Облыста барлығы 70 жұмыс істеп тұрған бұқаралық ақпарат құралы тіркелген, оның ішінде 47-сі – баспа басылымдары (40 газет және 7 журнал), ал 23-і – электрондық БАҚ (2 телеарна, 6 кабельдік телевидение операторы, 13 ақпараттық агенттік және 2 радио).
Мемлекеттік емес БАҚ-тың үлесі шамамен 90%-ды құрайды.
Сонымен қатар, өңірде республикалық деңгейдегі 20 жетекші БАҚ-тың меншікті тілшілері жұмыс істейді.
Ақмола облысында әлеуметтік-экономикалық үдерістерді және Мемлекет басшысының тапсырмаларының орындалуын, сондай-ақ «Таза Қазақстан», «Заң және тәртіп», «Адал азамат» бастамаларын іске асыруды ақпараттық сүйемелдеуге бағытталған жүйелі ақпараттық жұмыс жолға қойылған.
Осы бағыттағы жұмыс аясында өңірде болып жатқан нақты өзгерістерді көрсететін әртүрлі форматтағы сапалы медиаконтент: бейнесюжеттер, инфографикалар, сұхбаттар және сараптамалық материалдар әзірленеді.
БАҚ пен мемлекеттік органдардың сапалы өзара іс-қимылын қамтамасыз етуде Өңірлік коммуникациялар қызметінің қызметі маңызды рөл атқарады. ӨКҚ алаңында мемлекеттік органдардың бірінші басшыларының, қала және аудан әкімдерінің брифингтері өткізіледі.