Атырау қаласындағы "Келешек мектептері" ұлттық жобасы аясында салынған №50 жалпы білім беретін орта мектепте облыстық білім беру ұйымдарының тәрбие жұмысына жауапты қызметкерлерімен кеңейтілген аппараттық жиын өтті.
Жиынға облыс әкімдігі, білім беру және денсаулық сақтау басқармасы және полиция департаменті өкілдері, аудандық білім бөлімдерінің мамандары мен мектеп директорларының тәрбие ісі жөніндегі орынбасарлары қатысты.
Көтерілген негізгі тақырыптар - ата-ана мен мектеп серіктестігі – сапалы тәрбиенің кепілі, қыз балалардың тәрбиесі және репродуктивті денсаулығы, кәмелетке толмағандар арасындағы құқықбұзушылықтың алдын алу, «Адал азамат» біртұтас тәрбие бағдарламасы мен «Ұрпағыңмен мың жаса!» жобасы, діни экстремизм мен терроризмнің алдын алу, мектеп формасының талаптарын сақтау мәселесі. Жиында тәжірибе алмасып, өзекті мәселелерді талқылау арқылы балалар мен жастар тәрбиесіне қатысты бірқатар ұсыныстар жасалды. Мақсат – мектеп пен отбасы арасындағы байланысты нығайту, құқықбұзушылықтың алдын алу және жас ұрпаққа сапалы тәрбие беру.