Астанада Маңғыстау облысының күндері қалай өтіп жатыр

Елордада Маңғыстау облысының «Маңғыстаудан мың сәлем, Алаш төрі» атты мәдениет күндері басталды. Облыстың мәдениет, архивтер және құжаттама басқармасының басшысы Әбілқайыр Байпақов 7-9 қараша аралығында өтетін іс-шаралар туралы қаланың коммуникациялар қызметінде өткен брифингте айтып берді, деп хабарлайды Астана әкімдігінің ресми сайты.

Елорда төрінде маңғаз мекеннің мәдени жауһарлары жұртшылық назарына ұсынылып, ата салт-дәстүрді дәріптеп, ұлттық құндылықты ұлықтаған өлке өнерпаздарының өнері паш етіледі.

Үш күнге жалғасатын мәдени-рухани іс-шаралар аясында астаналықтарға арнап театр қойылымдары сахналанып, маңғаз Маңғыстаудың мақамды жыр-дастаны, өңір өнімдерінің көрме-жәрмеңкесі, сондай-ақ әдеби-сазды кештер мен салтанатты жиындар ұйымдастырылады.

«Маңғыстаудан мың сәлем, Алаш төрі!» Маңғыстау облысының Астана қаласында өтетін күндерінің бағдарламасы:

7-8 қараша күндері сағат 10.00-12.00 аралығында Маңғыстау облыстық қуыршақ театрының балаларға арналған қойылымдары өтеді. Оны «Жансая» әлеуметтік қызмет көрсету орталығында қойылады.

7 қараша күні сағат 15:00-де «Мақамы Мәшһүр Маңғыстау» күй кеші өтеді.
Іс-шара Қазақ Ұлттық өнер университеті залында ұйымдастырылады.

7 қараша күні сағат 18.30-да Е.Аманшаевтың «Құбылу» спектаклін Н.Жантөрин атындағы Маңғыстау облыстық музыкалық-драма театрының актерлері сахналайды. Қойылым М.Горький атындағы мемлекеттік академиялық орыс драма театрында өтеді.

8 қараша күні сағат 10.00-17:00 аралығында Маңғыстау облысының туристік әлеуетімен танысу үшін «Марс пейзаждары» көрмесі ұйымдастырылады.
Өтетін орны: Достық үйі
8 қараша күні сағат 10.00-17.00 аралығында Маңғыстау өнімдерінің көрме-жәрмеңкесі ұйымдастырылады. Ол Достық үйінде өтеді.

8 қараша күні сағат 11:00-де «Маңғыстау – ұлттық құндылықтар құндақталған мекен» рухани іс-шарасы Достық үйінде өтеді.
8 қараша күні сағат 17.00-де Ә.Кекілбайұлы атындағы Маңғыстау облыстық тарихи-өлкетану музейінің археология, Маңғыстау қазақтарының ХХ ғасырдағы ұлттық киім үлгілері көрмесін, Н.Мұхановтың «Күмбірлейді күмістер» коллекциясынан көрме және қолөнерші Алдаберген Тіленбаевтың сүйектен жасалған картиналарының көрмесі өтеді. Өтетін орны:
Бейбітшілік және келісім сарайы.

8 қараша күні сағат 19.00-де Бейбітшілік және келісім сарайында Маңғыстау облысының Астана қаласындағы мәдени күндерінің ашылу салтанатының гала-концерті өтеді.

9 қараша күні сағат 15.00-де Еуразия ұлттық университетінің залында «Ақиық өлке, алғи-жыр» атты маңғыстаулық ақын-жазушылардык әдеби сазды кеші өтеді.

9 қараша күні сағат 18:30-де Н.Жантөрин атындағы Маңғыстау облыстық музыкалық-драма театрының ұжымы М.Әуезовтің «Қорғансыздың күні» спектаклін сахналайды.
Өтетін орны: М. Горький атындағы мемлекеттік академиялық орыс драма театры.

9 қараша күні сағат 19:00-де Е.Рахмадиев атындағы Мемлекеттік академиялық филармонияда «Мерейлі мекен – Мұнаралы Маңғыстау» атты М.Өскінбаев атындағы Маңғыстау облыстық филармониясының Абыл Тарақұлы атындағы қазақ оркестрінің концерті, Маңғыстау күндерінің жабылу салтанаты өтеді.