"Біз салауатты өмір салтын қолдаймыз!": елордада 500 студенттің қатысуымен акция өтті
Л.Гумилев атындағы Еуразия ұлттық университетінде студент жастар арасында "Біз салауатты өмір салтын қолдаймыз!" акциясы өтті. Іс-шара қалалық Қоғамдық денсаулық сақтау басқармасы, СӨС қалыптастыру орталығы, ЖИТС-орталығы және №3 қалалық емхананың "Жас толқын" жастар денсаулық орталығы «Әрбір азамат үшін сапалы және қолжетімді денсаулық сақтау» ұлттық жобасы аясында ұйымдастырылды, деп хабарлайды Астана әкімдігінің ресми сайты.
ЖОО холында студенттер мамандардан – уролог, психолог, гинекологтан кеңес ала алады, қантқа, ЖҚТБ-ға жедел тесттер жасай алады және масса индексін біле алады. Залда қысқа метражды фильмдер, нашақорлықтың алдын алу және булиинг туралы бейнероликтер көрсетілді.
Мұндай акциялардың басты мақсаты - дені сау, ақылды, білімді ұрпақты тәрбиелеу.
"Мемлекет басшысы өзінің Қазақстан халқына Жолдауында біздің азаматтарымызға, әсіресе жастарға есірткі заттарын тарату жолында қуатты тосқауыл қоюды тапсырды. Ол үшін бірнеше бағыт бойынша жұмыс атқарылуда: есірткінің зияны туралы әңгімелер жүргізілуде, жастардың спортпен шұғылдану әдеті қалыптасуда, ал полицейлер есірткінің таралуына қарсы әрекет етуде", - деп атап өтті " Жас толқын" жастар денсаулық орталығының СӨС дәрігері Азат Нұрмағамбетов.
Жастар алдында есірткі бизнесіне қарсы күрес бойынша түрлі қызмет салаларының өкілдері сөз сөйледі: қоғамдық денсаулық сақтау басқармасының Салауатты өмір салтын қалыптастыру орталығының директоры Қанат Хамзин, ЖИТС орталығының маманы Ажар Турымова, көркем гимнастикадан спорт шебері Анна Алябьева және т. б.
"Есірткі адам ағзасына үлкен зиян келтіреді, оны қолдану ағзаны бұзады. Бұл жағдайда оларға тәуелді болғандар ғана емес, сонымен бірге олардың жақындары мен туыстары да зардап шегеді. Жастар мұндай нәрселерден аулақ болу, спортпен шұғылдану, салауатты өмір салтын ұстану керек", – деп толықтырды Қоғамдық денсаулық сақтау басқармасының Салауатты өмір салтын қалыптастыру орталығының директоры Қанат Хамзин.
500-ге жуық жас қатысқан жиналыста медицина қызметкерлері есірткінің денсаулыққа, қоғамға тигізетін ауыр зардаптары туралы толық ақпарат берді. Салауатты өмір салтын қалыптастыру орталығы басшысының айтуынша, қазір жастар арасында синтетикалық есірткі қолданатын адамдар саны едәуір артты. Бұл негізінен 16 мен 30 жас аралығындағы жастар.
Сонымен қатар, нашақорлыққа қатысы барлардан басқа, оның таралу жағдайы да күрт өсті. Бұл үрдісті болдырмау үшін қалада ай сайын ауқымды іс-шаралар өткізіледі.
"Есірткі жастарға қолжетімді бола бастағаны, күн сайын кеңейіп жатқан нарыққа жаңа есірткі заттары, соның ішінде күшті, жойқын әсері бар түрлерінің тарап жатқаны алаңдатады. Созылмалы улану жастардың жеке тұлғасын бұзады, мінезі өзгереді, айналасын, тіпті жақын адамдарын да олар жау көріп тұрады. Өмірге деген немқұрайлылық пайда болады, ол зұлымдық, қозу және агрессия кезеңдерімен ауысып тұрады; бұл адамдар есірткіден кейінгі бастарының ауырғанын тоқтату үшін кез - келген қылмысқа баруға дайын тұрады", - деп түсіндірді Астана қаласы Полиция департаментінің есірткі бизнесіне қарсы іс-қимыл басқармасының ведомствоаралық үйлестіру, нашақорлықтың алдын алу бөлімінің бастығы.
Кездесу барысында спикерлер студенттердің көптеген сұрақтарына жауап берді. Іс-шара өнер мектебінің жас гимнасттары Анна Алябьеваның өнерімен жалғасты.