2% жеңілдікті ипотека: «Бақытты отбасы» бағдарламасы бойынша өтініштер қабылдау басталды

2% жеңілдікті ипотека: «Бақытты отбасы» бағдарламасы бойынша өтініштер қабылдау басталды
«Бақытты отбасы» ипотекалық тұрғын үй бағдарламасы бойынша өтінім қабылдау басталды, деп хабарлайды Egemen.kz Отбасы банк баспасөз қызметіне сілтеме жасап.
«Бақытты отбасы» бағдарламасына қатысу туралы өтінім otbasybank.kz платформасында 20 маусым мен 19 шілде аралығында қабылданады. Ол үшін Отбасы банк клиенті болу қажет және аутентификация кодын алу үшін қолда ұялы телефон болуы керек. Қосымша анықтамалар мен құжаттар қажет емес. Жүйе үміткердің деректерін тексеріп, өтініш қалыптастырады.
Бағдарламаға қатысу үшін жергілікті органда тұрғын үй кезегінде тұру қажет. Өтінім бере алатын санаттар:
- көпбалалы отбасы;
- мүмкіндігі шектеулі бала тәрбиелеп отырған отбасы;
- толық емес отбасы (неке бұзылған сәттен бастап кемінде 3 жыл өтуі керек).
Банктың хабарлауынша, өткен жылы «Бақытты отбасы» бағдарламасы бойынша өтінім берген, алайда баспана алмаған азаматтар биыл өтінімді қайта беруі қажет.
Өтінім қабылдау аяқталғаннан кейін қатысушылардың негізгі және резервтік тізімдері автоматты түрде қалыптастырылады. Тізімдерге бөлу кезінде қатысушылардың жергілікті әкімдікте кезекке тұру күні мен санаты ескеріледі. Конкурс нәтижелері otbasybank.kz порталына орнастырылады.