мемлекеттік кәсіпорындарға бекітіліп берілген және негізгі құрал-жабдықтарға (активтерге) жататын мемлекеттік мүліктің жекелеген түрлерін есептен шығаруға келісім беру жұмыстарын жүргізеді.

 

3-тарау. Мемлекеттік органның құрылымдық бөлімшесінің қызметін ұйымдастыру

7. Құрылымдық бөлімшенің Қазақстан Республикасының заңнамалық актілеріне, Президентінің актілеріне және Қазақстан Республикасының өзге де нормативтік құқықтық актілеріне сәйкес өз міндеттерін іске асыру үшін қажетті құқықтары мен міндеттері болады.
8. Мемлекеттік органның құрылымдық бөлімшесін Қазақстан Республикасының заңнамасында белгіленген тәртіппен лауазымға тағайындалатын және лауазымнан босатылатын басшы басқарады.
9. Мемлекеттік органның құрылымдық бөлімшесінің басшысы құрылымдық бөлімшенің қызметін жалпы басқаруды жүзеге асырады, оған жүктелген міндеттердің орындалуына және өз өкілеттіктерін жүзеге асыруына дербес жауапты болады.
10. Құрылымдық бөлімшенің басшысы мемлекеттік органның басшылығына құрылымдық бөлімшенің құрылымы мен штат саны жөнінде ұсыныстар береді.
11. Құрылымдық бөлімшенің құзыретіне кіретін мәселелер бойынша мемлекеттік органның құрылымдық бөлімшесінің атынан басқа құрылымдық бөлімшелерге жіберілетін құжаттарға құрылымдық бөлімшенің басшысы, ал ол болмаған жағдайда – оны алмастыратын адам қол қояды.

 

 

Дата публикации

05 августа 2022