Оқу-ағарту министрлігінің бастамасымен ҮЕҰ-мен балалардың құқықтарын қорғау мәселелері бойынша өзара іс-қимыл және ынтымақтастық жөніндегі кеңес құрылды

Бүгін еліміздің оңтүстік астанасында ҚР Оқу-ағарту вице-министрі Еділ Оспанның үкіметтік емес ұйымдардың өкілдерімен «Балалардың игілігі үшін» тақырыбында балалардың құқықтарын қорғау саласын дамытудың өзекті мәселелеріне арналған кездесуі өтті. Іс-шараға сондай-ақ Балалардың құқықтарын қорғау комитетінің қызметкерлері және Үкіметтік емес ұйымдармен өзара іс-қимыл және ынтымақтастық жөніндегі кеңестің мүшелері қатысты.
Кездесудің модераторы ҚР Оқу-ағарту министрлігі Балалардың құқықтарын қорғау комитетінің төрайымы Насымжан Оспанова болды.
Жиында ҚР-дағы балалардың жағдайы туралы IV мерзімді баяндаманы қарау нәтижесінде алынған бала құқықтары туралы БҰҰ комитетінің ұсынымдарын іске асыруға баса назар аударылды.
Өз сөзінде вице-министр Еділ Оспан балалық шақ саласының маңыздылығын және туындайтын түйткілдерге жедел әрекет ету қажеттігін атап өтті.
«Әрбір баланың тағдыры - біздің ортақ болашағымыз екенін ұмытпауымыз керек. ҮЕҰ-мен өзара іс-қимыл жөніндегі кеңес құру - бұл балалардың құқықтарын қорғау және олардың әл-ауқатын қамтамасыз ету үшін барлық мүдделі тараптардың күш-жігерін біріктіруге бағытталған қадам. Бүгінде сын-қатерлерге бірлесіп әрекет ету өте маңызды. Ақпарат күн сайын өзгеруде. Біз балалардың құқықтарын қорғаудағы тосқауылдар туралы хабардар болуға міндетіміз», - деп жеткізді Еділ Оспан.
Талқылау барысында белгілі бір нәтижелерге қол жеткізілген ұсынымдарда көрсетілген нақты мәселелер қаралды, сондай-ақ назар аударуды қажет ететін проблемалық аймақтар анықталды.
Іс-шара мемлекеттік органдар мен үкіметтік емес ұйымдар арасындағы ынтымақтастықтың маңыздылығын атап өтті. Өскелең ұрпақтың қауіпсіздігі мен әл-ауқатын жақсартуға бағытталған нақты шешімдер мен бастамалар ұсынылды.