Business.enbek.kz порталында (бұдан әрі - Портал) 2023 жылғы 15 мамырдан 26 мамырға дейін 2021-2025 жылдарға арналған кәсіпкерлікті дамыту жөніндегі Ұлттық жоба шеңберінде бизнес-идеяларды іске асыру үшін мемлекеттік гранттар алуға өтінімдер қабылдау басталады.

Мемлекеттік грант – нысаналы мақсаты жаңа бизнесті іске қосу және дамыту болып табылатын өтеусіз берілген бастапқы капитал.

Грант көлемі 400 АЕК-ті (1 380 000 теңге) құрайды.

Өтінім беру үшін қажет:

• Порталда тіркелу;

• грант алу шарттарына сәйкестігіне тексеруден өту;

• бизнес-жоспар үлгісін жүктеп алып, оны толтыру және порталға енгізу;

• өтініш нысанын толтыру және ЭЦҚ кілтімен қол қою.

Интернетке немесе компьютерге қолжетімділік болмаған жағдайда, халықты жұмыспен қамту орталықтарының өзіне-өзі қызмет көрсету аймақтарында, халыққа қызмет көрсету орталықтарында, кәсіпкерлерге қызмет көрсету орталықтарында өтінім беруге болады.

Грант алу үшін бірқатар шарттарды сақтау қажет.

Жаңа бизнес-идеяны іске асыруға мемлекеттік грант алуға үміткер бола алады:

1) Тіркелген жұмыссыздар

2) Жеке кәсіпкерлер (3 жылға дейін)

Сонымен бірге үміткер келесі әлеуметтік санаттардың біріне жату:

1) Мүгедектігі бар адамдар;

2) Кандас қолданыстағы мәртебесі бар адамдар;

3) Қоныс аударушылар және олардың еңбекке қабілетті отбасы мүшелері;

4) Атаулы әлеуметтік көмек алушы аз қамтылған адамдар және олардың отбасы мүшелері;

5) Мүгедек баланы тәрбиелеуші жәрдемақы алатын адамдар (жұбайы, зайыбы);

6) Көп балалы тұлғалар-көп балалы жәрдемақы алушылар (жұбайы, зайыбы);

7) Асыраушысынан айрылу жағдайы бойынша әлеуметтік жәрдемақы алушылар;

Үміткердің «Бастау Бизнес» жобасы бойынша кәсіпкерлік негіздеріне оқыту туралы 3 жылдан аспайтын мерзімге сертификаты болуы тиіс.

Грантты: қажетті құрал-саймандарды, еңбек құралдарын, технологиялық жабдықтарды, малдарды, жануарларды, құстарды, көшеттерді, бұталарды, тұқымдарды сатып алуға, орын-жайларды жалға алу ақысын төлеуге алуға болады.