Агенттік төрағасы Жандос Шаймарданов: «Ұлттық жоспардың мәні – халықтың әл-ауқатын арттыру»

Бүгін Реформалар агенттігінің төрағасы Жандос Шаймарданов «24KZ» телеарнасында «Бетпе-бет» бағдарламасына сұхбат берді.

Талқылаудың басты тақырыбы 2029 жылға дейінгі Ұлттық даму жоспары болды.

Даму жоспарын іске асырудың қоғамның мүдделі топтарына әсері қандай болатыны туралы айта келе, Жандос Шаймарданов құжаттың маңызына тоқталды.

«Ұлттық даму жоспарының іргелі міндеті – халықтың әл-ауқатын жақсарту, ол еліміздің барлық тұрғындарының базалық инфрақұрылым мен қызметтерге қолжетімділігін сөзсіз қамтамасыз етуді, сондай-ақ әрбір азаматтың әлеуетін ашу үшін тең мүмкіндіктер жасауды қамтиды.

Басымдықтар өмір сүру сапасын, атап айтқанда денсаулық, білім беру, әлеуметтік қорғау және қол жетімділікті арттыруға және байлықты әділ бөлуге арналған.

Бизнес тұрғысынан алғанда, құжатта экономиканы ырықтандыруға және адал бәсекелестікті ынталандыруға қатысты бірқатар бастамалар енгізілген, сондай-ақ кәсіпкерлікті қорғауға, инвесторлар үшін болжамды және тартымды жағдайларға кепілдік беруге және бизнес-бастамаларды қолдауға бағытталған басымдықтар бекітілген.

Мемлекет үшін тұрақты экономикалық өсу траекториясына шығудан басқа, құжат сот төрелігі жүйесін, құқық қорғау органдары мен мемлекеттік институттарды одан әрі жақсартуға бағытталған, бұл біздің мемлекетіміздің құқықтық негіздерін нығайтуға ықпал ететін болады», - деді ол.

Толық сұхбатты осы сілтемеде көруге болады.