Алғабас ауылдық округі, Жаңажол елді мекенінде 7 мамыр Отан қорғаушылар күніне орай және Ұлы Жеңістің 81 жылдығына байланысты дала қызықтары ұйымдастырылды.
2026 жылғы 9 мамыр күні Ұлы Жеңіс күніне орай Алғабас ауылдық округінің шаруа қожалықтары мен кәсіпкерлерінің демеушілігімен дала қызықтары ұйымдастырылды.
Ақжайық аудандық балалар-жасөспірімдер спорт мектебінің ұйытқы болуымен "Жыл қорытындысы – 2025" жобасы аясында ауданның озат жас спортшылары марапат биігінен көрінді.
«Үздік спортшы» атағымен Каптула Исмайл, ал «Үміт артар жас спортшы» аталымымен Хамидуллаев Арлан мен Марат Алихан лайық деп танылды. Бұл — тынымсыз еңбек пен табанды жаттығулардың, жігер мен жанкештіліктің жемісі.
Сондай-ақ жас спортшылардың жетістікке жету жолында аянбай тер төгіп, сүбелі үлес қосып жүрген бапкері Мақсат Маратұлы арнайы Алғыс хатпен марапатталды.
Бұл – спорт арқылы ел мерейін үстем ететін ұрпақты тәрбиелеудегі ізгі қадам, келешекке сенім.
Ақжайық аудандық Орталықтандырылған кітапханалар жүйесінің ұйытқы болуымен жүзеге асырылып жатқан «Жетістік пен жұлдызды сәтке – 2025» жобасы аясында ұлттық руханиятты жаңғырту, отбасылық оқу мәдениетін дәріптеу мақсатында мазмұнды шара өткізілді.
Аталған жобада «Отбасылық оқу дәстүрі» номинациясының лауреаты ретінде Алғабас ауылдық кітапхана – комьюнити орталығының белсенді оқырмандары, көпке үлгі болған Ешмұхановтар әулеті лайық деп танылып, марапат биігінен көрінді.
Оқу мен тәрбиені ұштастырып, кітапты отбасының алтын діңгегіне айналдыра білген бұл отбасының еңбегі – өскелең ұрпаққа тағылым, көпшілікке өнеге.
Кітап — ұлттың қазынасы, ал оны көздің қарашығындай сақтап, оқырманға жол тартқызған жан — кітапханашы. Осы асыл мұрат жолында тынымсыз еңбек етіп, руханият көшіне өз үлесін қосып жүрген кітап ордасының шамшырағы Болатова Шынар Маратқызы «Үздік жас кітапханашы» аталымымен «Жыл үздігі – 2025» мәртебесіне лайық деп танылды.
Жас та болса, ісі салиқалы, ниеті берік маманның кітап әлемін дәріптеудегі табандылығы, оқырманмен тіл табыса білетін шеберлігі мен жаңашыл ізденісі көпке үлгі. Рухани мұраға адалдық танытып, сөз киесін ұлықтаған еңбегі ел ықыласына бөленіп отыр.
Бұл марапат — маңдай термен келген мәртебе, ізгі еңбектің айқын жемісі. Кітапқа қызмет етуді ғұмырлық мұрат еткен жас маманға шығармашылық табыс, биік белестер мен толағай жетістіктер тілейміз!
📍 «Заң және тәртіп» бағыты аясында жиын өткізілді
Ауылдық округ аумағында «Заң және тәртіп» идеологиясы шеңберінде тұрғындармен жиын ұйымдастырылды. Кездесу барысында ауыл шаруашылығы жануарларын жаю қағидаларының талаптарын өрескел бұзу фактілері сөз болды.
Қоғамдық тәртіп пен қауіпсіздікті қамтамасыз ету мақсатында мал иелеріне жануарларды қараусыз жібермеу, жылқы малдарына жарық шағылыстырғыш ленталарын ілу, елді мекен ішіндегі жол қозғалысына кедергі келтірмеу, иесіз жайылған малдардың салдарынан туындайтын құқықбұзушылықтардың алдын алу мәселелері жан-жақты талқыланды.
Сонымен қатар құқықбұзушылыққа ықпал ететін себептер мен жағдайларды жою бағытында тиісті шаралар қабылдамау жауапкершілікке әкеп соғатыны ескертіліп, тәртіп пен талапқа бағыну – ортақ міндет екені айтылды.
🛑 Заңнан аттау – елге сын.
Алғабас ауылы тұрғындарының игі ісі
Алғабас ауылының З.Жұбандықов, Бейбітшілік, А.Сапаров, Б.Смайлов, К.Еділбаев көшесінің, Тоған елді мекені тұрғындары ауылдастарының қауіпсіздігі мен жайлылығы үшін ауызбіршілік танытып, өз қаражаттарына 40 көше шамын сатып алып, көше бойына орнатуға демеушілік көрсетті. Қаржы көлемі 644 000тг.
Қазіргі таңда барлық жарық шамдары орнатылып, көше кешкі уақытта жарықтанып, тұрғындар үшін қолайлы жағдай жасалды.
Бұл – ауыл тұрғындарының туған жерге деген жанашырлығы мен бірлігінің көрінісі. Осындай игі істер көпке үлгі болсын!
Алғабас ауылы Б.Смайлов көшесіне 35 рейс (Камаз жүк көлігімен) топырақ төгіліп көше жолын биіктету жұмыстары жүргізілуде. Ұйымдастырушы округ әкімшілігі, демеушілер Б.Смайлов көшесінің тұрғындары. Қаржы көлемі 374000 тг
"Жүрегім – Тоған!"
Бүгін Тоған ауылында ерекше мағынаға ие композиция орнатылды — «Жүрегім Тоған» деген жазу ауыл жастарының бастамасымен жүзеге асты. Қаржы көлемі 550000 тг
Бұл – туған жерге деген шынайы сүйіспеншіліктің, бірліктің және жанашырлықтың көрінісі.
Ауылымыздың көркіне көрік қосқан бұл нысан – келер ұрпаққа ауылын сүюдің жарқын үлгісі болады деп сенеміз.