Қазақстан мен Болгария арасындағы әуе қатынастың мүмкіндігі кеңейеді

Астанада Қазақстан Республикасы мен Болгария Республикасының авиациялық билік органдары арасында ресми келіссөздер болды. ҚР ИДМ Азаматтық авиация комитетінің төрағасы Талғат Ластаев Болгария Республикасының Көлік, ақпараттық технологиялар және байланыс министрлігінің Еуропалық үйлестіру және халықаралық ынтымақтастық жөніндегі дирекциясының директоры Надежда Бухова ханым бастаған Болгар елінің делегациясымен кездесті. Келіссөздерге Қазақстан Республикасындағы Болгария Республикасының Төтенше және Өкілетті Елшісі Васил Петков мырза қатысты.

Келіссөздердің нәтижесінде Қазақстан Республикасы мен Болгария Республикасы арасында әуе қатынасы туралы үкіметаралық Келісімнің жаңа мәтіні «горизонталды» Келісімнің элементтерімен белгіленді. Өзара түсіністік туралы меморандумға қол қойылып, оның негізінде елдердің тағайындалған әуе компаниялары аптасына 3 рейс, екі ел арасына барлығы 6 рейсті орындауға мүмкіндік алды.

Сондай-ақ, әр ел аумағында тұрақты рейстерге арналған пункттерді анықтау туралы келісімге қол жеткізілді. Осылайша, қазақстандық тасымалдаушылар Болгария астанасы – София қаласына және Бургас, Варна сияқты курортты қалаларына ұша алады. Сонымен қатар, Болгарияның тағайындалған әуе компаниялары Қазақстанның Астана, Алматы, Шымкент сияқты «миллионды-қалаларына» ұшуға мүмкіндік алды.

Болгария қазақстандық жолаушылар үшін белгілі туристік бағыт. Соңғы жылдары Болгария тарапы маусымдық туристік рейстерді жүзеге асырды.

Жаңа келісімдерге қол жеткізу тікелей тұрақты рейстер ашуды жеңілдетеді.