Елордада танымал спортшылар балаларға арналған шеберлік сабағын өткізді

«ProFit» аула клубында танымал спортшылар балаларға арнап шеберлік сабағын өткізді, деп хабарлайды Астана әкімдігінің ресми сайты.

«Біз «ProFit» клубының тәрбиеленушілерімен бірге бокс және грэпплинг бағыттары бойынша дәстүрлі іс-шара өткіздік. Аула клубтары кәсіби спортты одан әрі дамытудың алғашқы бастамасы болып саналады.
Бүгінгі таңда 10-нан астам жас боксшы республикалық жарыстарда жүлделі орындарға ие болды. Қазіргі уақытта оларды балалар-жасөспірімдер спорт мектептеріне қабылдау мәселесі қарастырылып жатыр», - деп атап өтті Астана қаласы әкімдігінің «Астана Жастары» жастар орталығының басшысы Шыңғыс Тілеулин.

Салтанатты іс-шарада тәрбиеленушілер бокс пен грэпплингтегі дағдыларын көрсетті.

«Шеберлік сабағынан ләззат алдым.
Жаттықтырушылардың көмегімен деңгейімізді де арттырып, күн сайын дамимыз», - деп өз ойымен бөлісті жас боксшы Асанәлі Қуаныш.

Халықаралық және республикалық жарыстардың танымал жаттықтырушылары өздерінің кәсіби жолы қалай басталғанын айтып, балаларды ынталандыру үшін шеберлік сыныптарын өткізді.

«Мен джиу-джитсумен 15 жылдан бері айналысамын.
Балалармен жұмыс істеудегі басты қағидатым – тәрбие мен тәртіп», - деді джиу-джитсудан халықаралық деңгейдегі спортшы, Азиада-2022 қола мен күміс медаль иегері Нұрсұлтан Дүйсенқұлов.

Іс-шара барысында аула клубының тәрбиеленушілеріне арнайы сыйлықтар табысталды.
Сонымен қатар, олар чемпиондарға сұрақтар қойып, пайдалы кеңестерін тыңдай алды.