Агенттікте азаматтық қоғамды дамыту мәселелері талқыланды

Бүгін Агенттік төрағасы Жандос Шаймарданов Қазақстанның Азаматтық Альянсының президенті, Агенттіктің қоғамдық кеңесінің мүшесі Бану Нұрғазиевамен кездесті.

Азаматтық қоғамды дамыту мәселелерін талқылай отырып, Агенттік басшысы Жандос Шаймарданов ведомствоның «Пайым: Қазақстан – 2050» стратегиясын жаңарту және 2029 жылға дейінгі ұлттық даму жоспарын әзірлеу барысы туралы айтты.

«Жаңартылған стратегия ұзақ мерзімді, әлеуметтік-экономикалық дамудың негізгі құжаты болады және жақын уақытта қоғамдық кеңесте оның жобасы ұсынылады», - деді Агенттік Төрағасы.

Өз кезегінде Азаматтық Альянс басшысы қоғамның проблемалық мәселелеріне байланысты көзқарасымен бөлісті. «Азаматтық қоғам мен мемлекет арасындағы диалогта үкіметтік емес ұйымдардың рөлі маңызды», - деп атап өтті Бану Нұрғазиева.

Кездесу барысында үкіметтік емес ұйымдардың қатарына кіретін заңды тұлғалар бойынша статистиканы жіктеу қажеттілігі ұсынылып, соңында тараптар ынтымақтастықты жалғастыруға келісті.