Елордада Ұлттық күрестен "Байқоңыр барысы" турнирі өтті
Астанада қазақ күресінен "Байқоңыр барысы" атты ашық турнир өтті. Биыл турнир Республика күнін мерекелеу аясында ұйымдастырылды, деп хабарлайды қала әкімдігінің ресми сайты.
"Байқоңыр барысы" ұлттық күрес бойынша ашық турнир Өндіріс тұрғын алабында орналасқан дене шынықтыру-сауықтыру кешенінде өтті. Оған 18 жастан асқан 75 астаналық палуан қатысты. Ең мықтылары 60 және 82 келіге дейінгі бірнеше салмақ дәрежесінде жүлделі орындарға таласты.
Турнирдің бас төрешісі Аян Ерназаровтың айтуынша, биыл жарысқа елордалық 65 спортшы қатысып жатыр. Турнир жеңімпазы "Байқоңыр барысы" кубогы мен белбеуін, сондай-ақ 750 мың теңге көлемінде ақшалай сыйлық алады. Екінші және үшінші орын алған палуандар да ақшалай сыйақы алады.
Спорттық іс-шараның басты мақсаты - жастар арасында ұлттық спорт түрлерін және салауатты өмір салтын насихаттау, жастардың спортқа деген қызығушылығын ояту.
"Жарыс өте жоғары деңгейде өтті. Барлық балуандар епті және кәсіби дайындалған. "Байқоңыр барысы" ұлттық мереке қарсаңында өтетіні қуантады. Байқауға 80-ге жуық балуан қатысты. Өзім үшінші орынға ие болдым. Барлық спортшыларға, ұйымдастырушыларға алғыс айтамын. Бүгінгі жарысқа әсіресе жастар көп қатысты. Осындай жарыстардың арқасында өскелең ұрпақтың спортқа деген қызығушылығы артады деп ойлаймын", - деді жарыс жүлдегері Сағындық Әшім.
Айта кетейік, аудан тұрғындары арасында көптеген жастар, соның ішінде балалар да жарысты тамашалауға келді.
Жыл сайынғы турнирдің бас жүлдесі үшін кілемге 21 елордалық спортшы шықты. Нәтижесінде Алмас Шынкеев "Байқоңыр барысы" атағын жеңіп алды. Екінші орын Нұрдәулет Айсағалиевке, ал үшінші орын Мейіржан Сламшайковқа бұйырды.
Турнир қорытындысы бойынша 60 кг салмақ дәрежесінде бірінші орынды Нұрбол Елубай иеленді. Екінші орынды Ержан Ерікайыпов, ал үшінші орынды Сағындық Әшім иеленді.
Сонымен қатар, 82 келі салмақ дәрежесінде бірінші орынды Мәди Амангелді, екінші орынды Диас Талғатұлы иеленді. Осы салмақ дәрежесінде елордалық спортшы Тимур Абутай құрметті үшінші орынға ие болды.
Іс-шараға отандық спорттың еңбек сіңірген қайраткерлері, танымал балуандар мен еліміздің көрнекті қайраткерлері қатысты.