ҚР БҒМ МЕН "AYALA" ҚАЙЫРЫМДЫЛЫҚ ҚОРЫ ЖЕТІМ БАЛАЛАРҒА АРНАЛҒАН АРНАЙЫ КУРСТАР ҰЙЫМДАСТЫРАДЫ

Қазақстан Республикасы Білім және ғылым министрлігі мен "AYALA" қайырымдылық қоры арасында өзара ынтымақтастық туралы Меморандум жасалды. Меморандум шеңберінде жетім балалар мен ата-анасының қамқорлығынсыз қалған балаларға арналған білім беру ұйымдарында «кәсіптік бағдарлау» жобасы шеңберінде бірлескен іс-шаралар жүзеге асырылады.

Жоба аясында оқушылар үшін сайт әзірлеу, визаж, бейне-блогинг және журналистика бойынша арнайы курстар ұйымдастырылады. Сонымен бірге, кәсіби шеберханалар ашылып, математика, физика және химия пәндерінен оқуға түсу тестілерін тапсыруға дайындық бойынша көмек көрсетіледі.

«Тәжірибелі мамандарды оқыту процесіне тарту – жасөспірімдердің мамандықтар әлемі, еңбек процесінің сипаты мен ерекшеліктері туралы түсініктерін айтарлықтай кеңейтеді. Барлық балаға, әсіресе жетім және ата-анасының қамқорлығынсыз қалған балаларға өз ісінің мамандарымен байланыс орнатудың маңыздылығы зор. Бұл балалардың өзін-өзі дамытуға деген қызығушылығын оятудың ең жақсы тәсілі», – деді ҚР Білім және ғылым вице-министрі Бибігүл Асылова.

Биыл жетім балалар мен ата-анасының қамқорлығынсыз қалған балаларға арналған ұйымдардың 9 және 11 сыныптарында білім алған 500-ден астам түлек мамандық таңдайды. Осы ретте оқушыларды кәсіби бағдарлау мәселелерінде азаматтық қоғаммен өзара іс-қимыл балалар үйлерінің тәрбиеленушілеріне саналы түрде мамандық таңдау үшін жағдай жасауға мүмкіндік береді.