Қазақстан Республикасының мемлекеттік рәміздері туралы заңнаманы сақтау жөнінде
Қазақстан Республикасының мемлекеттік рәміздері туралы заңнаманы сақтау жөнінде
Қазақстан Республикасының мемлекеттік рәміздері – мемлекеттің тәуелсіздігі мен егемендігінің, ұлттық бірегейлігі мен мемлекеттілігінің маңызды нышандары болып табылады. Қазақстан Республикасының Конституциясына сәйкес әрбір азамат Қазақстан Республикасының Мемлекеттік Туын, Мемлекеттік Елтаңбасын және Мемлекеттік Әнұранын құрметтеуге міндетті.
Мемлекеттік рәміздер саласындағы заңнама олардың дұрыс пайдаланылуын қамтамасыз етуге, мемлекеттің беделін арттыруға және қазақстандық патриотизмді қалыптастыруға бағытталған.
Заңнаманың негізгі талаптары
«Қазақстан Республикасының мемлекеттік рәміздері туралы» Қазақстан Республикасының Заңына сәйкес мемлекеттік рәміздерге мыналар жатады:
- Қазақстан Республикасының Мемлекеттік Туы;
- Қазақстан Республикасының Мемлекеттік Елтаңбасы;
- Қазақстан Республикасының Мемлекеттік Әнұраны.
Мемлекеттік рәміздер Қазақстан Республикасының заңнамасында белгіленген жағдайларда міндетті түрде орналастырылып, пайдаланылуға тиіс.
Мемлекеттік Туды пайдалану талаптары
Қазақстан Республикасының Мемлекеттік Туы мемлекеттік органдардың, жергілікті өзін-өзі басқару органдарының ғимараттарында, сондай-ақ заңнамада белгіленген өзге де орындарда орналастырылады.
Ғимараттардың ішінде Мемлекеттік Ту:
- мемлекеттік органдар мен ұйымдар басшыларының кабинеттерінде;
- мәжіліс және отырыс залдарында;
- ресми іс-шаралар мен салтанатты рәсімдер өткізілетін орындарда орналастырылады.
Мемлекеттік Тудың сыртқы жағдайына ерекше назар аударылуы қажет. Жыртылған, ластанған, түсі оңған немесе сыртқы келбеті бүлінген Туларды пайдалануға жол берілмейді.
Мемлекеттік Елтаңбаны пайдалану талаптары
Қазақстан Республикасының Мемлекеттік Елтаңбасы мемлекеттік органдардың ғимараттарында, басшылардың қызметтік кабинеттерінде, мәжіліс залдарында және заңнамада көзделген өзге де орындарда орналастырылады.
Мемлекеттік Елтаңбаны пайдалану кезінде:
- оның бейнесін бұрмалауға;
- түсін, пропорцияларын және жекелеген элементтерін өзгертуге;
- ресми бекітілген үлгіге сәйкес келмейтін бейнелерді пайдалануға;
- заңнама талаптарына қайшы орналастыруға жол берілмейді.
Мемлекеттік Әнұранды орындау тәртібі
Қазақстан Республикасының Мемлекеттік Әнұраны мемлекеттік және ресми іс-шаралар кезінде, мемлекеттік мерекелерде, Мемлекеттік Туды көтеру рәсімдерінде және заңнамада көзделген өзге де жағдайларда орындалады.
Мемлекеттік Әнұран орындалған кезде қатысушылар белгіленген тәртіпті сақтап, мемлекеттік рәмізге құрмет көрсетуге міндетті.
Ең жиі кездесетін бұзушылықтар
Құқық қолдану тәжірибесі мемлекеттік рәміздерді пайдалану кезінде келесі бұзушылықтардың жиі кездесетінін көрсетеді:
- түсі оңған немесе бүлінген Мемлекеттік Туларды пайдалану;
- мемлекеттік рәміздердің міндетті түрде орналастырылуы тиіс орындарда болмауы;
- Мемлекеттік Елтаңбаның ресми үлгіге сәйкес келмейтін бейнелерін қолдану;
- мемлекеттік рәміздерді орналастыру тәртібін бұзу;
- мемлекеттік рәміздерді тиісінше күтіп ұстамау.
Мұндай фактілер заңнама талаптарының сақталмауын көрсетеді және оларды уақтылы жоюды талап етеді.
Заңнама талаптарын бұзғаны үшін жауапкершілік
Қазақстан Республикасының Әкімшілік құқық бұзушылық туралы кодексінің 458-бабына сәйкес Қазақстан Республикасының мемлекеттік рәміздерін пайдалану тәртібін бұзу әкімшілік жауаптылыққа әкеп соғады.
Сонымен қатар, Қазақстан Республикасының мемлекеттік рәміздерін қорлағаны үшін заңнамада жауапкершілік көзделген.
Мемлекеттік рәміздер туралы заңнама талаптарын сақтау заңдылықты қамтамасыз етудің, мемлекеттілікті нығайтудың және ұлттық құндылықтарға құрмет қалыптастырудың маңызды тетігі болып табылады.
Заң бұзушылықтардың алдын алу жөніндегі жадынама
Мемлекеттік рәміздерді пайдалану кезінде келесі талаптарды тұрақты түрде сақтау ұсынылады:
- мемлекеттік рәміздердің заңнамада белгіленген орындарда орналасуын қамтамасыз ету;
- мемлекеттік рәміздердің бекітілген мемлекеттік стандарттарға сәйкестігін бақылау;
- бүлінген және түсі оңған Туларды уақытылы ауыстыру;
- Мемлекеттік Елтаңбаның тек ресми бекітілген үлгілерін пайдалану;
- Мемлекеттік Әнұранды орындаудың белгіленген тәртібін сақтау;
- мемлекеттік рәміздердің жай-күйіне тұрақты бақылау жүргізу.
Мемлекеттік рәміздерге құрметпен қарау – азаматтық жауапкершіліктің, отансүйгіштіктің және Қазақстан Республикасына деген құрметтің көрінісі