«Қазақстан балалары – күзгі интерактив!» күзгі каникул кезіндегі балалардың демалысын, бос уақытын және жұмыспен қамтылуын ұйымдастыру бойынша ұсыныстар (бұдан әрі – Ұсыныстар) оқушылардың каникул кезіндегі пайдалы және белсенді іс-әрекеттерін ұйымдастыру жүйесін дамыту мен жетілдіруге бағытталған.
Балалардың құқықтары мен заңды мүдделерін қамтамасыз ету – Қазақстан Республикасының ұлттық саясатының басты бағыттарының бірі.
Демалыс кезінде балалардың демалысын, бос уақытын және жұмыспен қамтылуын ұйымдастыру – бұл мемлекеттің әлеуметтік саясатының ажырамас бөлігі. Сонымен қатар бұл – балалардың шығармашылық дамуына, олардың рухани әлемі мен интеллектісін байытуға мүмкіндік береді.
Ұсыныстардың мақсаты – күзгі каникул кезінде балаларды жұмыспен қамтуды ұйымдастырудың жалпы тәсілдерін әзірлеу, білім беру ұйымдарында шығармашылық, спорттық, көшбасшылық бағдарламаларды іске асыру.
Тапсырмалар:
1) күзгі каникул кезінде балалардың демалысын және жұмыспен қамтылу жүйесін сақтау мен тұрақтандыруға бағытталған жағдайларды жасау;
2) демалыс кезінде балаларды жұмыспен қамту, демалыс пен денсаулықтарын жақсарту бойынша әдістемелік қолдау көрсету;
3) күзгі каникул кезінде 1-11 сынып оқушыларының іс-шараларға, оның ішінде қашықтан қатысуын қамтамасыз ету.