Машинист, жүргізуші, дәрігерлер және мұғалімдер. Астанада мемлекеттік наградамен кімдер марапатталды

Астана қаласының әкімі Жеңіс Қасымбек Instagram парақшасында бірқатар мамандық иелері мемлекеттік наградалармен марапатталғанын мәлім етті, деп хабарлайды елорда әкімдігінің ресми сайты.

«Адами капиталдан маңызды ешнәрсе жоқ. Елордамыздың бейнесі тұрғындарымен ерекшеленеді. Қаланың дамуына әркім үлес қосып жүр. Республика күні қарсаңында тұрғындарымызға мемлекеттік наградалар табыс етілді: III дәрежелі «Барыс», «Парасат», «Құрмет», III дәрежелі «Еңбек даңқы» ордендері, «Ерлігі үшін», «Ерен еңбегі үшін», «Шапағат» медальдары, «Қазақстанның Еңбек сіңірген қайраткері» атағы, ҚР құрмет грамотасы.

Сонымен, «Құрмет» орденімен №1 көпсалалы қалалық аурухананың уролог-андрологы Ш.Абдуғалимов, М.Өтемісов атындағы Оқушылар сарайының қосымша білім беру педагогы Л.Гаценко, «Ұлттық нейрохирургия орталығы» АҚ балалар нейрохирургиясы бөлімінің меңгерушісі Ғ.Өленбай, еңбек ардагерлері және т.б. марапатталды.

ІІІ дәрежелі «Еңбек даңқы» медалімен қалалық жедел жәрдем станциясының дәрігер-эпидемиологы, аудандық қазандықтың машинисі, №5 және №10 мектеп мұғалімдері, №1 автобус паркінің жүргізушісі, «Астана-Теплотранзит» АҚ инженері, электромонтері және т.б. марапатталды.

«Шапағат» медалі №4 емхананың бас медбикесіне, «Жансая» әлеуметтік қызмет көрсету орталығының әлеуметтік қызметкеріне, №1 көпсалалы қалалық аурухананың анестезиолог-реаниматолог дәрігеріне және т.б. табыс етілді.

Құрметті елорда тұрғындары мен қонақтары! Сіздерді келе жатқан мереке – Республика күнімен құттықтаймын!

Сіздерге зор денсаулық, бақ-береке және табыс тілеймін!» - деп жазды Жеңіс Қасымбек.