Қаржы нарығы субъектілерінің жұмыс режимі туралы

ҚР ҰБ 2020 жылғы 27 сәуірдегі № 116 бұйрығы

ҚР ҚНРДА 2020 жылғы 27 сәуірдегі № 198 бұйрығы

 

БІРЛЕСКЕН БҰЙРЫҚ

 

Қаржы нарығы субъектілерінің жұмыс режимі туралы 

«Қазақстан Республикасында төтенше жағдайды енгізу туралы» Қазақстан Республикасы Президентінің 2020 жылғы 15 наурыздағы № 285, «Әлеуметтік-экономикалық тұрақтылықты қамтамасыз ету жөніндегі шаралар туралы» 2020 жылғы 16 наурыздағы № 286 және «Қазақстан Республикасында төтенше жағдайдың қолданысын ұзарту туралы» 2020 жылғы 14 сәуірдегі
№ 306 Жарлықтарына сәйкес, азаматтардың өмірі мен денсаулығын қорғау, коронавирустық инфекцияның (COVID-19) таралуын болдырмау мақсатында, Қазақстан Республикасының Президенті жанындағы Төтенше жағдай режимін қамтамасыз ету жөніндегі мемлекеттік комиссияның 2020 жылғы
27 наурыздағы шешімі негізінде БҰЙЫРАМЫЗ:  

1. 2020 жылғы 28 сәуірден бастап 4 мамыр аралығында Нұр-Сұлтан және Алматы қалаларында:

1) осы бірлескен бұйрыққа 1-қосымшада көрсетілген субъектілердің
9 сағат 00 минуттан 17 сағат 00 минутқа дейінгі жұмыс кестесі белгіленсін.

Осы бірлескен бұйрыққа 1-қосымшада көрсетілген субъектілер қызмет көрсету үшін филиалдар мен бөлімшелерді өз бетінше айқындасын.

Осы бірлескен бұйрыққа 1-қосымшада көрсетілген субъектілердің (олардың филиалдары мен бөлімшелерін ескере отырып) жұмыс орнындағы қызметкерлерінің саны жалпы штат санының 50%-нан (елу пайызынан) аспауға тиіс;

2) ломбардтардың Қазақстан Республикасының заңнамасына сәйкес микроқаржылық қызметті жүзеге асыратын ұйымдар ретінде есептік тіркеуден өтуі мақсатында ғана олардың 9 сағат 00 минуттан 16 сағат 00 минутқа дейінгі жұмыс кестесі белгіленсін.

Осы тармақшаның бірінші бөлігінде көрсетілген қызметті жүзеге асыру үшін ломбард қызметкерлерінің саны 3 (үш) адамнан аспауға тиіс; 

3) «Қазақстан қор биржасы» және «Бағалы қағаздардың орталық депозитарийі» акционерлік қоғамдарының 9 сағат 00 минуттан 15 сағат 00 минутқа дейінгі жұмыс кестесі белгіленсін;

4) екінші деңгейдегі банктер, Ұлттық пошта операторы және айырықша қызметі банкноттарды, монеталарды және құндылықтарды инкассациялау болып табылатын заңды тұлғалар экономика субъектілері мен халықты
қолма-қол ақшамен қамтамасыз ету бойынша үздіксіз қызметті жұмыс уақытында жүзеге асыруды, оның ішінде банкоматтарды қолма-қол ақшамен уақтылы толықтыруды және олардың кідіріссіз жұмысын қамтамасыз етсін;

5) екінші деңгейдегі банктер және Ұлттық пошта операторы клиенттер операцияларын өңдеуді жүзеге асыратын қызметтердің жұмысын ұйымдастыруды және банкоматтардың, терминалдардың, интернет-банкингтің, мобильдік банкингтің және басқа да клиенттердің банктік шоттарын қашықтан басқару жүйелерінің, инкассаторлық қызметтің, call-қызметтің, төлем карталарын жеткізу қызметінің, сондай-ақ олардың ұйғаруы бойынша басқа қызметтердің үздіксіз жұмыс істеуін қамтамасыз етсін.

2. Осы бірлескен бұйрыққа 2-қосымшаға сәйкес тізбе бойынша Қазақстан Республикасының Ұлттық Банкі мен Қазақстан Республикасы Қаржы нарығын реттеу және дамыту агенттігінің бірлескен бұйрықтарының күші жойылсын.
3. Осы бірлескен бұйрық қол қойылған күнінен бастап күшіне енеді.
4. Қазақстан Республикасы Ұлттық Банкінің Қолма-қол ақша айналысы департаменті (Қажымұратов Ж.Т.) және Төлем жүйелерi департаменті
   (Ашықбеков Е.Т.) және Қазақстан Республикасы Қаржы нарығын реттеу және дамыту агенттігінің Банктік реттеу департаменті (Қизатов О.Т.), Бағалы қағаздар нарығы департаменті (Медеу Е.А.) және Сақтандыру нарығы және актуарлық есеп айырысу департаменті (Шайқақова Г.Ж) осы бірлескен бұйрықты осы бірлескен бұйрықтың 1-тармағының 1) тармақшасында көрсетілген субъектілерге жіберсін.
5. Осы бірлескен бұйрықтың орындалуын бақылау Қазақстан Республикасының Ұлттық Банкі Төрағасының орынбасары Д.Т. Ғалиеваға және Қазақстан Республикасы Қаржы нарығын реттеу және дамыту агенттігі Төрағасының бірінші орынбасары О.А. Смоляковқа жүктелсін.

 

 

 

                                     

                  

Қазақстан Республикасы Ұлттық Банкінің және Қазақстан Республикасы Қаржы нарығын реттеу және дамыту агенттігінің

2020 жылғы «27» сәуірдегі № 116 және

2020 жылғы «27» сәуірдегі № 198  

бірлескен бұйрығына

1-қосымша

 

 

Субъектілер тізбесі

 

 

1. Екінші деңгейдегі банктер
2. Банк операцияларының жекелеген түрлерін жүзеге асыратын ұйымдар (қызметін Қазақстан Республикасы Ұлттық Банкінің қолма-қол шетел валютасымен айырбастау операцияларына арналған лицензиясы негізінде тек қана айырбастау пункттері арқылы жүзеге асыратын заңды тұлғаларды қоспағанда)
3. Сақтандыру (қайта сақтандыру) ұйымдары
4. Сақтандыру брокерлері
5. Бағалы қағаздар нарығында брокерлік қызметті жүзеге асыратын ұйымдар
6. Микроқаржы ұйымдары және кредиттік серіктестіктер
7. Төлем ұйымдары

 

Қазақстан Республикасы Ұлттық Банкінің және Қазақстан Республикасы Қаржы нарығын реттеу және дамыту агенттігінің

2020 жылғы «27» сәуірдегі № 116 және

2020 жылғы «27» сәуірдегі № 198 

бірлескен бұйрығына

2-қосымша

 

 

Қазақстан Республикасы Ұлттық Банкінің және Қазақстан Республикасы Қаржы нарығын реттеу және дамыту агенттігінің күші жойылған бірлескен бұйрықтарының тізбесі

 

1. «Қаржы нарығы субъектілерінің жұмыс режимі туралы» Қазақстан Республикасы Ұлттық Банкінің және Қазақстан Республикасы Қаржы нарығын реттеу және дамыту агенттігінің 2020 жылғы 6 сәуірдегі № 98 және
   №180 бірлескен бұйрығы.
2. «Қазақстан Республикасы Ұлттық Банкінің және Қазақстан Республикасы Қаржы нарығын реттеу және дамыту агенттігінің 2020 жылғы
   6 сәуірдегі № 98 және №180 бірлескен бұйрығына өзгеріс енгізу туралы» Қазақстан Республикасы Ұлттық Банкінің және Қазақстан Республикасы Қаржы нарығын реттеу және дамыту агенттігінің 2020 жылғы 11 сәуірдегі
   № 105 және № 183 бірлескен бұйрығы.
3. «Қазақстан Республикасы Ұлттық Банкінің және Қазақстан Республикасы Қаржы нарығын реттеу және дамыту агенттігінің 2020 жылғы
   6 сәуірдегі № 98 және №180 бірлескен бұйрығына өзгеріс енгізу туралы» Қазақстан Республикасы Ұлттық Банкінің және Қазақстан Республикасы Қаржы нарығын реттеу және дамыту агенттігінің 2020 жылғы 17 сәуірдегі
   № 112 және № 192 бірлескен бұйрығы.