Астана қаласындағы сайлау учаскелері желісін жетілдіру жұмыстары жалғасуда

Астана қаласының Аумақтық сайлау комиссиясы қызметінің маңызды бағыттарының бірі – елордадағы сайлау жүйесінің тиімді жұмысын қамтамасыз ету, оның ішінде жаңа учаскелік сайлау комиссияларын құру және олардың құрамын жасақтау болып табылады.

2026 жылғы 24 маусымда Астана қаласы мәслихатының кезекті сессиясында қаланың аудандарында 8 жаңа сайлау учаскесін құру, сондай-ақ учаскелік сайлау комиссиялары құрамындағы бос орындарды толықтыру мәселелері қаралды.

Жаңа сайлау учаскелерінің құрылуына және комиссиялар құрамында бос орындардың болуына байланысты Астана қаласы мәслихатының шешімімен учаскелік сайлау комиссияларының құрамына 68 жаңа мүше сайланды.

Жаңа сайлау учаскелерін құру қала инфрақұрылымының дамуына, халық санының артуына және азаматтардың тұрғылықты жері бойынша сайлау рәсімдеріне қолжетімділігін қамтамасыз ету қажеттілігіне байланысты жүзеге асырылуда.

Учаскелік сайлау комиссияларының кәсіби құрамын қалыптастыру алдағы электоралдық науқандарға дайындықтың маңызды құрамдас бөлігі болып табылады. Осыған байланысты Астана қаласының Аумақтық сайлау комиссиясы комиссия мүшелерін оқыту, олардың кәсіби құзыреттерін арттыру және сайлау процесін ұйымдастыру жұмыстарын жетілдіру бағытындағы қызметін жалғастыруда.

Сайлау учаскелері желісін дамыту және сайлау комиссияларының кадрлық әлеуетін нығайту жөніндегі жұмыстар тұрақты негізде жүргізіліп, сайлау науқандарының ашықтығын, тиімділігін және жоғары деңгейде ұйымдастырылуын қамтамасыз етуге бағытталған.