БҚО-да кезекте тұрғандар 1813 жер учаскесін алады

БҚО-да 17 көппәтерлі және 139 тұрғын үй құрылысына 21,1 миллиард теңге бөлінді.

Ел Президенті Қазақстан халқына Жолдауында азаматтардың әлеуметтік әл-ауқаты, ең алдымен, тұрғын үй мәселесімен тығыз байланысты екенін атап өтті. Батыс Қазақстан облысында мемлекеттік бағдарламалар аясында да, жеке құрылыс компанияларымен де тұрғындар үшін үйлер белсенді салынуда. Ағымдағы жылы "Нұрлы жер" мемлекеттік бағдарламасы аясында ауылдық жерлерде 17 көппәтерлі тұрғын үйдің (2503 пәтер) және 139 тұрғын үйдің (474 пәтер) құрылысына 21,1 миллиард теңге бөлінді. 2020 жылдың соңына дейін кезекте тұрғандарға және "тұрғын үй құрылыс жинақ банкі"салымшыларына бюджет қаражаты есебінен 1083 пәтер беріледі. Бұл өткен жылмен салыстырғанда 1,8 есе көп пәтер.

"Орал қаласында жүзеге асырылып жатқан ірі жобалардың бірі Ақжайық шағын ауданының құрылысы болып табылады. Қазіргі уақытта инженерлік желілер жүргізілді, тұрғын үй құрылысына алғашқы инвесторлар анықталды. 2021 жылдан бастап аталған ауданда тұрғын үй құрылысы жұмыстары басталады. Бұл өз кезегінде өңірдің құрылыс саласын дамытуға жаңа серпін береді". - деп атап өтті облыс әкімі Ғали Есқалиев.

Батыс Қазақстан облысында тиісті коммуникациялармен қамтамасыз етілген әлеуметтік жеке үйлер салу үшін Орал қаласы мен өңір аудандарында жер учаскелерін беру бойынша жұмыстар жүргізілуде.

"Мысалы, Орал қаласының Круглоозерное кентінде 1 141 учаскені егжей-тегжейлі жоспарлау жоспары аяқталды. Келесі жылы инженерлік-коммуникациялық желілерді өткізгеннен кейін кезекте тұрғандарға жер телімдерін беруді бастаймыз. Сондай-ақ Теректі ауданы Федоровка ауылында 528 жер учаскесі және Қаратөбе ауданында 144 жер учаскесі дайындалды. Бұл жұмыс ауыл тұрғындарының тұрғын үй мәселесін шешуге және ауыл азаматтарының облыс орталығына қоныс аударуын азайтуға мүмкіндік береді", – деп атап өтті Ғали Есқалиев.

Айта кету керек, соңғы рет облыс орталығындағы тұрғын үй құрылысына арналған жер кезекте тұрған азаматтарға 2011 жылы ғана берілген болатын.