JANA BELLES FEST-2024: елордалық фестивальге 700-ге жуық студент қатысты

Қазақстан халқының Бірлігі күні қарсаңында Бейбітшілік және келісім сарайында «JANA BELES FEST 2024» шығармашылық жастар фестивалінің салтанатты жабылуы өтті. Іс-шараны «Астана жастары» жастар ресурстық орталығы ұйымдастырды, деп хабарлайды елорда әкімдігінің ресми сайты.

Шығармашылық жастар фестиваліне 20 колледждің оқушылары қатысты. Іс-шараға 1300-ге жуық студент жиналды.

«Біз үздік қатысушыларды анықтап, техника дүкенінен алғыс хаттар, кубоктар мен сертификаттар табыстадық. Байқауға іріктеу кезең-кезеңімен өтті. Алдымен колледж комиссиясы ең жақсы қатысушыны таңдап, оны байқаудың қалалық кезеңіне жібереді. Қалалық кезеңде қаланың барлық колледждерінің оқушылары арасынан үздіктер таңдалады», - деді «Астана жастары» жастар ресурстық орталығының бөлім басшысы Арайлым Сапаралы.

Фестиваль елорданың 20 колледжінен 700-ге жуық талантты қатысушыларды жинап, 7 номинация бойынша өтті.