Қазақстан Республикасы Үкіметінің отырысында қаржылық қызметтерді тұтынушылардың құқықтарын қорғау мәселелері қаралды
ҚР Қаржы нарығын реттеу және дамыту агенттігі қаржылық қызметтерді тұтынушылардың мүдделерін қорғаудың тиісті деңгейін қамтамасыз ету үшін шаралар кешенін қабылдауда
ҚР Премьер-Министрі Асқар Маминнің төрағалық етуімен өткен Үкімет отырысында тұтынушылардың құқықтарын қорғау мәселелері қаралды. ҚР Сауда және интеграция министрі Б. Сұлтанов, ҚР Қаржы нарығын реттеу және дамыту агенттігі Төрағасының бірінші орынбасары О. Смоляков және «Атамекен» ҚР Ұлттық кәсіпкерлер палатасының Басқарма Төрағасы А. Мырзахметов баяндама жасады.
ҚР Қаржы нарығын реттеу және дамыту агенттігі (бұдан әрі – Агенттік) Төрағасының бірінші орынбасары О. Смоляковтың айтуынша, қаржы ұйымдарына қатысты бірқатар талаптар заңнамалық деңгейде белгіленді: ұсынылатын қаржы өнімдері туралы қаржы реттеушісіне хабарлау, қаржы ұйымдары директорлар кеңесінің мөлшерлемелердің шекті шамаларын және ұсынылатын қаржылық қызметтердің тарифтерін бекітуі, тұтынушылардың қаржы операциялары бойынша міндеттемелерін бұзғаны үшін есептелетін айыпақылардың (айыппұлдардың және өсімпұлдардың) шекті мөлшерлері айқындалды. Қаржы ұйымдары үшін тұтынушының қаржылық қызметті таңдау құқығын шектеуіне заңнамалық тұрғыдан тыйым салынды, тұтынушылардың өз міндеттемелерін орындауы бойынша олардың қаржы ұйымдарымен арасындағы дауларды реттеу, оның ішінде қаржы омбудсманы институты арқылы реттеу тәртібі де регламенттелді.
«Тұтынушылар үшін қаржы ұйымдарының қызметі мен олар көрсететін қызметтер туралы толық ақпаратты және оның қолжетімділігін қамтамасыз ету үшін заңдарда осы ақпаратты қаржы ұйымының интернет-ресурсында орналастырудың міндеттілігі белгіленген. Бұл ретте шындыққа сәйкес келмейтін жарнаманы жариялағаны үшін әкімшілік жауапкершілік белгіленген», - деп атап өтті О. Смоляков.
Сонымен қатар 2021 жылғы мамырда банктер мен МҚҰ үшін азаматтардың қарыздар бойынша мерзімі өткен берешегін реттеудің бірыңғай міндетті тәртібін қамтитын бірқатар заңнамалық түзетулер қабылданды.
«Мемлекет басшысының тапсырмасы бойынша Агенттік азаматтарды коллекторлық ұйымдардың заңсыз әрекетінен қорғау үшін коллекторларды реттеуді қатаңдату бойынша қосымша шаралар әзірлеуде», - деп атап өтті қаржы реттеушісі Төрағасының бірінші орынбасары.
Азаматтардың құқықтарын алаяқтық операциялардан қорғау және жалған онлайн-микрокредиттердің берілуіне жол бермеу үшін ағымдағы жылғы наурызда Агенттік қарыз алушыны биометриялық және міндетті екі факторлы идентификаттау жөніндегі талапты енгізу арқылы қарыз алушыларды идентификаттау рәсімдерін күшейтті.
«Агенттік ҚР ІІМ-мен және ҚР Бас прокуратурасымен бірлесіп ағымдағы жылғы қазанда Ведомствоаралық өзара іс-қимыл жөніндегі меморандумға және Заңсыз кредиттерді анықтау және тергеп-тексеру, қарыз алушылардың жалған берешегін жедел есептен шығару алгоритміне қол қойды», - деді О. Смоляков.
Қаржылық сауаттылықты арттыру үшін 2020 жылғы мамырда Қаржылық сауаттылықты арттыру тұжырымдамасы қабылданды, оны іске асыру шеңберінде қаржылық сауаттылық жөніндегі бірыңғай Fingramota.kz интернет-порталы, Fingramota Online мобильдік қосымшасы жұмыс істейді.
Қаржылық қолжетімділікті және инклюзияны арттыру мақсатында Агенттікте мүмкіндігі шектеулі адамдарға қызмет көрсетудің және оларға арналған қаржы өнімдеріне қол жеткізудің негізгі өлшемшарттары мен талаптарын қамтитын, қаржы ұйымдарына арналған Әдістемелік ұсынымдар мен Жадынама әзірледі. «Қаржылық қолжетімділік картасы» әзірленді, онда азаматтардың барлық санатының сұраныстарына сәйкес келетін банктердің бөлімшелері берілген. Қазіргі уақытта азаматтардың барлық санаты және қаржы нарығының барлық сегменті (банк, микроқаржы, сақтандыру және басқа) үшін қолжетімді қамтамасыз ету стандарттарын қалыптастыру жөніндегі жұмыс жүргізілуде.
Азаматтарды қаржы нарығында заңсыз қызмет белгілері бар субъектілермен күмәнді қаржылық операцияларға тартуға жол бермеу жөніндегі алдын алу шарасы ретінде Агенттік қаржы пирамидасының немесе лицензиясыз инвестициялық қызметтің белгілері бар 121 ұйымның тізімін жариялады.
Қаржылық қызметтерді тұтынушылардың құқықтарын қорғау мәселелері бойынша call-орталыққа: +7 (727) 237 1000 нөмірі бойынша хабарласыңыздар. Жұмыс кестесі дүйсенбі – жұма күндері, сағат 9.00-ден 17.00-ге дейін
Агенттіктің Сыртқы коммуникациялар басқармасы: +7 (727) 2371089, press@finreg.kz