Ақмола облысында архившілер күніне орай марапаттау рәсімі өтті

       Өткенді сақтай отырып, болашақты жасаймыз: Ақмола облысында Архившілер күні атап өтілді.

 

       2025 жылғы 19 желтоқсанда Ақмола облысының Цифрландыру және архивтер басқармасында Қазақстан Республикасы Архившілер күніне арналған салтанатты іс-шара өтті. Іс-шара аясында архив ісін дамытуға қосқан үлесі үшін «Азаматтарға арналған үкімет» мемлекеттік корпорациясы» КЕАҚ Ақмола облысы бойынша филиалының қызметкерлері алғыс хаттармен марапатталды. Сондай-ақ бұл жиын өңірдің архив қызметінің жетістіктерін таныстыруға мүмкіндік берді.

 

        Бүгінде өңірдің архив қызметі заманауи цифрлық жүйе ретінде дамып келеді. Ақмола облысының архив қорларында 1,5 миллионнан астам іс сақтаулы. Қоймалардың жоғары жүктемесіне қарамастан, қауіпсіздік мәселесіне басымдық беріліп, архивтер автоматты өрт сөндіру жүйелерімен жабдықталған.

 

        Цифрлық трансформацияға ерекше көңіл бөлінуде. Архив материалдары белсенді түрде цифрландырылып, оның ішінде Құжаттардың бірыңғай электрондық архив жүйесі арқылы 98 мыңнан астам іс туралы мәліметтер енгізілді. Бұл архивтік анықтамалар мен мемлекеттік қызметтерді алу процесін айтарлықтай жеделдетуге мүмкіндік беруде.

 

        Архивтердің қызметі өңір тұрғындарының өміріне тікелей әсер етеді. 2025 жылдың толық емес кезеңінде еңбек өтілін растау, құжаттарды қалпына келтіру және азаматтардың құқықтарын қорғауға қатысты 21 мыңнан астам әлеуметтік-құқықтық сұраныс өңделді.

 

        Архившілер күнін атап өту тарихи мұраны сақтау мен өңірдің цифрлық дамуын қамтамасыз етудегі архив саласының маңыздылығын тағы бір мәрте көрсетті.