– Мемлекет басшысының кеңейтілген отырыста сөйлеген сөзінде экономиканың барлық салалары мен секторлары қамтылды. Біз үшін, әрине, денсаулық сақтау саласы туралы айылған жайттар бәрінен маңыздырақ болғаны анық.
Бұл ретте салада шешімін күткен мәселелер жеткілікті екенін Президент атап өтті. Әсіресе медициналық сақтандыру қорының жұмысына қатысты айтқан сыны есте қалыпты. Бүгінгі таңда бұл жүйе жетілдіруді қажет етеді. Тариф қалыптастыру жүйесін құруға деген тәсілдерді өзгертіп, ӘМСҚ қызметін қайта қарастыру қажет.
Сонымен қатар Президент денсаулық сақтау саласын цифрландыру мәселесіне де тоқталды. Иә, бүгінде бұл саланың олқылығы көп. Интероперабельдік платформаны іске қосып, барлық ақпараттық жүйелерді біріктіру қажет және бұрын мемлекеттік бағдарлама шеңберінде басталған жұмысты нақты тәжірибеге енгізу керек. Дәрігерлерді қағазбастылықтан құтқару сыбайлас жемқорлық тәуекелдерін азайтып, көп көңілді қағаз толтыруға емес, науқастармен тікелей жұмыс істеуге бөлуге септік етеді.
Ана мен бала мәселесі де назардан тыс қалмады. Бұл – елдің ең маңызды әлеуметтік-экономикалық көрсеткішінің бірі. Бүгінгі таңда әлемде, өкінішке қарай, бұл көрсеткіш бойынша артта қалып келеміз. Негізгі себеп – коронавирус пандемиясы. Алдағы уақытта ана мен балаға медициналық көмек көрсету формасын жетілдіру керек. Осы ретте инфрақұрылымдық мәселелер де қылаң береді. Мәселені шешу тек қағаз жүзінде қалмай, нақты іс жүзінде шешіліп, медициналық көмек бұл жағдайда қолжетімді әрі сапалы болуы тиіс. Инфрақұрылымдық мәселелерден бөлек, кадр әлеуетіндегі қиындықтар да бар. Министрлік осы бағытта нақты қадамдарға баруда, сондықтан бұл көрсеткіштің төмендігі алдағы уақытта оң өзгерістер болады деп сенеміз.