«Классик ұстаханасы»: Астанада жазушы Төлен Әбдікпен кездесу өтті

Астана қаласы Тілдерді дамыту және архив ісі басқармасы мен Қазақстан Жазушылар одағының Астана қалалық филиалының ұйымдастыруымен «Классик ұстаханасы» атты жаңа жобасы басталды. Жобаның алғашқы қонағы аса көрнекті жазушы, Мемлекеттік сыйлықтың иегері, «Тозақ оттары жымыңдайды», «Парасат майданы», «Ақиқат», «Өліара» секілді сүбелі туындылардың авторы Төлен Әбдік болды, деп хабарлайды елорда әкімдігінің ресми сайты.

Қазақ қаламгерлерінің өмір жолы, жазу стилі мен шығармашылық процестерін тереңірек зерттеу, қазіргі заман әдебиетінің трендтері мен бағыттарын талқылау, әдебиеттегі ой еркіндігі мен креативтілік мәселелерін көтеру, жазушылардың жас буынға мотивация беруін қамтамасыз ету, оқырмандар арасында әдебиетті насихаттау.
Қаламгер SINTEZ театрында «Жазушы лабораториясы» тақырыбында дәріс оқыды. Аталған іс-шараға қала әкімінің орынбасары Есет Байкен және Қазақстан Жазушылар одағының Астана қаласы бойынша филиалының төрағасы Бауыржан Бабажанұлы, Алдан Смайыл, Әлім Қайсар, Жарылқап Бейсенбай, Роза Мұқанова, Қуаныш Жиенбай, Дархан Мыңбай, Оңайгүл Тұржан және т.б. зиялы қауым өкілдері, оқырмандар және жас әдебиетшілер қатысты. Дәріс соңында жазушы тыңдармандармен еркін пікір алмасып, сұрақтарға жауап берді.

Айта кетейік, «Классик ұстаханасы» – бұл қазақ әдебиетінің арамызда жүрген классиктері мен белгілі өкілдерінің шығармашылық және өмірлік тәжірибесін кейінгі ұрпаққа жеткізу идеясынан туған жоба. Аталған жоба қазақ әдебиеті майталмандарының ойлары мен идеяларын, шығармашылық әдістерін болашақ қаламгерлерге және әдебиет сүйер қауымға ұсынатын шеберхана іспетті.

Жобаның мақсаты қазақ әдебиетінің классиктері мен танымал қаламгерлердің шығармашылық тәжірибесін кеңінен таныту, әдебиетке қызығушылық танытатын жастарға бағыт-бағдар беру, олардың көркем шығармашылық қабілетін дамытуға көмектесу, ұлттық әдебиеттің маңыздылығын арттыру арқылы ұлттық, рухани құндылықтарды дәріптеу.