Баланың құқықтарын, бостандықтары мен заңды мүдделерін бұзу туралы өтініштерді қарау.
Бала құқықтары жөніндегі уәкіл баланың құқықтарын, бостандықтары мен заңды мүдделерін бұзуға қатысты өтініштерді, сондай-ақ баланың құқықтарын, бостандықтары мен заңды мүдделерін бұзатын мемлекеттік органдардың, ұйымдардың, кәсіпорындардың және олардың лауазымды адамдарының шешімдеріне, әрекеттеріне (немесе әрекетсіздігіне) шағымдарды қарайды.
Баланың құқықтары мен заңды мүдделерін бұзу фактілерін анықтау мақсатында Уәкіл келіп түскен өтініштер негізінде де, ал егер бұзушылықтар туралы мәліметтер ресми ақпарат көздерінен немесе бұқаралық ақпарат құралдарынан белгілі болса, өз бастамасы бойынша да өз құзыреті шегінде осындай бұзушылықтар туралы ақпаратқа тексеру жүргізеді.
Өтінішке өтініш беруші немесе оның заңды өкілі қол қоюы және онда тегі, аты, әкесінің аты (бар болса), тұрғылықты немесе жұмыс орны туралы мәліметтер, өтініш берушінің пікірінше, баланың құқықтары мен заңды мүдделерінің бұзылуына алып келген шешімдер, әрекеттер (немесе әрекетсіздік) мәнінің сипаттамасы қамтылуы тиіс. Өтінішке жазылған талаптарды растайтын құжаттар мен өзге де материалдар қоса беріледі.
Өтінішті қарауға қабылдап, Уәкіл:
1. өтініш берушіге баланың бұзылған құқықтарын қорғаудың ықтимал тәсілдері мен тәртібін түсіндіруге;
2. өтінішті мәні бойынша қарау үшін, егер өтініште көтерілген мәселелер құзыретті органдардың қарауына жататын болса, онда оны оларға жіберуге құқылы.