Көкшетау қаласында 800-ден астам адам үй карантинінде

Бүгінде Көкшетаудағы эпидемиологиялық жағдай қалай? Бұл сұраққа қалалық бас санитар дәрігер Қанат Искаков жауап берді, - деп хабарлайды Өңірлік коммуникациялар қызметі.

Спикердің айтуынша, 10 қарашадағы жағдай бойынша 1710 зертханалық расталған COVID-19 жағдайы, 1 тамыздан бастап COVID-19 белгілері бар пневмонияның 156 жағдайы тіркелген.

Сондай-ақ, ағымдағы жылдың 1 қарашасынан 10 қарашасына дейін 252 зертханалық расталған COVID-19 жағдайы тіркелді, оның 84% -ы симптомдармен, 16% симптомсыз вирусты тасымалдаушылар. Бұл көрсеткіш өткен аптамен салыстырғанда 2,3 есеге өскен.

Медицина қызметкерлерінің арасында қазан, қараша айларында 40 КВИ жағдайы тіркелді. Оның ішінде 28-і симптомдарымен.

«Қала бойынша 255 белсенді ошақ анықталды. Ал жұқпалы аурулар ауруханасында 86 науқас емделуде. Дәрігерлердің бақылауымен 840 адам үй карантинінде жатыр. Көктем мен жазғы кезеңдегі жағдайды ескеретін болсақ, біз бүгінде эпидемиялық жағдайға дайынбыз, барлық қажеттіліктермен қамтамасыз етілгенбіз», - дейді Қанат Тұрсынбекұлы.

Сонымен қатар, Ақмола облысы бас санитар дәрігерінің қолданыстағы Қаулысының талаптарын сақтау бойынша 12 мониторингтік топ жұмыс жасауда. Рейдтік тексеру барысында 5 шілде мен 10 қараша аралығында карантин режимі талаптары бойынша 2365 объект анықталып, 30,0 млн теңге сомасында 398 айыппұл салынған.

Айта кетейік, бұған дейін Көкшетау қаласының маңында 6 санитарлық бекет қойылған еді. Енді карантин талаптары күшейтіліп, 13 қарашадан ПТР анықтамасы жоқ Ақмола облысында тұрмайтын адамдарға Көкшетаудың карантиндік аймағына кіруге тыйым салынды.