GOV.KZ – Мемлекеттік органдардың цифрлық ресурстарының бірыңғай платформасы
САНАЛЫҰРПАҚЖАРҚЫНБОЛАШАҚАУДАНДЫҚСЕМИНАРЫӨТТІ
«САНАЛЫ ҰРПАҚ – ЖАРҚЫН БОЛАШАҚ» АУДАНДЫҚ СЕМИНАРЫ ӨТТІ
Бүгін Қызылқоға ауданы әкімдігі, аудандық ішкі саясат бөлімі және аудандық полиция бөлімінің бірлесіп ұйымдастыруымен «Заң мен Тәртіп» қағидаты аясында «Саналы ұрпақ – жарқын болашақ» атты аудандық семинар өтті.
Шараның негізгі мақсаты – жастардың құқықтық сауаттылығын арттыру, есірткі қылмысының алдын алу, салауатты өмір салтын насихаттау және саналы ұрпақ тәрбиелеу.
Семинарға арнайы шақырылған спикерлер: 🔹 Шынар Тукенова – «Самға» жастар денсаулық орталығының психологі; 🔹 Тимур Рамазанов – «Жаңа өмір» қолдау орталығының басшысы; 🔹 Айбол Ідірісов – Атырау облысы Полиция департаменті Есірткі қылмысына қарсы іс-қимыл басқармасының жедел уәкілі, полиция майоры.
Спикерлер жастар арасындағы өзекті мәселелерді қозғап, құқық бұзушылықтың алдын алу мен саналы таңдау жасаудың маңыздылығына тоқталды.
Шара барысында Көздіғара ауылының ерікті жастарынан құралған «Жас талант» театры және Атырау облысынан келген полицияның арнайы мақсаттағы бөлімшесінің (СОБР) қызметкерлері тақырыпқа сай сахналық қойылымдар ұсынды.
Семинар аясында аудан әкімінің орынбасары Жарас Есенғалиев спикерлерге алғыс хаттар табыстады. Сондай-ақ, аудандық полиция бөлімінің басшысы Руслан Байтенов сөз сөйлеп, шараға белсенді қатысқандарды алғыс хатпен марапаттады.
МӘСЛИХАТ ДЕПУТАТТАРЫНА ҚҰРМЕТ КӨРСЕТІЛДІ
Бүгін аудан әкімдігінің үлкен мәжіліс залында аудандық мәслихат депутаттарын марапаттауға арналған салтанатты жиын өтті. Тағылымды шараға аудан әкімі Қанат Әзмұханов, аудан әкімінің орынбасарлары, мәслихат депутаттары, ардагерлер кеңесінің төрағасы, бөлімдер мен мекемелердің басшылары қатысты.
Жиын барысында аудан әкімі Қанат Әзмұханов құттықтау сөз сөйлеп, ауданның қоғамдық-саяси өміріне белсене араласып, ел игілігі жолында аянбай еңбек еткен мәслихат депутаттарына алғысын білдірді. Сондай-ақ олардың азаматтық белсенділігі мен қоғамдық қызметінің, халықтың талап-тілегін жеткізіп, ауданның дамуына үлес қосудағы еңбектерінің маңыздылығына тоқталды.
– Депутаттық қызмет – үлкен жауапкершілік пен ел алдындағы адалдықты талап ететін абыройлы міндет. Халықтың аманатын арқалап, ел мүддесін қорғау жолында атқарған еңбектеріңіз бен ауданның өсіп-өркендеуіне қосқан үлестеріңіз үшін шынайы алғысымды білдіремін. Алдағы уақытта да ел игілігі жолындағы еңбектеріңіз жемісті болсын, – деген ізгі тілегін жеткізді аудан басшысы.
Құттықтау сөзден кейін Қанат Әзмұханов мәслихат депутаттарына арнайы алғыс хаттар табыстап, олардың ел алдындағы еңбегіне лайықты құрмет көрсетті. Салтанатты жиында аудандық мәслихат аппаратының басшысы Айбар Алтыбаев, аудандық мәслихат төрағасы қызметін атқарған Толқын Бейсқали және аудандық ардагерлер кеңесінің төрағасы Сағидолла Яқып та сөз алып, аудан басшылығына ризашылықтарын білдірді. Сонымен қатар депутаттарға ақжарма тілектерін арнап, халықпен етене жұмыс істеудің, ел сенімін ақтаудың және ортақ мақсат жолында бірлесе қызмет етудің маңыздылығын атап өтті.
Ауданның дамуына өз үлестерін қосқан азаматтарға құрмет көрсетуге арналған шара аудан өнерпаздарының мерекелік концертімен жалғасты. Жиын соңында қатысушылар естелік суретке түсіп, салтанатты шараны қорытындылады.
Атырау облысының әкімі Болат Ақшолақов жұмыс сапарымен Қызылқоға ауданына барып, әлеуметтік және инфрақұрылымдық нысандардағы құрылыс жұмыстарының барысымен танысты.
Жамансор ауылындағы теміржол вокзалының құрылысын қарап, мердігерге жұмыс қарқынын арттырып, нысанды сапалы әрі белгіленген мерзімде аяқтауды тапсырды.
Сондай-ақ Миялы – Сағыз бағытындағы автомобиль жолының жөндеу жұмыстарымен танысты. Қазіргі таңда 40 шақырым жол толық жасалып, 10 шақырым аумаққа қар ұстағыштар орнатылған. Су басу қаупі бар 10 учаскеде жолды көтеру жұмыстары жүргізілуде. Жобаны 2027 жылы аяқтау жоспарланған.
Миялы ауылындағы Ығылман Шөреков атындағы мектеп-гимназиясының күрделі жөндеу барысын қарап, жұмыстарды уақытылы әрі сапалы аяқтауды міндеттеді.
Жангелдин ауылындағы дене шынықтыру-сауықтыру кешені мен 300 орындық мәдениет үйінің құрылысымен де танысты.
Жұмыс сапарының қорытындысында облыс әкімі барлық құрылыс нысандарында сапа, қауіпсіздік және белгіленген мерзімнің сақталуын басты назарда ұстауды тапсырды.
Аудан әкімі Қ.Әзмұханов жастармен кездесу барысында садақшы, белсенді жас Қ.Қабылдың жастың ұсынысымен садақ атып, жастармен бірге еркін көтеріңкі көңіл-күйде уақыт өткізді.
Жастардың қызығушылығына ортақтасып, олармен бір толқында болған аудан әкімі кездесудің бейресми әрі жылы атмосферасын қалыптастырды.
Кездесу одан әрі гір тасын көтеру, ләңгі тебу және арқан тартыс секілді ұлттық ойындарға ұласып, жастардың белсенділігі мен жақсы көңіл-күйіне серпін берді.
ҚЫЗЫЛҚОҒА АУДАНЫ ӘКІМДІГІНІҢ БАСПАСӨЗ ҚЫЗМЕТІ.ҚЫЗЫЛҚОҒА АУДАНЫ ӘКІМДІГІНІҢ БАСПАСӨЗ ҚЫЗМЕТІ.ТАҒАЙЫНДАУ!
Қызылқоға ауданы әкімі Қанат Әзмұхановтың 2026 жылғы 10 шілдедегі №199 өкімімен Ардақ Айсәуле Ардаққызы Қызылқоға аудандық ішкі саясат бөлімінің басшысы лауазымына тағайындалды. Ардақ Айсәуле Ардаққызы 1999 жылы Атырау облысы, Қызылқоға ауданының Миялы ауылында дүниеге келген. Білімі – жоғары. Х.Досмұхамедов атындағы Атырау мемлекеттік университетін журналистика мамандығы бойынша және Қазақстан инновациялық және телекоммуникациялық жүйелер университетін құқықтану мамандығы бойынша тәмамдаған. Еңбек жолын 2019 жылы «4власть» Атырау журналистер одағы» қоғамдық бірлестігінде менеджер қызметінен бастаған. Кейін 2021–2024 жылдары Атырау облысы Ішкі саясат басқармасының «Азаматтық орталығы» КММ-де Қызылқоға ауданы бойынша маман, 2023–2024 жылдары Қызылқоға аудандық мәслихаты жанындағы Қоғамдық кеңестің хатшысы, 2025–2026 жылдары Атырау облысы Мәдениет және тілдерді дамыту басқармасында бас маман, 2026 жылдың сәуір айынан бастап осы уақытқа дейін Мақат аудандық ішкі саясат бөлімінің бас маманы болып еңбек етті. Жаңа бөлім басшысын аудан әкімі Қанат Әзмұханов құттықтап, жауапты қызметіне табыс пен сәттілік тіледі. 🖋ҚЫЗЫЛҚОҒА АУДАНЫ ӘКІМДІГІНІҢ БАСПАСӨЗ ҚЫЗМЕТІ.
Құрметті сайлаушылар, қадірменді әріптестер!
Сіздерді кәсіби мерекеміз-Дүниежүзілік сайлау күнімен шын жүректен құттықтаймын! Бұл күн - демократиялық басты қағидаттарын нығайтуға, сайлау жүйесінің ашықтығы мен әділдігін қамтамасыз етуге атсалысатын барлық мамандар үшін маңызды мереке.
Сайлау - халық еркін білдірудің және ел болашағын айқындаудың негізгі тетігі. Сондықтан біздің ортақ мақсатымыз - азаматтардың сайлауға деген сенімін арттырып, олардың саяси белсенділігін күшейту.
Күнделікті еңбектеріңіз адалдықпен пен әділеттілікке негізделіп, еліміздің демократиялық дамуына үлес қосатыны сөзсіз.
Осы жауапты да абыройлы қызметте Сіздерге қажымас қайрат, отбасыларыңызға амандық, еңбектеріңізге табыс пен сәттілік тілеймін!
Әрбір бастамамыз оң нәтижесін беріп, кәсіби жетістіктеріміз арта берсін!
Мерекеміз құтты болсын!
Құрметпен: Қызылқоға аудандық аумақтық сайлау комиссиясының төрағасы Мақсот Сайполұлы
Қызылқоға аудандық ардагерлер кеңесінің төрағасымен кездесу.
Дүниежүзілік сайлау күніне орай аудандық аумақтық сайлау комиссиясының төрағасы М.Муканов аудандағы ардагерлер кеңесінің төрағасы мен Қызылқоға аудандық Билер кеңесінің мүшесімен кездесті.
Кездесу барысында мүгедектігі бар адамдардың сайлау құқықтарын іске асыру бағытында сайлау комиссиялары атқарып жатқан жұмыстар, сайлау процесіне қолжетімділікті арттыру, дауыс беру кезінде қажетті жағдайлар жасау мәселелері талқыланды.